1 "Uneva mgosi analomba mvele, niyo anda hakumuunga kwaviya helelwe naye. Ivo mgosi niyo amwandikila talaka na kumgulusa mwe kaya yakwe, 2 akajika mvele uyo niyo alombigwa ni mgosi mtuhu, 3 uneva uyo mgosi ywa kaidi anamguha, yehe naye niyo amwasa na kumgulusa kwe kaya yakwe, hegu uyo mgosi anabanika, 4 ivo uyo mgosi ywa bosi asekumguha naho mvele uyo kunda mkaziwe, kwaviya katendigwa asekuzumilwa. Kutenda ivo ni kumuihiza Zumbe Mnungu. Mse kutenda wavu mwe isi iyo mkwink'higwa ni Zumbe Mnungu kunda ukipe wenyu."

5 "Mgosi yeyose alombile mazuwa ya hagihi asekuita kwe nk'hondo, naho asekwink'higwa ndima yeyose, alekelwe ekale kwa mwaka umwenga, vileke ekale kaya na mkaziwe."

6 "Unamkopesha mnt'hu kint'hu, usekuguha iwe dyakwe dyo kusagila dinde poni. Unatenda ivo nounde kuusa isila yakwe yo kuikila lumwe nk'hande yo kumtenda ande mgima."

7 "Mnt'hu yeyose anamguha kwa kumkakalisa Mwizilaeli miyawe na kumtenda mtumwa wakwe hegu kumtaga mwo utumwa, mnt'hu uyo vaungwa akomwe. Nivo nomtende uwihi uwo kunda hakuna."

8 "Uneva mnt'hu yeyose ana maine yaihile ya nk'handa mwaungwa kunda na wengele kwa kutimila malagizo ya walava nt'hambiko wa Kilawi. Enga ivo niwasigiile nivo nomdamanye kwa wengele. 9 Kumbukileni Zumbe Mnungu ivo amtendele Miliamu umwo mwandaga mwe nt'hambo kulawa Misili."

10 "Unamkopesha miyawo kint'hu chochose sema unengile mwe nyumba yakwe kuguha kint'hu. 11 Mgojele kuse naho mleke yehe mwenye akuletele icho ikint'hu, 12 mna uneva yehe mkiwa usekwikala ne kint'hu icho kilo chose, 13 mvuzile kila kisingi vileke akegubikile na kukuungila uvikilwa. Kudamanya ivo ni mbuli ya uwagilwa ha Zumbe Mnungu."

14 "Usekumhujila mndima ywako mkiwa, ande Mwizilaeli hegu yumwenga mwa wakaya wakwikala mwo mzi wenyu. 15 Kila zuwa, dikanda hadinati kuswa mlihe kiya akuungwa kulihwa mwe dizuwa idyo, kwaviya yehe ni mkiwa na uwo nuwo akukawiila mwo moyo wakwe, vileke sema anamwiile Zumbe Mnungu, niyo weye wanda na masa."

16 "Welesi wasekukomwa kwaajili ya masa ya wana wawe, naho wana wasekukomwa kwaajili ya masa ya welesi wawe. Kila mnt'hu naakomwe kwa masa yakwe mwenye."

17 "Msekwazaganya uwagilwa wa wata kwiza na wanank'hiwa. Naho msekuguha valo dya mvele abanikilwe ni mgosiwe na kudiika poni. 18 Kumbukileni nyuwe nomnda watumwa mwe isi ya Misili, na Zumbe Mnungu niyo awakombola kulawa uko. Kwa ivo nawenk'hani sigilizi ino."

19 "Mkavuna ulozo wenyu mwo mgunda msekusokoza, walekeni watakwiza na wanank'hiwa na wabanikilwe ni wagosi zawe, vileke Zumbe Mnungu awavikile mwe zindima zenyu zose. 20 Umwo unanonola matunda ya zeituni mwo mzeituni usekuuya naho ukanonole yadya yasigale, mna walekeleni wata kwiza na wanank'hiwa na wabanikilwe ni wagosi zawe. 21 Umwo mkanonola zabibu zenyu msekuvuzagiza, walekeleni watakwiza na wanank'hiwa na wafiilwe ni wagosi zawe. 22 Kumbukileni nyuwe nomnda watumwa mwe isi ya Misili, nivo vikuleka nawenk'hani sigilizi ino."