1 "Nyuwe mwi wana Zumbe Mnungu. Mkahongeza kwajili ya mnt'hu abanike mse kukesenga sale hegu kukemoga kipala enga ivo wakutenda want'hu watuhu. 2 Kwaviya nyuwe mwi want'hu wakukile kwa Zumbe Mnungu. Zumbe kawasagulani nyuwe kulawa mwa want'hu wose wa si zose vileke mnde want'hu wakwe mwenye."

3 "Msekudya kint'hu chochose hekizumilwe mwo kumvika Zumbe. 4 Mwadaha kudya ng'ombe na ngoto na mbuzi, 5 na nt'wika na vipala na nk'hongoni mbala na mp'hofu na ngulugulu. 6 Mwadaha kudya nyama za makala yana ngaga zikepangile naho yaseula. 7 Mna msekudya nyama ya kala hedikuseula naho hadina ngaga zikepangile. Msekudya ngamia na kabuga na mp'helele. Makala ayo yaseula mna hayana ngaga zikepangile, ayo hayazumilwe. 8 Naho msekudya nguluwe, hamwenga na kugamba zina ngaga zikepangile mna hazi kuseula. Msekudya inyama yakwe naho msekutoza ivimba vawe."

9 "Samaki zose zina vilamba na magwalatu mwadaha kudya. 10 Mna kiumbwa chochose kikwikala mwa mazi mna hakina vilamba na magwalatu msekudya inyama yakwe kwaviya unavidya ivo nevikutende use kuzumilwa kwo kuvika."

11 "Mwadaha kudya madege yose yazumilwe. 12 Mna msekudya madege enga aya: Sumula na mp'hungu na, 13 Ndegenyika na kasoka na mzinge, 14 mwewe dink'hundu na mamwewe yose ye hengi amatitu, 15 na makungulu yose yehengi 16 Mbuguni na lugawa na dudumizi na visoka vihengi na mamwewe yose ye hengi, 17 makungwi ye hengi, 18 na fulindi na mzinge na yangeyange."

19 Msekudya vidudu vose vina mawawa yakuvumila. Havizumilwe. 20 Mna viduvidu vose vina mawawa heye kuvumila vizumilwa, mwadaha kudya.

21 "Msekudya kiumbwa chochose kifile chenye. Mwadaha kuwenk'ha watakwiza wakwikala mwo mzi wenyu hegu du mwadaha kumtagila mtakwiza. Mna nyuwe mwi want'hu wakukile wa Zumbe Mnugu."

"Naho msekunyemsa nyama ya mwana mbuzi mwe mele ya nine."

22 "Usekuleka kupagula imwenga ya mlongo kulawa mwo ulozo wako we kwe nk'honde wa kila mwaka. 23 Udye imwenga ya mlongo ye nk'hande ne ye divai mp'ya na mavuta ya zeituni na welekwa wa nk'hongo we mifugwa yako. Widiile hant'hu hasagulwe ni Zumbe kugamba want'hu wamvike aho. Damanyeni ivi vileke mhine kumvika Zumbe Mnungu mazuwa yose. 24 Uneva aho hant'hu hale, Zumbe naye kakuvikila, naho hukudaha kwinula iyo imwenga ya mlongo Zumbe Mnungu akuvikile, 25 tageni ivint'hu ivo niyo mwayegala matundu ayo hant'hu hasagulwe kumvika Zumbe Mnungu. 26 Matundu ayo myaguile kint'hu chochose ikanda ni nyama ya ng'ombe hegu ya mbuzi hegu ya ngoto hegu divai hegu mp'hombe, hegu chochose nouunge. Akajika mvidiile hant'hu hasagulwe ni Zumbe kugamba want'hu wamvike aho."

27 "Naho msekuwajala Walawi awo mkwikalanya nawo mwe mizi yenyu kwaviya woho hawana upasi hegu ukipe wawe. 28 Mwo uheelo wa kila mwaka wa katatu, nomwigale ziya imwenga za mlongo zo ulozo na kuziika mwa magulu ye mizi yenyu. 29 Izo nezinde kwajili ya Walawi hewenk'higwe hant'hu mwe isi kunda hawe, na watakwiza na wanank'hiwa na wabanikilwe ni wagosi zawe wakwikala mwe mizi yenyu. Awo naweze wadye na kwiguta, naivo Zumbe Mnungu ywenyu naawavikileni mwe zindima zenyu zose mkudamanya."