1 Niho chahitukaga niyo chakonga kuita kuhinga kwe dijangwa kwe Bahali ya Shamu enga ivo Zumbe anisiigile. Utafi wetu waguhaga lupisi lutali kwa kwangadika mwe isi ya vigulu ya Seili.

2 "Niyo Zumbe anigamba, 3 changadikisa mwe isi ino, haluse kihinge mkoma mahanya. 4 Haluse wagambe want'hu awo ivi, ‘Mwihagihi na komboka mwe isi ya wandugu zenyu awo welekwa wa Esau awo wakwikala Seili. Nawande wamwogohani ivo mkaulise. 5 Mse kuawasogola vileke mkonge nk'hondo nawo, kwaviya heniwenk'heni hant'hu hohose mwe isi yawe, hata hant'hu ha kujata na lwayo. Hiwenk'ha welekw wa Esau isi ye vigulu ya Seili inde yawe. 6 Nomgule nk'hande na mazi yo kunywa kwawe.’ "

7 "Zumbe Mnungu mkumvika kawavikilani mwe zindima zenyu zose mkudamanya. Kamanya icho kiwalaileni mwe dijangwa idi dikulise mwe miyaka ino milongo mine. Zumbe Mnungu ywenyu mkumvika kanda hamwenga na nyuwe haheina kuhungukilwa chochose."

8 "Naivo elo chombokelaga kunk'handa mwa wandugu zetu welekwa wa Esau wakwikala Seili. Chahitukaga kulawa kwe sila ya Alaba ikulawa Elati na Ezioni-gibeli niyo chagenda kombokela mwe sila ya mwe dijangwa dya Moabu. 9 Zumbe anigambaga, ‘Msekuwagela nk'huswank'huswa hegu kukonga nk'hondo na want'hu wa Moabu awo welekwa wa Loti. Kwaviya kawenk'ha wana wa Loti mzi wa Ali unde wawe naho haakink'e suwe hohose mwe isi yawe.’ "

10 Aho kale mzi wa Ali wekalagwa ni mazint'hu makulu yetangagwa Maemimu, yendaga matali enga Waanaki. 11 Waaemi na Waanaki wose kwa hamwenga wamanyika enga waalefai. Mna Wamoabu wawetanga Waaemi. 12 Iviyaiviya aho kale Waamoli wekalaga uko Seili, mna welekwa wa Esau wawagulusaga na kuwakoma pele no kuiguha isi yawe enga ivo Waizilaeli watendaga mwe isi idya Zumbe awenk'haga inde kipe chawe.

13 "Zumbe akigambaga chomboke dikolongo dya Zeledi. Ivo niyo chadyomboka idikolongo idyo. 14 Yombokaga miaka milongo mitatu na mnane kulawa mwo lupisi ludya chombokaga Kadeshi Banea. Watowani wose we cheleko kiya wandaga wabanika enga ivo Zumbe awaikilaga kilapi. 15 Zumbe agendeelaga kuwahiga mpaka aho awakomaga wose."

16 "Elo welekwa wose weze wabanike pele, 17 Zumbe Mnungu anigambaga, 18 ‘Dielo nomwomboke mihaka ya Moabu kwombokela isi ya Ali. 19 Mkeza mpaka mwe mihaka ye isi ya wana Amoni welekwa wa Loti, mse kuwagela nk'huswank'huswa hegu kuwatowa nk'hondo kwaviya heniwenk'heni hohose mwe isi idya niwenk'hile woho, kwaviya hiwenk'ha wana Loti isi iyo.’ "

20 Isi iyo iviyaiviya yamanyikaga kunda ni isi ya Walefai, zina dya want'hu wekalaga mwei isi iyo, Waamoli wawetangaga Wazamimu. 21 Wandaga watali enga Waanaki wabindile ingi naho wata ludole, mna Zumbe awakomaga wose, niho Waamoni waguhaga isi yawe no kwikala umo. 22 Zumbe kawadamanyila aayo Waedomu welekwa wa Esau awo wakwikala mwe isi ya Edomu. Awakomaga pele Waaholi, kwaivo Waedomu waiguhaga isi yawe na kwikala umo mpaka ivi haluse. 23 Naho kwandaga na Waavi wekalaga mwe zikaya mnk'handa mwe Meditelania mpaka Gaza. Naho Wakafitoli kulawa mwe kisiwa cha Kilete. Awo nawo wawakoma pele Waavi awo wekala mwe isi iyo niyo waiguha isi yawe yose mpaka mwo mzi wa Gaza.

24 "Kize chombokele Moabu, Zumbe akigambaga, ‘Haluse kongeni utafi. mwomboke mto Anoni. Hiwenk'hani udahi wa kumuhuma Sioni seuta ywa Waamoli ywa Heshiboni niyo mwaitaha isi yakwe. 25 Neniwatende want'hu wose mwe isi wawogoheni na kunda na lukeng'ent'ha umwo wakeva dizina dyenyu dikatambulwa.’ "

26 "Naivo elo nasigiilaga want'hu kulawa aha Kademosi waite kwa Sihoni seuta ywa Heshiboni wegale ulosi uno wo utondowazi. 27 ‘Kilekele chombokele mwe isi yako. Nechomboke mwe sila haheina kuhinga kulume hegu kumoso. 28 Nk'hande na mazi nekigule kwako. Chalombeza kint'hu kimwenga du kwako, ukilekele chomboke lwa viga mwe isi yako, 29 mpaka aho nechomoke mto Yolodani kingile mwe isi idya Zumbe Mnungu ywetu akukin'ha. Welekwa wa Edomu wakwikala Seili na Wamoabi wakwikala Ali wakilekelaga niyo chomboka mwe isi yawe.’ "

30 "Mna Sihoni seuta ywa Heshiboni hakilekele chomboke mwe isi yakwe. Zumbe Mnungu ywetu uyo amtendaga ande mnk'hani na kusaguka vileke kimhume na kuitaha isi yakwe iyo kikwikala mpaka ivi haluse."

31 "Zumbe Mnungu niyo anigamba, ‘Kaula himtenda seuta ywa Sihoni na want'hu wakwe kunda wasokezi kwenyu, itaheni isi yakwe inde yenyu.’ " 32 Ivo Sihoni seuta ezaga na watoani wakwe vileke atoane na suwe hagihi no mzi wa Yahazi. 33 Zumbe Mnungu ywetu uyo amwiikaga mwo udahi wetu niyo chamkoma yehe na wanawe na want'hu wakwe wose. 34 Chaitahaga na kuibananga mizi yakwe yose na kuwakoma want'hu wakwe wagosi kwa wavele na wana. Hachalekile yeyose kunda mgima. 35 Nekitaha mifugwa no ugoli wose wandaga mwe mizi. 36 Zumbe Mnungu uyo akitendaga kuitaha mizi yose. Kungongela Aloeli mwo lwega lwe dikolongo dya Alinoni no mzi uhagati he dikolongo mpaka Gileadi. Hakwandaga na mzi wowose wandaga na gomela tali naho ditogile chadundugaga kudimola. 37 Mna hachadahile kuisogeela isi ya Waamoni hegu mwo lwega lwo mto Yabokihegu mwe mizi ye isi ye vigulu hegu hant'hu hohose hadya kilemezwe ni Zumbe Mnungu ywetu uyo kakigamba kisekuita.