1 "Mbingu tegelezeni ulosi wangu,

isi mwive kiya hulonga.

2 Mahinizo yangu nayagwe enga fula,

na milosi yangu enga mnyuzu mwe isi.

Saviya manyunyu mwa majukila,

iligana na matwent'we ya fula mwa mani yakudegeda.

3 Neniditogole dizina dya Zumbe nenibilikize ulosi wa Mnungu,

Want'hu nawasimwiile ukulu wakwe."

4 "Zumbe ni gomela dyako,

ndima zakwe zikint'ha heziina kwazagula.

Yehe ni Mnungu mhuwilwa naho mkindedi,

adamanya mbuli zo uwagilwa no uwedi.

5 Mna nyuwe hiyo wahuwilwa,

hamuwagilwe kunda want'hu wakwe,

nyuwe ni cheleko chagile naho kina wavu.

6 Togoleni ivi nivo mkumliha Zumbe,

nyuwe wahezi homwiina ubala?

Ivo, yehe hiye tati yenyu naho muumbi ywenyu?

Yehe niye awatendeni kunda isi."

7 "Kumbukileni mazuwa yomboke,

fanyanyeni miaka ye vyeleko vingi,

wauzeni tati zenyu wawagambileni ayo yalailaga,

naho wauzeni wadala wenyu wawagambileni mbuli za kale.

8 Umwo Mnungu ekulanga vitendese eze awapangile want'hu isi yawe,

awapangaga want'hu wose,

aikaga mihaka kwaajili ye ziisi,

viligane no uwazilo wa wana wa Izilaeli.

9 Mna Zumbe awasagulaga welekwa wa Yakobo wande wakwe mwenye."

10 "Awabwiilaga mwe dijangwa,

naho mwe nyika ikutisa

awamilaga na kuwakaulisa enga mboni ya ziso.

11 Enga degenyika dikuhiniza makinda yakwe ukupuuluka,

yayenula kwa wengele mnanga mwa mawawa yakwe,

Zumbe awadima Izilaeli wanase kugwa.

12 Yehe Zumbe Mnungu mwenye awalongozaga want'hu wakwe

haheina wambizi wa mnungu mtuhu."

13 "Awombosaga mnanga mwe isi ye vigulu,

nawo wadyaga ulozo wa mwe migunda.

Awenk'haga uki walawaga mwa maiwe niyo wadya

mavuta ya zeituni yalawaga mwe sanga ina maiwe.

14 Ng'ombe zawe ne zingoto zawe zalavisa jibini na mele.

Awenk'haga ngoto zedi ne mbuzi zedi ne zing'ombe,

na ngano itendese uwedi ne divai yedi."

15 "Want'hu wa Izilaeli wandaga wagoli mna niyo wasaguka

wadamanaga na kumwasa Mnungu

wamlekaga Mnungu awaumbanga

na kumlemela luwe lwo uyokozi wawe.

16 Wamtendaga Zumbe aone finju kwa kuitimila milungu yawe,

uihi wautendaga umwiihiza

17 Waitambikilaga milungu ya udant'hi

milungu mihya iyo wakale wawe hawa imanyaga,

milungu heyatimilwagwa ni Izilaeli.

18 Waujala Uluwe lwawe lwo uyokozi uyo awaumbaga.

Naho niyo wamjala Mnungu ywawe uyo awenk'hile ugima."

19 "Zumbe Mnungu aonaga mbuli iyo niyo awaleka,

kwaviya aihiwagwa ni wana kilume na wana kike.

20 Niyo agamba, ‘Heniwambize.’ "

Niho nenione ivo nevinde kwawe,

awo cheleko kisaguke, want'hu hi wahuwilwa.

21 Wanigela maya kwa ayo mahili yawe

na maya kwa iyo wakuitanga milungu yawe

milungu hiyo milungu ye kindedi.

Neniwagele finju kwa kuwatuma want'hu wahezi heweina nt'hogola niwaihizeni

Neni wageleni finju kwa isi heiina ubala.

22 Maya yangu nayakweele enga moto,

nayabanange kila kint'hu mwe isi,

Nayabule mpaka kwe isi ya wabanike,

Luhotelo lwe milima nenilubanange.

23 " ‘Neniwegaile makunt'ho heyekusila kwawe

na kuwalasa kwa misale yangu yose.

24 Nawanyale kwa sala na maine,

nawakomwe kwa manyonge yakutisa.

Nenigale makala mbago vileke yawakump'hukile,

na nyoka zina usungu ziwalume.

25 Nk'hondo neiwakome mwe zisila,

wogohi noutendese mwe zikaya.

Wana kilume na wa kike nawakomwe

Hokusigale mwana hegu mdala.

26 Nehaunga niwabanangeni pele,

vileke mnt'hu yeyose ase kuwakumbukilani naho,

27 mna hiungile wank'hondo wenyu wakeduvye

wagambe, ni suwe kiwakomile,

hiyo Zumbe ayatendile aya.’ "

28 "Izilaeli ni isi ya want'hu heweina ubala,

want'hu wakwe waswesa mizungu.

29 Wandile na mizungu hegu nawadimanya idi,

hegu nawamanya ivo uheelo wawe nounde.

30 Mnt'hu yumwenga adaha vivihi kuwahuma want'hu alufu

hegu want'hu waidi kuwahuma want'hu milongo alufu?

Mnungu ywo udahi kawaonela chevu.

Ni kwaviya Zumbe ywawe kawaleka."

31 Hata wank'hondo wawe wamanya kugamba milungu yawe misokezi,

hiyo midahi enga Mnungu ywa Izilaeli.

32 Wank'hondo wawe ni enga mizabibu ihandigwe Sodoma na Gomola

woho ni enga mizabibu zisungu naho enga zabibu zina usungu.

33 Ni enga divai idamanywe kwa usungu wa nyoka.

34 "Zumbe akumbukila icho wadamanye wank'hondo wawe,

yehe agoja lupisi aikile vileke awasulumize.

35 Yeye naalihize na kuwasulumiza,

dizuwa dyawe dyo kugwa nedize

dizuwa dya makunt'ho yawe dihagihi,

36 Miye Zumbe neniwagombele want'hu wangu hata uneva wana masa

Neniwaonele mbazi wose wakunitegeleza na kunitimila

heza kuona wasiilwa ni ludole.

na kuona ivo waswesile wambizi.

37 Niho Zumbe Mnungu naawauze want'hu wakwe,

‘Ikuhi idya milungu yenyu mituhu midahi nomkaihuila?

38 Nomkaink'ha mavuta ye zint'hambiko zenyu

no kuink'ha divai ya malavo yenyu yo kunywa.

Neize elo imyambizeni

Neikombeke elo iwayokoleni.’ "

39 " ‘Miye nikedu ni miye Mnungu,

hakuli mnungu mtunhu ywe kindedi.

Nakoma naho nenk'hiza ugima, nalumiza naho nahonya,

naho hahali yeyose akudaha kunihiga kwa kiya hudamanya.

40 Nenula mkono wangu kwe mbingu naho nakelisa

kwaviya miye nekala mazuwa yose,

41 naho neninole sime yangu ikumwekamweka

na kuukimaila kunde na uwagilwa

neni walihize wank'hondo wangu

neni wasulumize wakuniihiya.

42 Misale yangu neitweke sakame yawe

naho sime yangu neiwakome,

neijabale sakame ya wachinjigwe na watahigwe

hata walumizwe na wavugailwa nawa banike.’ "

43 "Nyuwe want'hu wa si indeni na kinyemi hamwenga na want'hu wakwe,

kwaviya naalihize kwa wakuwakoma wadima wakwe.

naho naawalihize wank'hondo wakwe

na kudamanya mwiivano kwe isi na want'hu wakwe."

44 Musa na Yoshua mwana Nuni, wakemaga zimbuli zose zo ukemi, vileke Waizilaeli wose wazive.

45 Musa eze ibinde kuwagambila want'hu wa Izilaeli mbuli izi zose, 46 awagambaga, "Mkaulise, mse kujala zisigilizi izi zose huwenk'hani dielo, vileke muwahinize wana wenyu wazive na kuzitimila. 47 Kwaviya mbuli izi hizo mbuli du heziina dyodyose, uno ni ugima wenyu. Kwa kuzitimila nomwikalise lupisi lutali mwe isi iyo mkomboka mto Yolodani, mkaitahe."

48 Mwe dizuwa iidyo Zumbe amgambaga Musa, 49 "Ita kwe milima ya Abalimu kwe isi ya Moabu, kuhinga mzi wa Yeliko, kwela kwo mnima wa Nebo ukaisinye isi ya Kanaani huwenk'ha Waizilaeli inde yawe. 50 Noubanikile ukwo kwo mnima noukwele niyo wakelunga na want'hu wako, enga nduguyo Haluni ivo abanikile mwo mnima Holi, niyo akelunga kwa want'hu wakwe, 51 kwaviya nyose hamwandile wahuwilwa kwangu ha Waizilaeli ukwo Meliba kwa mazi, hagihi no mzi wa Kadeshi mwe dijangwa dya Sini, hamwanink'hile nt'hunyo yangu ha Waizilaeli. 52 Naivo isi iyo huwenk'ha Wazilaeli weye nouionele hale du, mna howiingile."