1 Musa awaduganyaga hamwenga want'hu wa Izilaeli niyo awagamba, "Want'hu wa Izilaeli, tegelezini imiko yose huwagambilani dielo. Mkehinize naho mkaulise kugamba mwaitimila. 2 Zumbe Mnungu aikaga Ndagano na suwe ukwo kwo Mnima wa Sinai. 3 Haikile Ndagano na wakale wetu du, mna ni hamwenga na suwe kiwagima ivi dielo. 4 Zumbe Mnungu alongaga na nyuwe enga mnt'hu akulonga na miyawe, naho mwamwivaga wenye mgati mwo moto kudya kwo mnima. 5 Lupisi ludya miye nandaga mwigala ulosi hagati ha nyuwe na Zumbe hawagambilani icho andaga akalonga kwaviya mwogohaga umoto, ivo hamwakwelaga kulaga kwo mnima."

"Zumbe niyo gamba, 6 ‘Ni miye Zumbe Mnungu nawayokolagani kulawa Misili uko mwandaga watumwa.’ "

7 " ‘Msekunda na milungu mituhu, mna miye du.’ "

8 " ‘Msekukedamanyila hili dikeigile na kint'hu chochose kikulanga kwe mbingu hegu ki hasi mwe isi hegu ki mwa mazi hasi ye isi. 9 Msekuvifikila madi hegu kuvivika, kwaviya miye ni miye Zumbe Mnungu mkunivika naho nna wivu hiikufinyiliza kuikwa hamwenga na milungu mituhu. Nawasulumiza wana kwo wavu wa watati zawe, mpaka cheleko cha katatu na cha kane va wadya wakuni iihia. 10 Mna nalagisa lukunde lwangu kwa maalufu ya vyeleko va wadya wakuniunga na kutimila na kudamanya sigilizi zangu.’ "

11 " ‘Msekutambula dizina dya Zumbe Mnungu haheina mbuli ya kindedi, kwaviya Zumbe Mnungu mkumvika haaleke kumgela mnt'hu mwa masa mnt'hu akuditambula dizina dyakwe haheina mbuli ya kindedi.’ "

12 " ‘Dikumbukileni Dizuwa dyo Kuhumula naho dinde dya kumvika Zumbe, enga ivo Zumbe Mnungu awasigiileni. 13 Nomdamanye zindima zenyu mwa mazuwa mtandatu, 14 mna dizuwa dya mfungate ni Dizuwa dya Kuhumula, mnt'hu yeyose mwenyu asekudamanya ndima, ikanda ni wana wenyu, hegu watumwa wenyu, mifugwa yenyu hegu wata kwiza we mwe isi yenyu. Watumwa wenyu nawo wahumule enga nyuwe. 15 Mkumbukile kugamba mwandaga watumwa umwo mwandaga Misili, naho kugamba Zumbe Mnungu awalavagani kwa udahi mkulu. Nivo vikuleka nawagambani mdikumbukile Dizuwa dyo Kuhumula.’ "

16 " ‘Umwive iso na nyokwe vileke wikazi wako unde wedi naho vileke wikalise mwe isi hukwink'ha miye Zumbe Mnungu.’ "

17 " ‘Use kukoma.’ "

18 " ‘Use kugenda na mvele hi ywako.’ "

19 " ‘Use kubawa.’ "

20 " ‘Use kulonga uwona wa udant'hi kwa miyawo.’ "

21 " ‘Use kumunk'hilwa ni mkaza mnt'hu, hegu nyumba yakwe hegu nk'honde hegu mtumwa ywakwe hegu ng'ombe yakwe hegu mp'hunda yakwe hegu kint'hu chochose hi chako.’ "

22 "Sigilizi izi nizo Zumbe awagambilagani nyuwe nyose aho awaduganyagani kudya kwo mnima. Umwo alongaga na nyuwe kwa izwi dya udahi mkulu mgati mwo moto na mwe divunde dititihale, awenk'hagani zisigilizi izi naho hiyo nt'huhu. Akajika aziwandikaga mwe vihant'hi viidi va maiwe niyo anink'ha."

23 "Umo mwevaga idiizwi dikalawa mwo lwiza mnima wandaga ukalimbija moto, mwanibasaga wakulu wose wa makabila na wadala vilongozi wenyu, 24 niyo mwagamba, ‘Zumbe Mnungu kakilagisa ung'azi no ukulu wakwe naho nekimwiva akalonga mgati mwo moto. Dielo kiona kugamba mnt'hu adaha kunda mgima hata uneva Mnungu analonga naye! 25 Mna haluse chaunga kibanikilei? Moto uno mkulu wadaha kuchoka pele naho nekibanike kina gendeela kudiiva diizwi dya Zumbe Mnungu. 26 Kwaviya niani mwa wose wata mwili andaga mgima aho eze eve Mnungu mta ugima akalonga mgati mwo moto? 27 Sogela hagihi weye niyo wategeleza kila kint'hu akulonga Zumbe Mnungu niyo wakigambila. Suwe nekive na kutimila.’ "

28 "Zumbe awevagani ivo mwalongaga na miye naye niyo anigamba, ‘Hiva zimbuli izo want'hu wakugambile, ayo walongile ni kindedi. 29 Uneva wandile na moyo enga uno mndani mwawe mazuwa yose, moyo wa kunivika na kutimila sigilizi zangu mazuwa yose, wikazi wawe wose hegu nounda wedi woho ne vyeleko vawe mazuwa yose! 30 Kawagambe wauye kwa mahema yawe. 31 Mna weye Musa, kikalanye aha, name nohwink'he zigilizi zangu zose ne miko yangu yose no usengelo wangu wose. Noukawahinize kugamba wakazidamanye kwe isi iyo huwenk'ha.’ "

32 "Want'hu wa Izilaeli mkaulise kugamba mwadamanya kiya msigiilwe ni Zumbe Mnungu. Msekuleka kutimila sigilizi zakwe zose. 33 Timileni sila zose za Zumbe Mnungu enga ivo awasigiileni vileke wikazi wenyu unde wedi naho mgendeele kwikala mwe isi mkuitaha."