1 "Naivo elo, muungeni Zumbe Mnungu naho mazuwa yose mtende viya akuwasigiilani. 2 Mkumbukile dielo kugamba wana wenyu hiwo woho waone na kuhina makanyo ya Zumbe Mnungu, na ukulu wakwe na udahi wakwe na ludole lwakwe, 3 ne mitu yakwe. Mwaonaga ayo amdamanyilaga seuta ywa Misili na want'hu wakwe wose. 4 Mwaonaga ivo Zumbe awatendaga watowani we Kimisili ne zifalasi zawe na magali yawe ya nk'hondo ivo awatubwikaga mwe bahali ya Shamu umwo wandaga waka watimilani, naivo awakomaga pele mpaka ivi dielo, 5 na ivo awadamanyileni kudya kwe dijangwa mpaka mbula aha, 6 naho ivo awatendile Dasani na Abilamu wana Eliyabi we dikabila dya Lubeni iivi wose wakakaula, umwo isanga yagubukaga niyo wahubugila hamwenga ne zimp'huga zawe na mahema yawe na wandima wawe na mifugwa yawe. 7 Ikindedi mwaonaga wenye ndima nk'hulu iyo Zumbe adamanye."

8 "Mzive na kuzitimila zisigilizi zose izi huwenk'hani dielo vileke mdahe komboka mto Yolodani na kuitaha isi idya nomwingile. 9 Vileke mdahe kwikala lupisi lutali mwe isi ina ulozo, iyo Zumbe aikaga kilapi kuwenk'ha wakale wenyu ne vyeleko vawe. 10 Isi mkugenda kuiguha vileke inde yenyu hiyo enga idya ya Misili uko mlawile. Uko mwahandaga mbeyu zenyu naho mwadamanyaga ndima nk'hulu ya komeela ink'honde. 11 Mna isi iyo mkugenda kuitaha ni isi ya milima na makolongo nayo yapata mazi ya fula kulawa kwo ulanga. 12 Zumbe Mnungu aikaulisa isi iyo mwaka wose."

13 "Ivo uneva mneva na kutimila kwa uhuilwa zisigilizi izi huwasigiilani dielo kugamba mmuunge Zumbe Mnungu na kudamanya yadya yakumwelela Mnungu kwa miyoyo yenyu yose na unt'hu wenyu wose, 14 niho nenigale fula mwe isi yenyu naho kwa lupisi lukuungwa, fula za vuli na za masika vileke mlozole nk'hande na mazi ya zabibu na mavuta. 15 Nenihoteze mani kwajili yo ludimo lwenyu, nanywe nomdye no kwiguta. 16 Mnde na wengele sema mioyo yenyu ikadant'hilizwa niyo mwahituka na kuivika na kuifunamizila mtwi hasi milungu mituhu. 17 Uneva mnatenda ivo Zumbe naawafiileni maya naho haalekele fula inye mwe isi, ivo hokunde na ulozo, nanywe nomsunguze kubanika mwe isi yedi akuwenk'hani Zumbe."

18 "Zimbuli izi huwagambilani mziike mwe mioyo yenyu na mwo unt'hu wenyu, zivaleni mwe mikono yenyu na mwe vihanga venyu kunda lukumbusa. 19 Mzihinize kwa wana wenyu. Zinde ni simulizi yenyu mkanda hakaya hegu mkanda kwe samo hegu mkagenda mwe sila na mkanda mhumula hegu mkanda mwadamanya ndima. 20 Yawandikeni mwe vifigwe ve milango yenyu na mwe zink'hili zenyu. 21 Ivo nyuwe na wana wenyu nomwikale kwa lupisi lutali mwe isi iyo Zumbe Mnungu aikaga kilapi kugamba naawenk'he wakale wenyu. Ivo nomwikale mwo lupisi lwose lukwiza."

22 "Kwaviya uneva mnatimila kwa wengele zisigilizi izi zose huwenk'hani dielo, Mmuunge Zumbe Mnungu ywenyu mkumvika, na kudamanya kila kint'hu mwe sila zakwe zose na kunda hamwenga naye. 23 Niho Zumbe naawaguluse want'hu we si nt'huhu aho mkwiza, nyuwe nomzitahe si nt'huhu nk'hulu wata ludole kujink'ha nyuwe. 24 Kila hant'hu aho nomhajate nahande henyu. Isi yenyu neyenele kukongela Kwa mwenye mzi ye dijangwa mpaka kwe milima ya Lebanoni na kulawa kwo mto Efulate mpaka usweelo wa zuwa we Bahali ya Meditelania. 25 Hohose nomnaite mwe isi idya, Zumbe Mnungu naawatende want'hu wamtunyeni enga ivo alongile naho hokunde na yeyose naawakindileni."

26 "Haluse dielo nomsagule mwe aya maidi, mvikilwe hegu mligitwe. 27 Uneva mnatimila zisigilizi za Zumbe Mnungu izi huwenk'hani ivi dielo nomvikilwe, 28 mna uneva homtimile zisigilizi za Zumbe Mnungu na kuleka isila ino huwasigiilani dielo, na kuvika milungu mituhu hemwiinati mwuivike nomligitwe . 29 Naho umwo Zumbe Mnungu akeza kuwegalani mwe isi iyo mkugenda kuikaila, nombilikize uvikilwa kulawa mwo mnima wa Gelizimu, maligito nayo kulawa mwo mnima Ebali. 30 Milima ino miidi ing'ambu yo mto Yolodani, usweelo wa zuwa we sila kuhinga ulailo wa zuwa mwe isi ya Wakanaani wakwikala mwe dikolongo dya mto Yolodani hagihi na mzi wa Giligali mnk'handa ye miti ya mialoni. 31 Kwaviya mwihagihi no komboka mto Yolodani niyo mwaitaha isi idya Zumbe Mnungu akuwenk'hani. Umwo mkeza kuitaha no kwikala umwo, 32 kauleni kugamba mwaziva na kuzitimila sigilizi zose huwasigiilani dielo."