1 Uno nuwo ulosi we Ndagano iyo Zumbe Mnungu amlagizaga Musa adamanye akanda hamwenga na Waizilaeli mwe isi ya Moabu, hamwenga na diya Zumbe Mnungu adamanye nawo mwo mnima Holebu.

2 Musa awetangaga hamwenga Waizilaeli wose niyo awagamba, "Mwaonaga nyuwe wenye ivo Zumbe amtendele seuta ywa Misili na vilongozi na wandima wakwe na isi yakwe yose. 3 Mwaonaga wenye makunt'ho makulu na vilagiso na vihungi na kweehela iyo atendaga Zumbe vileke amsulumize seuta ywa Misili na wandima wakwe na kila mnt'hu mwe isi. 4 Mna mpaka ivi haluse Zumbe hanati awenk'heni ubala wa kukombaganya hegu meso ya kuona na magutwi ya kwivila. 5 Kwa lupisi lwa miyaka milongo mine Zumbe awalongozaga kwe dijangwa, suke zenyu ne vilatu venyu mwavalaga havasakalaga. 6 Hamdile mkate, naho hamnywele divai hegu mp'hombe, vileke mmanye kugamba miye ni miye Zumbe Mnungu. 7 Aho mwize mbule hant'hu aha, seuta Sihoni ywa Heshiboni na seuta Ogu ywa Bashani wezaga kutowana na suwe, mna niyo chawahuma, 8 ivo chaiguhaga isi yawe na kuyapangila makabila ya Lubeni na Gadi ne nusu ye dikabila dya Manase inde ukipe wawe. 9 Ivo mwive na kutimila kwa uhuwilwa mbuli zose zi mwe Ndagano ino, vileke mnde na upati mwe zindima zenyu zose."

10 "Dielo nyuwe nyose mwakimala aha ho undiilo wa Zumbe Mnungu: Vilongozi wa makabila yenyu na wadala vilongozi na wakulu wa watowani na wagosi watuhu wose wa Izilaeli, 11 na wavele wenyu na wana wenyu na watakwiza wakwikala mwenyu awo wakuwatemelani nk'huni na kuwatekela mazi. 12 Mwi aha dielo vileke Zumbe Mnungu ywako aike Ndagano na nyuwe nanywe mwiizumile ivo ikuunga, 13 vileke Zumbe adahe kuwenk'ha ukindedi kugamba nyuwe mwi want'hu wakwe, naye niye Mnungu ywenyu enga ivo alaganaga na nyuwe na wakale wenyu Abulahamu na Isaka na Yakobo. 14 Hiyo nyuwe du awo huika nawo ndagano hamwenga na maligito yakwe, 15 mna ni yehe akimale na suwe ivi dielo aha ho undiilo wa Zumbe na yehe hehali hamwenga na suwe dielo."

16 "Nyuwe wenye mmanya ivo kikale mwe isi ya Misili na ivo chomboke mgati mwe isi izo mzombokele. 17 Mwaonaga mahili yawe yakuiihiza, milungu ya maziti na maiwe na masawa na zahabu izo wendile nazo. 18 Mmanye kugamba hahana mgosi hegu mvele, ndugu hegu kabila dyodyose mwa nyuwe uyo akumleka Zumbe Mnungu, na kuvika milungu mituhu. Mbuli iyo neinde enga izi dikukulisa na kunda mti una usungu. 19 Mnt'hu akwiva mbuli ikulongwa ye Ndagano ino asekuketunya mwenye akafanyanya kugamba naande ywedi hata anatimila kumunk'hwamunk'hwa kwakwe kwiihile. Ino neiwaze wose wedi na wahiile. 20 Zumbe Mnungu haamusile mnt'hu uyo, maya ya Zumbe yatendese nayampate na maligito yose yawandikwe mwe kitabu iki mpaka Zumbe ande kamkoma pele. 21 Zumbe naamtende ande mliganyizo mwa makabila yose ya Izilaeli, naamwigaile mank'huto hamwenga na maligito enga ivo yawandikwe mwe kitabu iki che Miko."

22 "Mwe vyeleko venyu vikwiza na watakwiza kulawa isi za hale nawaone makunt'ho na masulumizo ayo Zumbe ayegale kwenyu mwe isi. 23 Nk'honde nezinde zinyala naho Zumbe naakup'hule moto wa chola na munyu hakuna chochose nekihandigwe naho hakuna mani nayahote isi yenyu nainde enga Sodoma na Gomola na Adima na Seboimu aho andaga na maya yatendese. 24 Isi zose nezigambe, ‘Nii Zumbe Mnungu kaitendela ivi isi ino? Nii akanda na maya enga aya?’ 25 Naho nawahitule wakagamba, ‘Ni kwaviya want'hu wa Zumbe nawaleka indagano waikaga na Mnungu ywa wakale wawe aho awalavaga mwe isi ya Misili, 26 wagendaga kuvika milungu mituhu iyo hawaimanyaga kukongela aho nk'hongo iyo Zumbe awalemezaga wasekuivika. 27 Nivo vilekile maya ya Zumbe yakwelaga mwe isi yawe, niyo awegaila makunt'ho yose yawandikagwa mwe kitabu iki. 28 Zumbe awang'olaga kwa maya yatendese mwe isi yawe niyo awaduula mwe isi nt'huhu enga ivo vili dielo.’ "

29 "Mbuli za kinyele ni za Zumbe Mnungu ywetu, mna kakilagisa mwiko wakwe. Ivo suwe na welekwa wetu chaungwa kuwiva na kuutimila mazuwa yose."