1 "Mwo lupisi ludya Zumbe anigambaga, ‘Damanya vibesu viidi va maiwe enga viya va nk'hongo niyo wadamanya sanduku dya mbao dyo kuikila ivo vibesu, akajika wakwela uku kwangu kwo mnima, 2 neni wandike mwe vibesu ivo zimbuli zandaga mwe vibesu viya wavibogozolaga, niyo wavigela mwe Disanduku idyo.’ "

3 "Ivo elo nadamanyaga Disanduku dya mbao za msaji na kudamanya vibesu viidi va maiwe enga viya va nk'hongo, akajika nakwelaga navo kwo mnima. 4 Zumbe awandikaga naho zia zisigilizi mlongo mwe vibesu ivo enga ivo aziwandaikaga nk'hongo, ziya Zumbe awagambilagani kudya kwo mnima akalonga mgati mwo moto, mwe dizuwa diya chaduganaga. Akajika Zumbe anink'haga miye vibesu ivo. 5 Naseelaga kulawa kwo mnima niyo navigela vibesu ivo mwe Disanduku nadamanye, enga ivo Zumbe anisigiile, navo vimndani mwe Disanduku."

6 Waizilaeli watambaga kulawa kwa masima ya Wajakani kuita Mosela. Haluni abanikaga niyo amoselwa msanga uuko, Eliyazali umwanawe aguhaga hant'hu ha ise kunda mlavant'hambiko. 7 Kulawa aho watambaga kuita Gudigoda. Weze walawe Gudigoda watambaga mpaka Yotibasa isi yandaga na mazi mengi. 8 Lupisi ludya Zumbe awasagulaga want'hu we dikabila dya Lawi wenule Disanduku dye Ndagano dya Zumbe. Wakimale ha Zumbe wadamaye ndima ya Zumbe na kunda enga walavant'ambiko, no kuwavikila want'hu kwa zina dyakwe hata ivi dielo. 9 Ivo nivo vikuleka mwa Waizilaeli, Walawi hawapangilwe hant'hu mwe isi enga Waizilaeli watuhu ivo wapangilwe, Zumbe nuwo ukipe wawe enga ivo Zumbe Mnungu ivo alongaga.

10 Musa agendeelaga kulonga, "Nekalaga kwo mnima mazuwa milongo mine kilo na msi enga ivo natendaga hadya nk'hongo. Zumbe anitegelezaga naho azumilaga ase kuwakomani pele. 11 Zumbe niyo anigamba niite Ita hawalongoze want'hu vileke wakengile na kuitaha isi inde yawe, isi iyo agambaga naawenk'he wakale wawe."

12 "Haluse nyuwe want'hu wa Izilaili, icho Zumbe Mnungu akuunga kwenyu ni iki, aunga mmogohe, naho mwikale mkalongozwa naye mwe zimbuli zenyu zose, mmuunge na kumvika kwo moyo wenyu wose no unt'hu wenyu wose, 13 naho mzive na kuzitimila zisigilizi zakwe zose. Nawenk'hani sigilizi izi dielo vileke muuone uwedi wakwe. 14 Kauleni, zimbingu zikulanga vitendese ne isi na vose vimemile uumwo vose vakwe yehe Zumbe Mnungu. 15 Naho Zumbe awonelaga kinyemi na kuwaungisa wakale wenyu, niyo awasagula welekwa wawe kujink'ha want'hu watuhu wa si zose enga ivo vili dielo. 16 Naivo elo kukongela ivi haluse mmwive Zumbe Mnungu na kudamanya ayo akulonga, msekunda wank'hani naho. 17 Kwaviya Zumbe Mnungu ni Mnungu ywe milungu, na Zumbe ywa mazumbe, ni Mnungu mkulu, akutisa naho hee kwazagula hegu hakuhokela vint'hu vikwazaganya uwagilwa. 18 Awenk'ha uwagilwa wanank'hiwa na wabanikilwe ni walume zawe naho awaungisa watakwiza, awenk'ha suke na nk'hande. 19 Naivo elo mnde na lukunde na watakwiza kwaviya nyuwe nanywe mwandaga watakwiza kudya Misili. 20 Mwive na kutimila yadya akulonga Zumbe Mnungu na kumvika yehe ekedu. Mnde wahuwilwa kwakwe na kukelisa kwe dizina dyakwe du. 21 Mtogoleni yehe, uyo niye Mnungu nanywe mwaonaga wenye mbuli nk'hulu na za kutisa awadamanyileni. 22 Wakale wenyu waitaga Misili wakanda milongo mfungate, mna haluse Zumbe Mnungu kawagenyezani enga nt'hondo zo ulanga."