1 Musa awagambaga want'hu, "Mwive naho mdamanye miko huwahinizani nanywe nomnde wagima nomwingile na kuikaila isi iyo mkwink'higwa ni Zumbe Mnungu ywa wakale wenyu. 2 Msekongezela naho msekuhungula chochose mwe zisigilizi huwasigiilani. Mtimile sigilizi za Zumbe Mnungu. 3 Nyuwe wenye nomkeonela icho adamanyaga Zumbe Mnungu kudya Baali Peoli. Awakomaga wose wamvikaga Baali ywa Peoli, 4 mna wose wandaga wahuilwa kwa Zumbe Mnungu, wakei wagima mpaka ivi dielo."

5 "Kauleni! Hiwahinizani sigilizi zose, enga ivo Zumbe Mnungu anisigiile, kugamba mzive na kuzitimila kwe isi mkwiingila na kuitaha inde yenyu. 6 Mzitoze na kuzitimila, kwa uhuilwa nivo want'hu we si nt'huhu nawamanye ivo mwili na mizungu na umanyi umwo wakeva zisigilizi izi zose nawagambe, ‘Ikindedi want'hu awa ni isi nk'hulu, wana mizungu naho wabala.’ "

7 "Kwaviya haihali isi nk'hulu ina mnungu ehagihi nawo enga ivo eli Zumbe Mnungu ivo eli hagihi na suwe kila kikamlombeza wambizi. 8 Naho ni isi ihi nt'huhu nk'hulu ina sigilizi na miko enga izi niwahinizeni dielo? 9 Mna mkedime naho mdimise unt'hu wenyu sema mjale vint'hu mkeonele nyuwe wenye niyo mwazijala mwo wikazi wenyu. Vint'hu ivi vimanyike kwa wana wenyu na welekwa wenyu. 10 Kumbukileni ivo mwakimalaga ha Zumbe Mnungu kudya kwo mnima wa Sinai umwo anigambaga, ‘Waduganye want'hu ahangu wategeleze zimbuli zangu vileke wahine kuniva lupisi lwose wakekala mwe isi naho wawahinize wana wawe.’ "

11 "Wagambileni wana wenyu ivo mwakimalaga he diwandamo dyo mnima wagubikwe na mavunde matitu ya mosi na moto, walimbijaga mpaka kwe mbingu na vunde dititihale na ziza. 12 Naho Zumbe alongaga na nyuwe kulawa mwo moto. Mwevaga ulosi alongile mna hamwamuonaga ivo eli, mwevaga diizwi dyakwe du. 13 Awagambilagani kugamba mwaungwa kutimila Ndagano yakwe iyo aikile na nyuwe mwaungwa kuzizumila na kuzidamanya sigilizi mlongo izo aziwandika mwe vibesu viidi va maiwe. 14 Zumbe nakanigamba niwahinizeni sigilizi zose izo mkuungwa kuzitimila kwe isi mkugenda kuitaha kuikaila."

15 "Ivo indeni ne wengele kwaviya hammuone yehe mwenye ivo eli mwe dizuwa diya umwo Zumbe alongaga na nyuwe kulawa mgati gati mwo moto. 16 Msekudamanya wavu kwa kukedamanyila mahili yakeigile futa yoyose idamanywe enga mvele hegu mgosi 17 hegu enga kala dyodyose mwe isi hegu enga dege dikupululuka mwo ulanga, 18 hegu dikale enga magondo yakubulumuka mwe sanga naho hegu enga samaki yoyose imwa mazi. 19 Naho umwo mka kaula kulanga na kuzdiona dizuwa no mnenge ne zi nt'hondo na vose vi mwo ulanga, msekugezwa kwa kuvifikila madi na kuvivika. Kwaviya Zumbe Mnungu aviumbaga want'hu ivo vileke avipange kwa wose we hasi ye mbingu. 20 Mna nyuwe, Zumbe kawaguhani na kuwalavani mwe nunda ikulimmbija moto, kulawa Misili. Kawalavani vileke awatende kunda want'hu wakwe mwenye enga ivo mwili haluse. 21 Ni nyuwe mwalekaga Zumbe Mnungu akanifiila maya niyo akelisa kugamba henomboke mto Yolodani no kwingila mwe isi iyedi iyo Zumbe Mnungu akuwenk'hani inde yenyu. 22 Miye nenibanike mwe isi ino henomboke mto Yolodani mna nyuwe mwihagihi na komboka mto Yolodani no kuiguha isi iyo iyedi. 23 Mkaulise sema mnajale Indagano iyo Zumbe Mnungu aikile na nyuwe, Timileni sigilizi yakwe, mse kukedamanyila hili dyodyose. 24 Kwaviya Zumbe Mnungu ni moto ukoka pele, naho ni Mnungu mta wivu."

25 "Aho mkeza kunda na wana, na wezukulu naho niyo mwadalahala mwe isi. Naho uneva mnadamanya wavu kwa kukedamanyila hili dyodyose na kumdamanyila wiihi Zumbe Mnungu , niyo mwamtenda ande na maya. 26 Naitanga mbingu ne isi kunda waona wangu kwajili yenyu dielo, kugamba hamnivile, nomsunguze kusila pele mwe isi, homwikalise mwe isi mkomboka mto Yolodani iyo mwihagihi na kuitaha. Nomkomigwe pele. 27 Zumbe naawamwaganiseni mwe zi isi nt'huhu naho uko nomsigale wageke du. 28 Uko nomvike milungu idamanywe ni want'hu, milungu ya maziti na maiwe heiikudaha kukaula hegu kwiva heiikudya hagu kuhefya. 29 Mna mkanda uuko nomumzungule Zumbe Mnungu nanywe nommuone uneva nomumzungule kwa moyo wose no unt'hu wenyu wose. 30 Umwo mkeza kunda mwa makunt'ho, naho aya yose yakeza kuwalailani, niho nomwize muuye kwa Zumbe na kumwiva. 31 Kwaviya Zumbe Mnungu ywenyu ni mta mbazi. Haamwaseni na kuwakomani, naho haajale Indagano iyo mwenye aiikilaga kilapi na wakale wenyu."

32 "Keuzeni wenye, kukongela aho Mnungu aumbaga want'hu mwe isi mpaka ivi dielo uzeni mwe si zose kulawa mp'hembe imwenga mpaka mp'hembe nt'huhu, uneva mbuli ya kweheela enga ino yanda ilaile hegu kwivigwa? 33 Togoleni weyuko want'hu watuhu wevaga Mnungu akalonga kulawa mwo moto niyo wanda wakei wagima enga ivo indile kwenyu? 34 Hegu eyuko mnungu yeyose adahaga kuwaguha want'hu kulawa mwe want'hu wa isi nt'huhu na kuwatenda want'hu wakwe enga ivo Zumbe Mnungu ivo amitendeleni kudya Misili? Atendaga kwa udahi mkulu na ludole egalaga makunt'ho na nk'hondo naho adamanyaga mitu na va kweheela naho niyo adamanya mbuli zikutisa iivi mkakaula. 35 Zumbe kamilagisani aya mmanye ikindedi kugamba ni yehe ekedu niye Mnungu naho hahali mtuhu. 36 Awatendagani mwive diizwi dyakwe kulawa kwe mbingu vileke awahinizeni, naho amilagisagani moto wakwe ukukile aha he isi naho alongaga na nyuwe mgati mwo moto uwo. 37 Kwaviya awaungaga wakale wenyu na kuwasagula welekwa wawe na kwa udahi wakwe mkulu yehe mwenye nakawalava Misili. 38 Aho mwandaga mkeza awagulusaga kulongole kwenyu want'hu wa si nk'hulu naho zina udahi kujink'ha nyuwe na kuwegalani nyuwe mwe isi yawe inde yenyu enga ivo ili dielo. 39 Haluse kumbukileni naho mse kujala, Zumbe niye Mnungu kwe mbingu kulanga na mwe isi aha hasi, naho hahali Mnungu mtuhu. 40 Timileni sigilizi zakwe zose niwenk'hileni dielo niho nomwikale wikazi wedi nyuwe ne vyeleko venyu. Nanywe nomgendeele kwikalisa mwe isi mkwink'higwa ni Zumbe Mnungu kunda yenyu mazuwa yose."

41 Ivo Musa apagulaga mizi mitatu ulailo wa zuwa wo mto Yolodani, 42 iyo yeyse akomile mnt'hu akudaha kunyilikila uneva hamkomile kwa kumkambila. Adaha kunyilikila mwo mzi umwenga mwe mizi iyo miidi vileke akehonye ugima wakwe. 43 Mizi yenye yandanga ni ino, Bezeli kwe zint'hindiga ze dijangwa, kwajili ya kabila dya Lubeni, Lomosi ukwo Gileadi kwajili ya kabila dya Gadi na Galani uko Bashani kwajili ya kabila dya Manase.

44 Izi nizo zisigilizi izo Musa aiikaga mwa Waizilaeli. 45 Ino niyo Imiko na malagizo ayo Musa awagambile Waizilaeli umwo weze walawe uko Misili. 46 Naho waikaga nk'hambi kwe dikolongo dihagihi na Beti Peoli ulailo wa zuwa wa mto Yolodani kwe isi ya Sihoni seuta ywa Waamoli, uyo alongozaga Heshiboni naho niye atowagwa ni Musa na Waizilaeli wawahumaga umwo wandaga wakalawa Misili. 47 Waizilaeli waiguhaga isi yakwe ne isi ya seuta Ogu ywa Bashani na maseuta waidi wa Waamoli kwe nt'hendelo ya ulailo wa zuwa wa mto Yolodani. 48 Ivo Waizilaeli waiguhaga isi yose kulawa Aloeli mnk'handa mwe dikolongo dya Alinoni mpakaa kwo mnima wa Sioni iviyaiviya wetangwa Helimoni, 49 hamwenga ne dibwandasi dyose dyo mto Yolodani mpaka Kwa mwenye mzi ye Bahali yo Munyu.