1 "Izi nizo sigilizi ne miko izo mkuungwa mzive naho mzitimile mwe isi iyo Zumbe Mnungu ywa wakale wenyu akuwenk'hani inde yenyu mwo lupisi lwose nomwikale mwe isi. 2 Banangeni pele kila hant'hu, mwe milima mitali, mwe vigulu na mwa maziti, aho want'hu wa si nt'huhu wakuivika milungu yawe. 3 Moleni vilingo vawe vo kulavila nt'hambiko naho tuleni imikola yawe na kuyoka milungu yawe ya Ashela. Yokeni mahili ye milungu yawe mazina yawe yase kutambulwa naho kulawa hant'hu aho."

4 "Msekumvika Zumbe Mnungu ywenyu enga ivo want'hu we isi ino wakuvika milungu yawe. 5 Zumbe naasagule hant'hu mwe Izilaeli yose aho want'hu naweze wamvike ho undiilo wakwe. 6 Nomwigale aho malavo yo kokwa pele na malavo matuhu na imwenya ya mlongo na malavo ugambile noulave, na malavo uungile kulava mwenye na malavo ya welekwa wa nk'hongo we zing'ombe ne zimbuzi ne zingoto zenyu. 7 Nyuwe ne zimp'huga zenyu niho nomdye na kuvionela kinyemi vint'hu vedi mvipatile kwa kudamanya ndima aho hant'hu ha kumvika Zumbe Mnungu uyo awavikileni."

8 "Lupisi ulo lukwiza msekudamanya enga ivo nomkadamanya. Mpaka ivi kila mnt'hu avika enga ivo akuunga mwenye. 9 Kwaviya hamnati mbule kwe isi yo kuhumula iyo Zumbe Mnungu akuwenk'hani. 10 Mna mkeza kujink'ha mto Yolodani Zumbe naawatende mwiitahe isi na kwikala uumo. Naawamile na wank'hondo wenyu wose nanywe nomwikale kwa utodowazi. 11 Niho nomwigale kudya Zumbe asagule kuvikwa kila kint'hu icho asigiile, malavo yenyu yo kokwa na malavo matuhu na imwenga ya mlongo na malavo mkuunga wenye na kila kint'hu msagule kwa kuika kilapi kugamba nomumlavile Zumbe. 12 Nanywe nomnde na kinyemi aho hant'hu ha kumvika Zumbe Mnungu, nyuwe na wana wenyu wa kilume na wa kike, watumwa wenyu wa kilume na wa kike na Walawi we mwe mizi yenyu kwaviya hawana isi wapangilwe woho. 13 Mkaulise, msekulava malavo yenyu yo kokwa kila aho nomuone hamwelelani, 14 yalaveni du hant'hu hamwenga mwe isi iyo Zumbe Mnungu akuwenk'hani. Aho niho nomumlavile malavo yenyu yo kokwa pele na kudamanya yose niwasigiileni."

15 "Mna mwadaha mkachinjila nyama zenyu mwo mzi wowose uwo nomsagule niyo mwadya viligane na ivo Zumbe Mnungu awavikileni, yazumilwe na heye zumilwe. Want'hu wose wazumilwe kumvika Zumbe na hewezumilwe kumvika wadaha kudya inyama iyo enga ivo mkudya mp'hala na nt'wika. 16 Mna msekuidya isakame, itileni du mwe sanga enga mazi. 17 Use kuvidiila kwako hant'hu ha mlongo nk'hande zako, na divai na mavuta, na welekwa wa nk'hongo we zing'ombe zako na mbuzi ne zingoto, hegu kilapi chochose wiikile, hegu malavo yako uungile mwenye hegu malavo yako yo kwinulwa yo mkono wako. 18 Nyuwe na wana wenyu hamwenga na wandima wenyu na Walawi wakwikala mwe mizi yenyu, mdye malavo ayo aho hant'hu Mnungu asagule. Nanywe nomnde na kinyemi aho hant'hu kwa kila kint'hu udamanye. 19 Naho kauliseni msekuwajala Walawi mwo lupisi lwose nomwikale mwe isi yenyu."

20 "Umwo Zumbe Mnungu akeza kuyongezela isi yenyu enga ivo alongile nanywe nomdye nyama ivo nomuunge wenye. 21 Uneva hant'hu ahasagule Zumbe Mnungu hananda hale na weye, niho noudahe kuchinja ng'ombe hegu mbuzi hegu ngoto kulawa mwe difyo akwink'hile Zumbe enga ivo husigiile, weye nawe noudya mwe nyumba yako enga ivo hugambile. 22 Nomdye enga ivo mkudya nk'hulungu na kapala. Mnt'hu yeyose akanda kazumilwa hegu hazumilwe adaha kudya. 23 Mna mkaulise msekudya nyama na sakame yakwe, kwaviya sakame nuwo ugima. Elo msekudya ugima hamwenga na sakame. 24 Msekudya sakame, mna mwiitile mwe sanga enga mazi. 25 Msekudya sakame vileke mnde wahumi mwo wiakazi wenyu na wana wenyu mkadamanya yakumwelela Zumbe. 26 Mna malavo yako yakukile na vose wiikile kilapi kumlavila Zumbe nouka yalavile hant'hu aho Zumbe asagule kuvikwa. 27 Ukayalave malavo yako yo kokwa pele aho he kilingo cho kulavila malavo kwa Zumbe Mnungu ywako. Nyama ne sakame. Sakame ya nt'hambiko neitilwe he kilingo cho kulavila malavo kwa Zumbe Mnungu, mna inyama wadaha kuidya. 28 Kauliseni, naho mtimile aya huwasigiilani, mnatenda ivo nomvikilwe mwa mazuwa yo wikazi wenyu wose nyuwe ne veleko venyu vikwiza kwaviya nomnde mwadamanya yakumwelela Zumbe Mnungu."

29 "Zumbe Mnungu ywenyu naawakome want'hu we zi isi izo mkuzikump'hukila na kuzitaha na kuzikaila. Na kwikala mwe isi yawe, 30 Zumbe anajika kuwakoma pele want'hu we ziisi izo, mkaulise msekugeza kutimila enga ivo wakuvika milungu yawe kwaviya ivo neinde nk'hondo kwenyu. 31 Msekumvika Zumbe Mnungu enga ivo woho wavikaga milungu yawe, kwaviya mwo kuvika kwakwe watendaga mbuli zose zikumwiihiza Zumbe. Wawalavaga wana wawe enga malavo ya kokwa mwe vilingo vawe vo kulavila malavo."

32 "Kauliseni mdamanyeni kila kint'hu niwasigiileni, msekongezela hegu kuhungula chochose mwa ayo."