1 Musa niyo agendeela kulonga, "Hiwenk'hani msagule mwa aya, uvikilwa na maligito. Yose yakeza kulaiala kwenyu, umwo mkekala mwe ziisi uko Zumbe Mnungu naande kawamwaganisani, uko nomkumbukile usaguzi niwenk'hileni. 2 Uneva nyuwe ne vyeleko venyu nommuiye Zumbe Mnungu ywenyu kwa moyo wenyu wose na kwa unt'hu wenyu wose niyo mwazitegeleza na kuzitimila zisigilizi zakwe huwenk'hani ivi dielo, 3 niho Zumbe Mnungu naawavuzileni ayedi na kuwaonela mbazi na kuwaduganya naho kulawa mwe ziisi awamwaganisagani. 4 hata uneva mwigalwa hale kwe ziisi, Zumbe Mnungu ywenyu naawaduganyeni na kuwavuza, 5 vileke mwiikaile naho isi iyo awa lekelaga wakale wenyu. Yehe naawatende mpatise na kunda wengi kujink'ha wakale wenyu. 6 Zumbe Mnungu ywenyu naawatendeni nyuwe ne vyeleko venyu mnde na moyo wedi vileke mmuunge yehe kwa moyo wenyu wose na unt'hu wenyu wose vileke mgendeele kwikala mwe isi. 7 Zumbe Mnungu naaike maligito aya yose kwa wose wakuwaihiyani kwa wank'hondo wenyu na wose wawasulumizagani. 8 Nanywe nommwive na kumtimila kindedi ndedi Zumbe na kutoza sigilizi zakwe zose huwenk'hani dielo. 9 Zumbe Mnungu naawatende mnde wapati mwa kila kiya mkudamanya, nomnde na wana wengi na mifugwa mingi, naho nk'honde zenyu nezilave ulozo mwingi. Kwaviya naaunge naho mnde wapati enga viya aungile kwa wakale wenyu, 10 uneva mnaziva na kuzitimila kindedi ndedi sigilizi za Zumbe Mnungu na mahinizo yakwe yawandikwe mwe kitabu che zisigilizi na kumuihiya Zumbe Mnungu kwa moyo wose na kwa unt'hu wose."

11 "Sigilizi huwenk'hani dielo hizo ndala vitendese kwa kuzitimila hegu kuzikombaganya. 12 Hazihali kwe mbingu vikuleka muuze kugamba, ‘Niani naakwele kwe mbingu akigaile vileke kizive na kuzitimila? 13 Naho hazihali ng'ambu ye bahali vikuleka mgambe niani akuunga omboke mwe bahali akigaile vileke kitegeleze na kutimila? 14 Bule, mna zi hagihi na nyuwe mwe milomo yenyu na miyoyo yenyu vileke mzitimile.’ "

15 "Dielo ivi nawenk'hani msagule ayedi hegu yaihile mwo ugima hegu kubanika. 16 Uneva mnatimila sigilizi za Zumbe Mnungu ywenyu izo niwenk'hileni dielo, mnamuunga na kutimila sila zakwe na kutoza malagizo yakwe na usengelo, ivo nomnde wapati na kugenyela, Zumbe Mnungu naawavikile kwe isi mkugenda kuikaila. 17 Mna unalemela kumtegeleza na kuluvigwa kwa kuivika milungu mituhu na kuitimila, 18 nawagambilani dielo kugamba nomsunguze kusila pele. Homwikale kwa lupisi lutali mwe isi iyo mkomboka mto Yolodani na kugenda kwikala. 19 Nazitanga mbingu ne isi zione ayo yakuunga yalaile dielo kugamba hiwenk'hani kusagula ugima hegu file, uvikilwa hegu ligito. Ivo elo saguleni ugima nyuwe na welekwa wenyu vileke mgendeele kwikala mwe isi nagambile neniwenk'he wakale wenyu. 20 Muungeni Zumbe Mnungu, mwiveni na kunda hamwenga naye. Kwaviya kwa kudamanya ivo nomwikalise mwe isi nyuwe na welekwa wenyu, isi iyo Zumbe Mnungu aikaga kilapi kwa Abulahamu, Isaka na Yakobo kugamba naawenk'he."