1 Akajika wakulu we zink'holo za Gileadi welekwa wa Makili mwana Manase uyo mwana Yusufu, wawabasaga Musa na wakulu watuhu we zimp'huga za Waizilaeli. 2 Niyo wagamba, "Umwo Zumbe akusigiilaga uwapangile Waizilaeli isi kunda ukipe wawe kwa kuwatowela kula, iviyaiviya Zumbe akusigiilaga uwapange ukipe wa ndugu yetu Zelofehad kwa wanawe we kike. 3 Mna woho wanalombigwa ni waizilaeli wa makabila matuhu, ukipe we isi noulawe kwetu na kuwaitila want'hu we dikabila walombigwe, kwaivo ukipe wetu nowage. 4 Naho mwo mwe dizuwa dye kinyemi dye miaka milongo mishano umwo vint'hu va mnt'hu vatagagwa vikavuzwa kwo mwenye, ukipe we isi wa wanakike wa Zelofehadi neunde uguhigwa kudya kwedikabila idyo walombigwe na ivo kabila dyetu nedinde dyaza ukipe wakwe."

5 Ivo Musa awasigiilaga Waizilaeli viligane na ivo Zumbe asigiilaga akawagamba, "Icho wakulonga want'hu wo lukolo lwe dikabila dya Yusefu ni kindedi. 6 Naivi nivo akusigiila Zumbe mwa wanakike wa Selofehadi, wadaha kulombigwa ni mnt'hu yeyose wakumuunga, mna walombigwe mwe lukolo lwawe du. 7 Vileke ukipe wa Waizilaeli usekusamizwa mwe dikabila dituhu, kila Mwizilaeli naakaulise ukipe mwo lukolo lwakwe. 8 Mvele yeyose mta ukipe mwe dikabila dyodyose dya Izilaeli vaungwa alombigwe ni mnt'hu wo lukolo lwalwe vileke kila Mwizilaeli aguhe ukipe wa waise. 9 Ivo nahande hahana ukipe wowose nousamizwe kulawa mwo dikabila dimwenga kuita tuhu. Kila kabila dya waizilaeli nolutozese ukipe wawe."

10 Wanakike wa Selofehadi nawadamanya enga ivo Zumbe Mnungu amsigiile Musa. 11 Kwaivo Mala na Tiliza na Hogila na Milika na Noa nawalombigwa ni wana watati zawe wakulu zawe. 12 Nawalombigwa mwe lukolo lwa kabila dya Manase mwana ywa Yusufu, ukipe wawe nawo nousigale mwe dikabila dya tati yawe.

13 Iyo niyo imiko ne zisigilizi izo Zumbe awenk'hile Waizilaeli kwa sila ya Musa mwe zint'hindika za Moabu, mwe nt'hendelo ya kaidi yo mto Yolodani hagihi no mzi wa Yeliko.