1 Seuta yumwenga ywa Kanaani ywe isi ya Aladi naakekala Kusini ya Kanaani, eze eve kugamba Waizilaeli weza kwa sila ya Atalimu, agendaga kuwatowa na kuwataha wamwenga wawe. 2 Aaho Waizilaeli niyo wamwikila kilapi Zumbe wakagamba, "Uneva noukitende kiwahume want'hu awa, ivo nekiibanange pele mizi yawe kwajili yako." 3 Zumbe evaga kulombeza kwawe, niyo wawahuma Wakaanani na kuibananga pele mizi yawe. Kwa ivo hant'hu aho nahetangwa Holimahi, nuko kugamba kubanangwa pele.

4 Waizilaeli niyo watamba kulawa mnima Holi na kombokela sila ikuita bahali ya Shamu vileke waizunguluke isi ya Edomu. Mna mwe sila want'hu nawafa chevu kwaviya ya idya sila. 5 Ivo niyo wakonga kumlabila Mnungu hamwenga na Musa wakagamba, "Nii mkilava Misili kize kibanikile uku kwe dijangwa? Umu hamna nk'hande na mazi, suwe naswe kisokezwa ni nk'hande ino iihile." 6 Aho Zumbe Mnungu niyo egala nyoka zina sumu mwa want'hu, na kuwakoma hata Waizilaeli wengi niyo wabanika. 7 Ivo want'hu wamwitilaga Musa, wakamgamba, "Kidamanya wavu kwa kumlabila Zumbe Mnungu hamwenga na weye. Mlombeze Mnungu akiusile nyoka izi." Ivo Musa niyo awalombezelaga want'hu. 8 Ivo Zumbe Mnungu niyo amgamba Musa, "Damanya nyoka ya shaba uitungike mwe mp'handa, ivo mnt'hu yeyose naalumwe ni nyoka anaisinya inyoka iyo ye shaba naahone." 9 Ivo, Musa niyo adamanya nyoka ya shaba, na kuitungika mnanga mwe mp'handa. Kila mnt'hu alumigwe ni nyoka eze aikaule nyoka iyo ye shaba, ahonaga.

10 Waizilaeli nawagendeela na nt'hambo yawe, na kuika nk'hambi uko Obosi. 11 Kulawa uko watambaga mpaka Iyebalimu, mwe dijangwa nt'hendelo ya ulailo wa zuwa mwa Moabu. 12 Kulawa uko nawaita na kutoa nk'hambi yawe mwe kolongo dya Zeladi. 13 Kulawa uko waitaga na kutoa nk'hambi kaskazini ya mto Alononi, kwe dijangwa ukubula mwe isi ya Waamoli. Mto Aloni nounda mhaka wa Wamoabu na Waamoli. 14 Kwa ivo, iwandikwa mwe vitabu va nk'hondo za Zumbe. "Mzi wa Wahebu mwe isi ya Sufa na kolongo dya Anon, 15 na seleza za mwe kolongo zikubula kwo mzi ukwitangwa Ali, na kuhinga kwe mihaka ya Moabu."

16 Kulawa uko Waizilaeli waitaga mpaka Beeli ni sima idyo Zumbe amgambaga Musa, "Waduganyeni want'hu hamwenga, miye name neniwenk'he mazi." 17 Aaho Waizilaeli nawakema wila uno.

"Wee sima tumbuka mazi

Dikemeleni wila

18 Sima disimbigwe ni wakulu

Difukulwe ni vilogozi wa want'hu

Kwa nk'home zawe zo ukulu

Na kwa ngoda zawe."

Watambaga kulawa Matana. 19 Naho wakalawe aho wagendaga mpaka Nahalieli. Weze walawe Nahalieli wagendaga mpaka Bamosi, 20 naho kulawa Bamosi wagendaga mpaka mwe dikolongo dikwingila mwe isi ya Moabu, kwo lunenengwa lwo Mnima Pisiga, kuhinga kwe dijangwa.

21 Waizilaeli wawatumaga wegala ulosi kwa seuta Sihoni ywa Waamoli wakamgamba, 22 "Kilekele chomboke mwe isi yako, hekipaguke na kwingila mwe migunda hegu mwe migunda ya mizabibu, hegu hekinywe mazi ye visima venyu, nechomboke du mwe sila nk'hulu ya seuta mpaka aho nechomboke mwe isi yako." 23 Mna seuta Sihoni hawalekele want'hu wa Izilaeli womboke mwe isi yakwe. Aduganyaga watowani we isi yakwe wata ludole, niyo akutowana na waizilaeli kwe dijangwa. 24 Mna Waizilaeli wawakomaga wank'hondo wawe wengi kwe nk'hondo, na kuitaha isi yawe kukongela mto Alunoni mpaka mto Yaboki, uwo wandagaa mhaka wa Wamoni nawo wandaga uzengelwa gomelwa. 25 Waizilaeli waitahaga mizi yose woho nawo niyo waitozeleza mizi ya Waamoli hamwenga no mzi wa Heshiboni na kaya zakwe. 26 Heshiboni nounda mzi wa Sihoni seuta ywa Waamoli, uyo aho nk'hongo atowanaga na seuta ywa Moabu na kuitaha isi yakwe yose mpaka mto Aloni. 27 Nivo vikuleka umwo wakanda hawanati kwiza Waizilaeli wakale wakemaga .

"Soni Heshiboni na kuuzenga vituhu umzi

Mzi wa Sihoni uzengwe naho.

28 Kwaviya umoto noulawa Heshiboni,

Watoani wa Sihoni wagulukizaga enga moto

Waubanangaga mzi wa Ali wa Moabu

Na kuvoka pele vigulu va Alimoni ya kukenya, no kuibananga milima ya Aloni.

29 Hangi nyuwe wenye want'hu wa Moabu!

Nyuwe mkumvika Kemoshi mbanangwa pele

Kemoshi kawatenda wanakilume wande wakimbizi

Wana kike nawo watahigwa ni seuta ywa Waamoli.

30 Mna haluse welekwa wawe wabanangwa pele

Kukongela Heshiboni mpaka Diboni

Kulawa Nasimi mpaka Nofa hagihi na Medeba."

31 Ivo, Waizilaeli niyo wekala mwe isi iyo ya Waamoli. 32 Musa eze awatume wapelembi kwo mzi wa Yazeli, Waizilaeli wautahaga na kuzunguluka zikaya zawe na kuwagulusa Waamoli aho wekalaga. 33 Waizilaeli niyo wahituka na kuhinga nt'hendelo ya mkoma mahanya na kutimila sila ikuita Bashani. Mna Seuta Ogu ywa Bashani na watowani wakwe wose wawabasaga Waizilaeli vileke wakatowane uko Edulei. 34 Mna Zumbe niyo amgamba Musa, "Usekumogoha, kwaviya hikwink'ha uhumi mwawe hamwenga na watoani wakwe wose na isi yakwe yose. Noumtende enga ivo umtendile Sihoni seuta ywa Waamoli, uyo alongozaga Heshiboni." 35 Ivo, Waizilaeli wamkomaga Ogu na wanawe na want'hu wakwe wose haheina kumleka mnt'hu yeyose akanda mgima na kuiguha isi yawe.