1 Zuwa dimwenga wanakike wa Zelofehadi wakwitangwa Mala na Noa na Milika na Tiliza wambasaga Musa. Mwana Hefeli andaga mwa Zelofehadi andaga mwana Gileadi andaga mwana ywa Makili andaga mwana Manase uyo mwana Yusufu. 2 Wavele awo wakimalaga ha Musa na mlotezi Eliyazali na ha vilongozi na ha want'hu wose he nk'hili ye Dihema Dikukile niyo wagamba, 3 "Tati yetu abanikilaga kwe dijangwa naho hakelungaga na wadya wamtimilaga Kola awo wamhigaga Zumbe. Yehe abanikaga kwajili yo wavu wakwe mwenye, mna handaga na mwana yeyose ywa kilume. 4 Nii dizina dya tati yetu dikauswa mwo lukolo lwakwe, kwaviya du hana wana kilume? Kink'heni naswe usangilo wetu hamwenga na watati zetu na wanduguze dya tate."

5 Ivo Musa egala kwa Zumbe ukulabila kwawe. 6 Zumbe niyo amgamba Musa, 7 "Icho wakulonga wanakike awo wa Selofehadi ni kindedi, wenk'heni usangilo wawe kunda ukipe hamwenga na watati zawe wanduguze dya tati yawe. 8 Niyo uwagamba Waizilaeli kugamba mnt'hu yeyose anabanika haheina kweleka mwana kilume, ukipe wakwe neenk'higwe mwana kike ywakwe. 9 Uneva hana mwana kike, ukipe uwo uwenk'hwe wanduguze wa kilume. 10 Naho uneva hana wanduguze wa kilume, ukipe wakwe uwenk'he waise wakulu na waise wadodo. 11 Naho uneva ise naye hana wanduguze, ukipe wakwe wenk'higwe wanduguze wa hagihi mwo lukolo ulo. Ino neinde sigilizi mwa want'hu wa Izilaeli enga ivo Zumbe asigiile."

12 Zumbe amgambaga Musa, "Kwela kwo mnima wa Ibalimu uikaule isi iyo niwenk'hile Waizilaeli. 13 Unajika kukiona isi, weye nawe noubanike enga nduguyo Haluni ivo abanike. 14 Weye noubanike kwaviya nyose hamzumile sigilizi zangu kudya kwe dijangwa dya Sini umwo want'hu wose weze wanilabiile kudya Meliba, hamlekile udahi wangu ukukile ulaile hawe aho weze waunge mazi." Meliba ni nc'hoko ya mazi ya kadeshi mwe dijangwa dya Sini.

15 Musa naye niyo amgamba Zumbe, 16 "Zumbe Mnungu, weye Mnungu ywe viumbwa vose, nakulombeza umsagule mnt'hu mtuhu ywo kuwalongoza want'hu awa, 17 uyo naawalongoele na kuwalongoza mwe zindima zawe zose vileke Waizilaeli wasekunda enga ngoto heziina mdimi."

18 Zumbe niyo amgamba Musa, "Mguhe Yoshua mwana Nuni, mnt'hu mta Muye wedi, niyo wamgeleka mikono mwo mtwi wakwe, 19 na kumkimalisa ha mlava nt'hambiko Eliyazali na want'hu wose, umwink'he undima uwo want'hu wose wakaona. 20 Mwink'he ludodo lwo udahi wako vileke want'hu wose wa Izilaeli wamwive. 21 Yehe naamtegeleze Eliyazali malavant'hambiko, uyo naayamanye yadya yakunelela kwa kukaula Ulimu na Thumimu. Kwa sila ino Eliyazali naamlongoze Yoshua no mdugano wose wa Waizilaeli mwe zimbuli zawe zose." 22 Musa atendaga enga ivo Zumbe amsigiile. Amguhaga Yoshua na kumkimalisa ha mlava nt'hambiko Eliyazali no mdugano wose wa Izilaeli. 23 Niyo amgeleka mikono mwo mtwi na kumwink'ha udahi wa kwikaila want'hu enga ivo asigiilwe ni Zumbe.