1 Zuwa dya nk'hongo dyo mwezi wa mfungate, nomdugane mnivike. Msekudamanya ndima. Mwe dizuwa idyo magunda nayatoigwe. 2 Nomlave malavo ya kokwa, mhemp'he wedi wa kumwelela Zumbe. Njeku imwenga, na ndolome imwenga, na wanangoto mfungate wa mwaka umwenga heweiina lema. 3 Nomlave naho malavo yakwe ya unga wedi uhanganywe na mavuta. Kilo nt'hantu kwa kila njeku, na kilo mbili kwa kila ndolome, 4 na kilo imwenga kwa kila mwana ngoto. 5 Naho nomlave fulata imwenga kunda malavo ya kuusa wavu vileke muwavuze want'hu kwa Zumbe. 6 Nomlave vint'hu ivi, haheina kuleka malavo yo kokwa kwe dizuwa dya nk'hongo dyo mwezi na malavo ya nk'hande ya mazuwa yose na malavo ya divai. Malavo aya ye nk'hande ni mhemp'he ukumwelela Zumbe.

7 Mwe dizuwa dya mlongo dyo mwezi wa mfungate nomdugane mnivike. Zuwa idyo mwaungwa mfunge naho msekudamanya ndima. 8 Nomumlavile Zumbe Mnungu malavo ya kokwa yana mhemp'he wedi ukumwelela Zumbe, na njeku imwenga na ndolome imwenga, na wana ngoto mfungate wa mwaka umwenga heweina lema. 9 Mlave malavo ya unga udinyigwe uhanganywe na mavuta na kilo nt'hatu za unga hamwenga kwa njeku na kilo mbili hamwenga ne ndolome iyo, 10 na kilo imwenga kwa kila mwate. 11 Nomlave fulata imwenga kunda malavo ya kuusa wavu haheina kuleka malavo yo kuwavuza want'hu kwa Zumbe na malavo ya kokwa pele ya mazuwa yose na malavo ya nk'hande hamwenga na malavo ya kunywa.

12 Mwe dizuwa dya mlongo na shano wo mwezi wa mfungate, nomdugane mniuvike. Homdamanye ndima zuwa idyo. Nomdamanye wila kwaajili ya Mungu kwa mazuwa mfungate. 13 Nomlave malavo ya kokwa yana mhemp'he wedi ukumwelela Zumbe, njeku mlongo na nt'hatu na ndolome mbili, na ndolome mlongo na wane wo mwaka umwenga. Zose heziina lema. 14 Malavo ya nk'hande nayahanganywe na unga wedi uhanganywe na mavuta. Kilo nt'hatu kwa kila njeku, na kilo mbili kwa kila ndolome, 15 na kilo imwenga kwa kila ndolome. 16 Naho nomlave fulata imwenga kunda malavo ya kuusa wavu, haheina kuleka malavo ya kokwa hamwenga na malavo yakwe ya unga na malavo yo kunywa.

17 Zuwa dya kaidi nomlave njeku mlongo na mbili na ndolome mbili na wana ngoto mlongo na wane wo mwaka umwenga heweiina lema. 18 Nomlave naho malavo ya unga na malavo yo kunywa hamwenga na njeku na ndolome na wadya wanangoto wa mwaka umwenga viligane no uwazilo wawe enga ivo visigiilwe. 19 Naho nomlave fulata imwenga kunda malavo ya kuusa wavu, haheina kuleka malavo ya kokwa ya mazuwa yose hamwenga na malavo yakwe yo unga na malavo yo kunywa. 20 Zuwa dya katatu nomlave njeku mlongo na imwenga, ndolome mbili na mwana ngoto mlongo na kane wo mwaka umwenga heziina lema. 21 Nomzilave hamwenga na malavo yakwe ya unga na malavo yo kunywa kwa ng'ombe izo ne zindolome izo na wana ngoto viligane no uwazilo wawe enga ivo visigiilwe. 22 Naho nomlave fulata imwenga kunda malavo ya kuusa wavu, mkongezela na malavo ya kokwa ya mazuwa yose hamwenga na malavo yakwe ya unga na malavo ya kunywa. 23 Zuwa dya kane nomlave njeku mlongo na ndolome mbili, na wana ngoto mlongo na kane wa mwaka umwenga heeina lema viligane no uwazilo wawe enga ivo visigiilwe. 24 Nomlave naho malavo ya unga na malavo yo kunywa hamwenga na njeku na ndolome na wana ngoto wa mwaka umwenga viligane na uwazilo wawe enga ivo visigiilwe. 25 Naho nomlave fulata imwenga kunda malavo ya kuusa wavu, haheina kuleka malavo ya kokwa ya mazuwa yose hamwenga na malavo yakwe ya unga na malavo ya kunywa. 26 Zuwa dya shano, nomlave njeku kenda na ngoto mbili na ndolome mlongo na nne za mwaka umwenga heziina lema. 27 Naho nomlave malavo ya unga na malavo yo kunywa hamwenga na njeku na ndolome na wana ngoto viligane no uwazilo wawe enga ivo visigiilwe. 28 Naho nomlave fulata imwenga kunda malavo ya kuusa wavu, haheinan kuleka na malavo ya kokwa ya mazuwa yose hamwenga na malavo yakwe ya unga na malavo ya kunywa. 29 Zuwa dya mtandatu nomlave njeku mnane na ndolome mbili na wanangoto wa mwaka umwenga heweina lema. 30 Nomlave naho malavo ya unga na malavo yo kunywa hamwenga na njeku na ndolome na wanangoto wa mwaka umwenga viligane no uwazilo wawe enga ivo visigiilwe. 31 Naho nomlave fulata imwenga kunda malavo ya kuusa wavu, haheina kuleka malavo ya kokwa ya mazuwa yose hamwenga na malavo yakwe ya unga na malavo ya kunywa. 32 Zuwa dya mfungate nomlave njeku mfungate na ndolome mbili na wanangoto mlongo na wane wa mwaka umwenga heweina lema. 33 Nomlave malavo ya unga na malavo yo kunywa hamwenga na jeku na ndolome na wana ngoto viligane no uwazilo wawe, enga ivo visigiilwe, 34 naho nomlave fulata imwenga kunda malavo ya kuusa wavu, haheina kuleka malavo yenyu yo kokwa ya kila zuwa vikanda ni hamwenga na malavo ya nk'hande na malavo yo kunywa. 35 Mwe dizuwa dya mnane mdugane mnivike miye Zumbe. Msekudamanya ndima yoyose. 36 Nomlave malavo ya kokwa yana mhemp'he wedi ukunelela miye, njeku imwenga na ndolome imwenga, na wana ngoto mfungate wo mwaka umwenga. Wose heweena lema. 37 Nomlave naho malavo ya nk'hande na malavo yo kunywa hamwenga ne njeku ne zindolome viligane na uwazilo wawe enga ivo visigiilwe. 38 Naho nomlave fulata imwenga kunda malavo ya kuusa wavu, haheina kuleka malavo yenyu yo kokwa ya kila zuwa vikanda ni hamwenga na malavo ya nk'hande na malavo yo kunywa. 39 Izi nizo zisigilizi za malavo ya kila mazuwa ya kinyemi enga ivo msigiilwe. nomlave malavo yo kokwa na malavo ye nk'hande na malavo ya kuvuza want'hu kwa Zumbe. Nomumlavile Zumbe mwo lupisi lwa kinyemi chenyu lwiikigwe. Haheina kuleka malavo matuhu, na malavo yo kunywa ayo mkumlavila Zumbe malavo ya kukint'hiza vilapi na malavo kwa kuunga wenye.

40 Ivo, Musa niyo awagambila Waizilaeli kila kint'hu enga ivo asigiilwe ni Zumbe.