1 Haluse Balaam aonaga kugamba vimwelela Zumbe kuwavikila Waizilaeli, kwaivo hagendile kutoa mnamulo naho enga ivo atendile aho nk'hongo, vituhu vakwe ahitukilaga akakaula kwe dijangwa. 2 Balaam eze enule meso yakwe awaonaga Waizilaeli watoa nk'hambi kila kabila hant'hu hakwe, Niyo Muye ywa Mnungu amwiizilaga, 3 yehe nae niyo alonga uwona uno.

Ulosi wangu miye Balamu mwana Beoli

Ulosi wa mnt'hu akuona vedi.

4 Uyo akuwiva ulosi wa Mnungu

akuona uwona wa Mnungu mta Udahi.

Kafika madi na kafunamiza mtwi hasi uku akakaula,

maona kulawa kwa Mnungu mta Udahi.

5 Weye Yakobo mahema yako yatendesa uwedi.

Weye Izilaeli aho ukwikala hedi!

6 Amahema ayo ni enga makolongo yakuseela mazi.

Enga kiunga mnk'handa mwo mto.

Enga maziti yakwitangwa shubili yahandigwe ni Zumbe.

Enga maziti yakwitangwa mielezi mnk'handa mwa mazi.

7 Mazi nayamwaguke mwa mabiga yawe,

mbeyu zawe nezipate mazi mengi,

Seuta ywawe naande mkulu kujink'ha Agagi.

Naho useuta wawe noukulise.

8 Mnungu nakawaguha kulawa Misili,

yehe awatoanila kwa ludole enga mbogo.

Naabanange si za wank'hondo wenyu,

naatuletule mavuha yawe,

na kuwajunga na misale yawe.

9 Naabandagale na kunyata enga simba.

Niani naageze kumwinula?

Naavikilwe yeyose naawavikile Waizilaeli

naho naaligitwe akuunga awaligite Waizilaeli.

10 Balaki niyo amfiila maya Balaamu, na kukunja mikono kwa maya akamgamba, "Nehikwitanga uwaligite wank'hondo wangu, mna nk'hanana izi nt'hatu kuwavikila! 11 Haluse! Keitile. Nekilagana hwink'he nt'hunyo nyingi, mna Zumbe haungile upate zint'hunyo izo."

12 Balamu niyo amhitula Balaki, "Togola! Wakumbukila ivo niwagambile wegala ulosi awo wawasigile kwangu, 13 hata uneva unanink'ha nyumba yakwe imemile masawa na zahabu, miye henidahe kudamanya wavu kwa Zumbe, kwa kudamanya mbuli yeyose yedi hegu iihile kwa kuunga miye mwenye? Nehigamba, icho naalonge Zumbe nicho nenilonge."

14 "Haluse nauya kwa want'hu wangu, goja hugambile mbuli izo want'hu awo nawawadamanyile want'hu wako mazuwa yakwiza." 15 Ivo, Balaamu niyo alonga ulosi uno.

"Ulosi wangu miye Balaamu mwana Beoli,

Ulosi wa mnt'hu agubulwe meso.

16 Ulosi wa mnt'hu evile ulosi wa Mnungu,

na mnt'hu amanyize umanyi wa Mnungu mta udahi,

mnt'hu akuona uwona wa Mnungu mta Udahi.

Akutambala hasi kifulifuli na kufunamiza mtwi wakwe hasi na meso yakwe yagubulwe.

17 Namuona mna hiyo ivi haluse,

namkaula mna hiyo aha hagihi

Nt'hondo neilaile kwa welekwa wa Yakobo.

Useuta noulaile kwa Waizilaeli,

kwa nk'home yakwe nouwatowe vilongozi wa Moabu

neiwabanange pele welekwa wose wa Seti.

18 Edomu neitahigwe.

Seili wandaga wank'hondo wakwe nawande ugoli wakwe

Izilaeli neigendeele kunda mdahi mkulu.

19 Kilongozi naalawe kwa Yakobo,

naye naawabanange wasigale kwo mzi."

20 Niyo Balaamu awakaula Wamaleki, nakulava ulosi uno.

"Waamaleki ni isi ina udahi kujink'ha isi zose.

Mna kwo uheelo wakwe neibanangwe pele."

21 Balaamu awaonaga Wakeni niyo akema ivi,

"Aho mkwikala hana utondowazi,

Hatondowala enga sasa mnanga mwo luwe.

22 Mna nyuwe Wakeni nombanangwe.

Aho nomtahigwe ni Waashulu"

23 Naho Balaamu alongaga ulosi uno,

"Togola! Niani naahone uneva Zumbe anadamanya ayo?

24 Mna meli nezibule kulawa Kitimu.

Nawaitowe Asilia na Ebeli,

mna woho nawo nawabanike pele."

25 Ivo, Balaamu enukaga, no kukeuiya kaya, Balaki naye niyo akeitila.