1 Aya nayo Zumbe Mnungu awasigiilaga Musa na Haluni. 2 "Waizilaeli waike nk'hambi zawe, kila kabila nedikale aho ili bendela yakwe ne zimp'huga zawe. Nediike nk'hambi yakwe kudizunguluka Dihema Dikukile.

3 "Wakuunga waike nk'hambi kwe nt'hendelo yo ulailo wa zuwa nawande mwe difyo dya want'hu wa kiwalo cha Yuda, kilongozi ywawe naande Nashoni mwana Aminadabu, 4 Uwazilo we difyo dyakwe wandaga alufu milongo mfungate na mine na milongo mtandatu. 74,600

5 "Dikabila dya Isakali nedinde dya kaidi mwo kuika ink'hambi mwa want'hu wa Yuda, kilongozi ywawe naande Nesaneli mwana Suali, 6 Uwazilo we difyo dyakwe wandaga alufu milongo mishano na mine na magana mane. 54,400 7 Akajika kilongozi ywe dikabila dya Zabuloni naande Eliyabi mwana Heloni. 8 Uwazilo we difyo dyakwe nounde want'hu alufu milongo mishano na mfungate na magana mane. 57,400 9 Uwazilo mwe nk'hambi ya Yuda wandaga want'hu alufu gana na milongo mnane na mtandatu na magana mane. Awo nawo nawalongole kila wakakonga int'hambo. 186,400

10 "Mwe nt'hendelo ya Kusini, wadya wandile hasi ye bendela ye difyo dya Lubeni viligane ne difyo dyawe kilongozi ywawe naande Elizuli mwana Shedeuli, 11 uwazilo wa want'hu we difyo dyakwe nawande want'hu alufu milongo mine na mtandatu na magana mashano. 46,500 12 Akajika want'hu wa kabila dya Simioni nawatimile mwo kuika nk'hambi hagihi na Lubeni wakalongozwa ni Shelumieli mwana Sulishadai, 13 uwazilo wawe nawande want'hu milongo magana mashano na kenda na magana matatu. 14 Naho neditimile ni dikabila dya Gadi, dikalongozwa ni Eliyasafu mwana Deueli, 15 naho uwazilo wawe nawande want'hu alufu milongo mine na mishano na magana mtandatu na milongo mishano. 45,650 16 Uwazilo wa wose mwe nk'hambi ya Luben ni want'hu alufu gana dimwenga na milongo mishano na umwenga na magana mane na milongo mishano. 151,450 Awo nawo nawatimile kila wakakonga int'hambo.

17 "Niho difyo dya want'hu we dikabila dya Walawi dikanda hagati ye zink'hambi zose kila naho wakanda wenula Idihema Idyo Dikukile nawakonge int'hambo, kila fyo neditambe viligane na hant'hu hakwe aho ili ibendela yakwe.

18 "Kwe nt'hendelo ya Usweelo wa zuwa, wadya we hasi ye bendela ye nk'hambi ya Ifulaimu nawaike nk'hambi viligane na mafyo yawe. Kilongozi ywawe naande ni Elishama mwana Amihudi, 19 uwazilo wa want'hu we difyo dyawe nawande want'hu alufu milongo mine na magana mashano. 40,500 20 Dikalawa idifyo dya Waifulaimu neditimile difyo dye dikabila dya Manase dikalongozwa ni Gamalieli mwana Pedasuli, 21 Uwazilo wawe nawande want'hu alufu milongo mitatu na miidi na magana maidi. 32,200 22 Akajika ni dikabila dya Benjamini dikalongozwa ni Abidani mwana Gidioni, 23 uwazilo wawe nawande want'hu alufu milongo mitatu na mishano na magana mane. 35,400 24 Uwazilo wa want'hu mwe nk'hambi ya Efulaimu wandaga want'hu alufu gana na mnane na gana dimwenga. 108,100. Difyo idi dya Ifulaimu nedinde dya katatu kila int'hambo ikakonga.

25 "Mafyo ya wadya we bendela ya Dani nawaike nk'hambi kwe nt'hendelo ya kasikazi, wakalongozwa ni Ahizeli mwana Amishadai, 26 uwazilo wawe nawande want'hu alufu milongo mtandatu na maidi na magana mfungate. 62,700 27 Want'hu we dikabila dya Asheli nawo watimilaga wakalawa awo wakalongozwa ni Pagieli mwana Okilani, 28 uwazilo wawe wandaga want'hu alufu milongo mine na imwenga na magana mashano. 41,500

29 "Akajika naho watimilaga want'hu we diakabila dya Nafutali wakalongozwa ni Ahila mwana Enani, 30 uwazilo wawe wandaga want'hu alufu milongo mishano na nt'hatu na magana mane. 53,400 31 Uwazilo wa want'hu we nk'hambi ya Dani wandaga alufu milongo gana na milongo mishano na mfungate na magana mtandatu. 157,600. Difyo idi dya Dani nidyo nedizigiile mwo utafi viligane ne zibendela zawe."

32 Awo nawo Waizilaeli wawazigwa viligane ne zink'holo zawe na mwe zink'hambi na mafyo yawe. Wose kwa hamwenga wandaga alufu magana mtandatu na nt'hatu na magana mashano na milongo mishano. 603,550 33 Mna Walawi hawawazigwe hamwenga na Wazilaeli watuhu enga ivo Zumbe amsigiile Musa.

34 Ivo nivo Waizilaeli wadamanye kila kint'hu enga viya Zumbe amsigiile Musa. Waikaga nk'hambi zawe wakatimila zibendela zawe mwo utafi wawe kila yumwenga kwajili yo lukolo lwakwe ne mp'huga yakwe.