1 Zumbe amgambaga Musa, 2 "Wagambile Waizilaeli, wanabula mwe isi iyo niwenk'hile nawekale uumwo, 3 naho mkanilavile miye Zumbe malavo kulawa mwe mifugwa yenyu, malavo yo kokwa hegu malavo yo kukukint'hiza kilapi hegu kulava malavo ukuunga mwenye hegu malavo ya zuwa dya kinyemi ayo yaikigwe, kunda mhemp'he wedi wa kumwelela Zumbe, 4 ivo yudya akuunga alave malavo yakwe, naamwigaile Zumbe malavo ya nk'hande ya kilo imwenga ya unga uumbigwe na kuhanganywa na lita imwenga ya mavuta, 5 hamwenga na divai ya malavo ya kunywa neinde ni hamwenga na mwana ngoto ywa malavo yo kokwa pele. 6 Mwo lupisi lwa kulava malavo ya ndolome, kilo mbili za unga na mavuta lita imwenga na nusu nevilavigwe kunda malavo ya nk'hande, 7 hamwenga na malavo yo kunywa lita imwenga na nusu ya divai. Ni mhemp'he ukumwelela Zumbe. 8 Mwo lupisi lwa kumlavila Zumbe njeku kwa malavo yo kokwa pele, hegu malavo kwa kukint'hiza kilapi, hegu malavo ya utondowazi, 9 mnt'hu naalave kilo nt'hatu za malavo yo unga uhanganywe na lita mbili za mavuta ya zeituni, 10 hamwenga na malavo yo kunywa ya lita mbili za divai ni mhemp'he wedi ukumwelela Zumbe.

11 "Ivi nivo vint'hu vikuungwa vilavigwe hamwenga na njeku na ndolome na mwana ngoto na vulata. 12 Vint'hu ivo nevinde vingi viligane ne mifugwa iyo ikuunga ilavigwe. 13 Kila mnt'hu Muizilaeli naatimile sigilizi izi umo akanda alava malavo yo kokwa pele kunda mhemp'he ukumwelela Zumbe. 14 Uneva mna mgeni akwikala hamwenga na nyuwe kwa lupisi hegu mazuwa yose anaunga alave malavo yakwe yo kokwa ya kumwelela Zumbe, mnt'hu uyo aungwa adamanye enga ivo mkudamanya nyuwe. 15 Mwe vyeleko vose vikwiza, miko iidya mkunga muitimile nyuwe niyo akuunga aitimile mgeni yeyose akwikala hamwenga na nyuwe ha Zumbe. 16 Nyuwe hamwenga na yehe nomnde mwo mwiko uudya umwenga na sigilizi izo."

17 Zumbe amgambaga Musa, 18 Wagambe Waizilaeli kugamba mkeza kwingila mwe isi huwegalani, 19 kila icho nomdye kulawa mwo ulozo ya mwe isi iyo mwiike hank'handa hant'hu ho ulozo uwo na kunink'ha miye Zumbe. 20 Mna mkoka mikate, mkate wa nk'hongo wa ulozo wa nk'hongo wa ngano yenyu naulavigwe kunda malavo kulawa aho ikuhetigwa ingano. 21 Mwe vyeleko venyu vose vikwiza nomnilavile miye Zumbe malavo ya nk'hongo yakulawa mwo unga wenyu uumbigwe wa nk'hongo.

22 "Mna mnaswesa kutimila sigilizi zose izo niwenk'hile kwa sila ya Musa, 23 yose ayo Zumbe amgambile Musa, kukongela mwe dizuwa diya Zumbe asigiilaga na kugendeela mwe vyeleko venyu vose, 24 ivo uneva ni masa yadamanywe haheina kumanya na Waizilaeli wose kumanya nawalave jeku dimwenga kunda malavo yo kokwa, kunda mhep'he wa kumwelela Zumbe hamwenga na malavo yakwe ye zink'hande na yo kunywa viligane ne sigilizi yakwe. Iviya iviya want'hu nawalave fulata imwenga kunda malavo ya kuusa uwavu. 25 Mlavant'hambiko naawavuze kwa Zumbe Waizilaeli wose, nawo nawausilwe wavu wawe kwaviya waho hawadamanye wavu haheiina kumanya, naho wegala malavo yawe ya nk'hande enga malavo ya kuusa wavu. 26 Mdugano wose wa Waizilaeli hamwenga na watakwiza wakwikala nawo nawausilwe wavu kwaviya wose wadamanyaga wavu uwo.

27 "Mnt'hu yumwenga anadamanya wavu haheina kumanya naalave nt'hogota kunda malavo ya kuusa wavu. 28 Mlavant'hambiko naalave malavo ya kumkukiza mta masa kwa Zumbe kwajili yo mnt'hu uyo, naye nausilwe wavu. 29 Nomtimile mwiko umwenga kwa kila mnt'hu akudamanya wavu haheina kumanya, ande mwelekwa ywa Izilaeli hegu mgeni akwikala hamwenga na nyuwe.

30 "Mna mnt'hu yeyose anadamanya wavu kwa kumanya ande mwelekwa hegu mgeni naande kamuhomola Zumbe, na ivo aungwa aikwe hale na want'hu wakwe. 31 Kwaviya kalemela yadya yalongigwe ni Zumbe na kuibananga idya sigilizi yakwe. Mnt'hu uyo haande naho hamwenga na want'hu wakwe, masa yakwe nayande mwakwe mwenye."

32 Zuwa dimwenga umo Waizilaeli wandaga mwe dijangwa, waonaga mnt'hu yumwenga akulogota nk'huni mwe Zuwa dya Kuhumula. 33 Mnt'hu uyo niyo egalwa kwa Musa na Haluni na kwa Waizilaeli wose watuhu. 34 Niyo wamtozeleza kwaviya neinda haikumanyika ivo akuunga atendelwe. 35 Zumbe niyo amgamba Musa, "Mnt'hu uyo akomwe, Waizilaeli wose nawamtoe maiwe kuse ye nk'hambi." 36 Ivo want'hu niyo wamlava kuse ye nk'hambi, niyo wamkoma kwa kumtoa maiwe enga ivo Zumbe amsigiilaga Musa.

37 Zumbe amgambaga Musa, 38 "Wagambile want'hu wa Izilaeli, uwagambe wakedamanyile vilepe mwe zimp'hindilo ze zisuke zawe naho waike luzi lwa langi ya buluu mnanga mwe kila kilepe. Wagambe wadamanye ivo mwe vyeleko vawe vose vikwiza. 39 Umwo mkavikaula vilepe ivo nomkumbukile na kutimila sigilizi zose za Zumbe vileke msekutimila fanyanyi zenyu na yadya mkuyaona na meso yenyu. 40 Vilepe ivo neviwambizeni kukumbukila sigilizi zangu zose na kunda want'hu wangu wakukile. 41 Ni miye Zumbe Mnungu ywenyu nawalavaga mwe isi ya Misili ninde Mnungu ywenyu. Ni miye Zumbe Mnungu ywenyu."