1 Zumbe Mnungu niyo amgamba Musa, 2 Wagambe Waizilaeli, "Umwo mkeza kwingila Kanaani, isi huwenk'ha kunda ukipe wenyu, mihaka ya isi yenyu yose neinde ivi. 3 Hant'hu ha Kwa mwenye mzi kwenyu nounde kulawa kwe dijangwa dya Sini kombokela mwe mihaka ya Edomu. Noukongele mwo uheelo mwe Bahali yo munyu kuhinga ulailo wa zuwa. 4 Niyo wombokela Kwa mwenye mzi kuita Akilabimu na kombokela Sini mpaka Kadesh Balinea, nt'hendelo ya Kwa mwenye mzi. Kulawa aho mhaka nougonje kugendeela kaskazini mwo usweelo wa zuwa mpaka Hasal Adali na komboka mpaka Azimoni. 5 Kulawa Azimoni nouhituke kugendeela mto wa Misili, mwe mhaka wa Misili na mpaka Bahali ya Meditelania.

6 "Mhaka wenyu wa hant'hu ha ulailo wa zuwa nounde Bahali ya Meditelania.

7 "Ko mhaka wenyu wa mkoma mahanya nomwiike boya kulawa kwe Bahali ya Meditelania mpaka kwo Mnima Holi. 8 Naho nomwiike boya kulawa kwo mnima Holi mpaka Hamati niyo mwagendeela mpaka Zedadi, 9 naho nomwombokele Zifuloni nomkaheele Hazali Enani, uwo nounde mhaka wenyu wa mkoma mahanya.

10 "Mhaka wenyu wa nt'hendelo ya ulailo wa zuwa nomwike kulawa Hazali Enani mpaka Shefamu. 11 Kulawa Shefamu nougendele Kwa mwenye mzi mpaka Liba, kwo ulailo wa zuwa mwa Aini, niyo mhaka uwo nowite hasi mpaka mwe seleza ya ulailo wa zuwa wa mto wa Galilaya, 12 naho nouseele kutimila mto Yolodani mpaka Bahali yo Munyu,

"Ino neinde isi yako ne mihaka yose."

13 Ivo, Musa niyo awasigiila Waizilaeli, "Ino niyo isi neinde ukipe wenyu kwa kutowa kula, isi izo Zumbe asigiile yenk'higwe makabila kenda na nusu. 14 Kwaviya kabila dya Lubeni na dya Gadi, na nusu ye dikabila dya Manase yapata ukipe wawe, 15 Makabila ayo maidi na nusu yapata ukipe wawe mwe nt'hendelo ya ulailo wa zuwa wa mto Yolodani ng'ambu ya Yeliko."

16 Zumbe niyo amgamba Musa, 17 "Mlava nt'hambiko Eliyazali na Yoshua mwana Nuni nawo nawawapangile want'hu isi inde yawe. 18 Nouguhe kilongozi yumwenga kila kabila kwambiza upasi we isi. 19 Aya nayo mazina yawe, mwe dikabila dya Yuda ni Kalebu mwana wa Yefune. 20 Kulawa we dikabila dya Simeoni ni Shemueli mwana Amihudi. 21 Kulawa mwe dikabila dya Benjamini ni Elidadi mwana Kisiloni. 22 Kulawa mwe dikabila dya Dani ni Buki mwana Yogili. 23 Kulawa mwe dikabila dya Manase mwana Yusefu ni Hanieli mwana Efodi. 24 Kulawa mwe dikabila dya Efulaimu mwana Yosefu ni Kemueli mwana Shifutani. 25 Kulawa mwe dikabila dya Zabuloni ni Elisafani mwana Panaki. 26 Kulawa mwe dikabila dya Isikali ni Palitieli mwana Azani. 27 Kulawa mwe dikabila dya Asheli ni Amihudi mwana Shelomi. 28 Kulawa mwe dikabila dya Nafutali ni Pedaheli mwana Amihudi.

29 "Awa nawo want'hu Zumbe asigiilaga wawapangile Waizilaeli ukipe we isi ya Kanaani kunda wawe."