1 Musa eze ibinde kukimalisa Dihema, adihakaga mavuta aditende Dikukile dyoho hamwenga ne vint'hu vakwe vose. Ahahakaga mavuta hant'hu ho kulavila nt'hambiko hamwenga ne vint'hu vakwe vose. 2 Vilongozi wa Izilaeli wakulu we zink'holo na vilongozi wa makabila, walavaga malavo yawe awo nawo wamwambizaga Musa kuwawaza want'hu wa Izilaeli. 3 Wamwigailaga Zumbe malavo yawe, magali mtandatu yagubikwe, na majeku mlongo na maidi na gali dimwenga kwa kila vilongozi waidi, na jeku dimwenga kwa kila kilongozi. Yakajika ayo wavigalaga kwe Dihema Dikukile, 4 Zumbe niyo amgamba Musa, 5 "Hokela malavo aya kulawa kwawe vileke yande mwe ndima ye Dihema Dikukile, uwenk'he Walawi kila yumwenga kwajili ye ndima yakwe." 6 Ivo, Musa aguhaga magali na majeku niyo awenk'ha Walawi. 7 Wagelisholi niyo wenk'hwa magali maidi na majeku mane viligane ne ndima yawe, 8 Wamelali nawo wenk'hagwa magali mane na majeku mnane kwa kuwambiza mwe zindima zawe zose. Wagelishoni na Wamelali walongozagwa ni Isamali mwana mlava nt'hambiko Haluni. 9 Mna Musa hawenk'hile chochose Wakohasi kwaviya woho nawanda na undima wo kwinula vint'hu vikukile vikuungwa kuhagatwa.

10 Vilongozi awo walavaga malavo yawe kwa kuika kwa Zumbe hant'hu ho kulavila nt'hambiko mwe dizuwa diya hahakagwa mavuta. 11 Zumbe niyo amgamba Musa, "Kila zuwa kilongozi yumwenga naalave malavo yakwe kwajili ya kuhaika kwa Zumbe hant'hu ho kulavila nt'hambiko."

12 Uyo alavaga malavo mwe dizuwa dye nk'hongo, andaga Nashoni mwana Aminadabu ywe dikabila dya Yuda. 13 Malavo yakwe yandaga kihungu kidamanywe kwa masawa kilo imwenga na nusu, na beseni dimwenga dya masawa dyandaga dya lobo nt'hatu ye kilo viligane ne vihimo viikigwe ve Dihema Dikukile. Kihungu ne dibeseni idyo nevinda vimema unga udinyike uhanganywe na mavuta kwajili ya malavo ya nk'hande, 14 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 15 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 16 fulata imwenga kwajili ya malavo yo kuusa wavu, 17 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Nashoni mwana Aminadabu. 18 Uyo alavaga malavo mwe dizuwa dya kaidi andaga Nesaneli mwana Suali, kilongozi ywa kabila dya Isakali, 19 alavaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga dya masawa dya lobo nt'hatu ya kilo viligane ne vihimo ve Dihema Dikukile, kihungu na biga idyo vamemaga unga udinyike uhanganywe na mavuta kwajili ya malavo ya nk'hande, 20 kihungu kimwenga kidamanywe kwa zahabu uzami wakwe wandaga gilamu gana na mlongo chamemaga ubani, 21 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 22 fulata imwenga kwajili ya malavo yo kuusa wavu, 23 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Nesaneli mwana Zuali. 24 Zuwa dya katatu lwandaga lupisi lwa Eliyabu mwana Heloni, kilongozi ywa kabila dya Zabuloni. 25 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 26 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 27 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 28 fulata imwenga kwajili ya malavo yo kuusa wavu, 29 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Eliyabu mwana Heloni. 30 Zuwa dya kane Elisuli mwana Shedeuli kilongozi ewa dikabila dya Lubeni. 31 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 32 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 33 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 34 fulata imwenga kwajili ya malavo yo kuusa wavu, 35 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Elisuli mwana Shedeuli. 36 Zuwa dya shano Shelumieli mwana Sulishadai kilongozi ywe dikabila dya Simeoni. 37 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 38 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 39 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 40 fulata imwenga kwajili ya malavo yo kuusa wavu, 41 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Shelumieli mwana Zulishadai. 42 Zuwa dya mtandatu Eliyasafu mwana Deueli kilongozi ywa kabila dya Gadi. 43 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 44 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 45 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 46 na fulata imwenga kwajili ya malavo ya kuusila wavu, 47 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Eliyasafu mwana Deuli. 48 Zuwa dya mfungate ezaga Elishama mwana Amihudi kilongozi ywa kabila dya Efulaimu. 49 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 50 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 51 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 52 na fulata imwenga kwajili ya malavo ya kuusila wavu, 53 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Elishama mwana Amihudi. 54 Zuwa dya mnane andaga Gamaeli mwana Pedasuli, kilongozi ywa kabila dya Manase. 55 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 56 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 57 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 58 na fulata imwenga kwajili ya malavo ya kuusila wavu, 59 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Gamalieli mwana Padasuli.

60 Zuwa dya kenda Abidani mwana Gidioni, kilongozi ywe dikabila dya Benjamini. 61 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 62 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 63 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 64 fulata imwenga kwajili ya malavo yo kuusa wavu, 65 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Abidani mwana Gidioni. 66 Zuwa dya mlongo atimilaga Ahiezeli mwana Amishadai, kilongozi ywa kabila dya Dani. 67 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 68 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 69 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 70 na fulata imwenga kwajili ya malavo ya kuusila wavu, 71 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Ahiezeli mwana Amishadai. 72 Zuwa dya mlongo na umwenga atimilaga Pagieli mwana Okilani, kilongozi ywe dikabila dya Asheli. 73 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande, 74 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 75 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 76 na fulata imwenga kwajili ya malavo ya kuusila wavu, 77 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Pagieli mwana Okilani. 78 Zuwa dya mlongo na kaidi atimilaga Ahila mwana Enani, kilongozi ywe dikabila dya Nafutali. 79 Malavo yakwe yandaga kihungu kimwenga kidamanywe kwa masawa uzami wakwe wandaga kilo imwenga na nusu, na lwiga lumwenga ludamanywe kwa masawa uzami wakwe wandaga lobo nt'hatu ya kilo viligane ne kihimo che Dihema Dikukile. Ivo vamemaga unga dinyike uhanganywe na mavuta kwajili ya malavo ya nk'hande. 80 kihungu kimwenga kidamanywe kwa zahabu uzami wakwe wandaga kilo mlongo chamemaga ubani, 81 njeku imwenga na ndolome imwenga ya ndolome ya mwaka umwenga kwajili ya malavo yo kokwa, 82 na fulata imwenga kwajili ya malavo ya kuusila wavu, 83 na njeku mbili na ndolome shano na fulata shano na wanangoto washano wa mwaka umwenga, kwajili ya malavo yo utondowazi. Aya yandaga ni malavo ya Ahila mwana Enani. 84 Malavo yose yalavigwe na vilongozi wa Izilaeli kwajili ya hant'hu ho kulavila nt'hambiko, zuwa diya dize diikwe mwo undima kwa Zumbe zandaga vihungu mlongo na mbili vidamanywe kwa masawa, vihungu mlongo na viidi vidamanywe kwa masawa na nyiga mlongo na mbili zidamanywe kwa zahabu. 85 Kila kihungu kidamanywe kwa masawa uzami wakwe kilo imwenga na nusu, kila kihungu kidamanywe kwa masawa chandaga na uzani wa lobo nt'hatu ya kilo. ivo vose vandaga gilamu magana mtandatu viligane na vihimo viikigwe ve Dihema Dikukile. 86 Viya vihungu va zahabu mlongo na viidi vamemaga ubani, kila kimwenga uzami wakwe wandaga shekeli mlongo viligane ne vihimo viikigwe ve Dihema Dikukilene. Kwa hamwenga vihungu vidamanywe kwa zahabu uzami wakwe shekeli gana na milongo miidi. 87 Uwazilo we mifugwa yose ya malavo yo kokwa zandaga njeku mlongo na ndolome mlongo na mbili na wanangoto mlongo na mbili wa mwaka umwenga, na malavo ya unga udinyike na fulata mlongo na mbili kwajili ya malavo kuusila wavu. 88 Uwazilo we mifugwa kwa malavo ya utondowazi wandaga njeku milongo miidi na mine na ndolome milongo mtandatu na fulata milongo mtandatu na wana ngoto milongo mtandatu wa mwaka umwenga. Ayo nayo yandaga malavo kwajili ya hant'hu ho kulavila malavo aho heze hande hahakwa kale mavuta.

89 Aho Musa eze engile mwe Dihema Dikukile akalonge na Zumbe evaga izwi kulawa mlanga mwe ngubiko ikwitangwa hant'hu he zimbazi handaga mnanga mwe Disanduku dye Ndagano na hagati ya viya viumbwa viidi dikalonga naye.