1 Want'hu wa Izilaeli walawaga kwe dijangwa dya Sini mwo mwezi wa nk'hongo, na kuika nk'hambi uko Kadeshi. Wakanda uko, Miliamu abanikaga no kumoselwa msanga uuko.

2 Hant'hu aho waikaga nk'hambi hahandaga na mazi. Ivo want'hu awo wose, wawalabiilaga Musa na Haluni, 3 wakagamba, "Hegu nevinda vedi chabanikile aho wandugu zetu wabanikaga ha Zumbe! 4 Nii mkawegala uku kwe dijangwa want'hu wa Zumbe? Togola, nomkiigala uku vileke kibanikile aha hedijangwa suwe hamwenga na mifugwa yetu? 5 Naho nii mkilava Misili na kukileta hant'hu aha haihile? Hant'hu aha hahaha nk'hande, tini, zabibu hegu makomamanga. Hata mazi yo kunywa hayahali!" 6 Aho Musa na Haluni wahalawaga ho mdugano wa want'hu, niyo wagenda kukimala kwe nk'hili ye Dihema Dikukile, niyo wafika madi na kufanamila mitwi yawe. Ivo ung'azi wa Zumbe niyo walaila.

7 Zumbe amgambaga Musa, 8 "Guha idya nk'home yako iikigwe kulongole kwe Diasanduku dye Ndagano, weye na Haluni nduguyo, muwaduganye want'hu wose aaho wakakaula weye na Haluni longeni no luwe ludya nalo nolulave mazi vileke want'hu ne mifugwa wanywe." 9 Ivo Musa agendaga kuguha ink'home idya enga ivo asigiilwe ni Zumbe.

10 Niyo Musa na Haluni wawaduganyaga want'hu wose hadya ho luwe, niyo Musa awagamba, "Haluse tegelezeni nyuwe msaguke, togoleni, mwaunga kiwalavileni mazi mwo luwe ulu?" 11 Niyo Musa enula mkono wakwe, na kuutoa uluwe nk'home mbili. Mazi niyo yatumbukisa, want'hu ne mifugwa yawe niyo wanywa.

12 Mna Zumbe niyo amgamba Musa na Haluni, "Kwaviya nyuwe hamnihuwile naho hamlekile nilagise udahi wangu mwa Waizilaeli, kwaivo homuwegale want'hu awa mwe isi nigambile neniwenk'he."

13 Aya yandaga mazi ya Meliba. Hant'hgu aho naho Wazilaili wamlabiilaga Zumbe naho niho yehe mwenye Zumbe akelavilizaga kugamba kakuka.

14 Musa atumaga wegala ulosi kulawa Kadeshi aho waikaga nk'hambi, kuita kwa seuta ywa Edomu niyo wamgamba, "Nduguyo Izilaeli agamba, weye kuyamanya makunt'ho yose kikupata, 15 na ivo tati zenyu waitaga uko Misili, uko chekale kwa lupisi lutali na ivo Wamisili wawasulumizaga wakale wetu na kukisulumiza naswe. 16 Chamwiilaga Zumbe, yehe naye niyo eva ndilo yetu na kukiletela mtumigwa ywakwe ywa kwe mbingu akilave Misili. Naho haluse kiyaha Kadeshi, mzi ukuhakana na isi yako. 17 Chakulombeza ukilekele chomboke mwe isi yako, suwe hekipaguke kuse ye sila ink'hulu hegu kwingila mwe nk'honde yenyu hegu kwe zink'honde ze mizabibu naho hekinywese mwa masima yenyu. Suwe nekitimile du isila ya seuta mpaka kimlawe mwe isi yako."

18 Mna seuta ywa Edomu niyo amhitula, "Suwe hakikuunga mwomboke mwe isi yetu, uneva unomboka nenifose nize niwatoweni."

19 Waizilaeli niyo wamgamba, "Suwe nekitimile sila nk'hulu, uneva suwe na mifugwa yetu kinanywa mazi yenyu, nekilihe. Icho kikuunga kilekele du, chomboke kwa viga naho hakikuunga mbuli yeyose nt'huhu."

20 Mna seuta ywa Edomu niyo avuzagiza. "Hekiwalekele." Aho, seuta ywa Edomu afosaga na watowani wata udahi no kuwakindila. 21 Ivo, Waedomu walemelaga kuwalekela Waizilaeli komboka mwe mihaka yawe. Waizilaeli niyo wahituka no kutoza sila nt'huhu.

22 Waizilaeli wose nawatambaga kulawa Kadeshi no mpaka kwo mnima wa Holi kwo mhaka wa Edomu. 23 Ivo, Zumbe niyo amgamba Musa na Haluni uko kwo mnima wa Holi, mwo mhaka wa Edomu, 24 "Haluni naabanike, heengile mwe isi iyo niweink'hile Waizilaeli kwaviya nyuwe waidi nomleka sigilizi zangu uko kwa mazi ya Meliba. 25 Mguhe Haluni na Eliyazeli mwanawe, uwegale kwo mnima wa Holi. 26 Uko nouyahambule mavalo yo ulavant'hambiko ya Haluni no kumvika mwanawe Eliyazali. Haluni naabanikile uuko kwo mnima." 27 Ivo Musa nakadamanya enga ivo asigiilwe ni Zumbe. Wose watatu wakwelaga kwo mnima wa Holi want'hu wose wakawakaula. 28 Ivo Musa niyo amhambula Haluni mavalo yakwe yo undima, no kumvala Eliyazali mwana Haluni. Haluni naye niyo abanika ahadya ho lunenengwa lwo mnima. Niyo Musa na Eliyazali waseela hasi. 29 Want'hu wose weze weve kugamba Haluni kabanika, wahongezaga kwa mazuwa milongo mitatu.