1 Zumbe awagambaga Musa na Haluni, 2 awenk'he Wazilaili zisigilizi izi. Wawegaile Musa na Haluni ng'ombe ink'hundu heiina lema naho heiinati kudamanya ndima ya kulima, 3 nawo nawamwigaile Eleazali mlavant'hambiko yehe naaite nayo kuse ye nk'hambi niyo aichinja. 4 Uyo mlava nt'hambiko Eliyazali naaguhe sakame iyo nakuimyaga kwa kadole nk'hanana mfungate, akaonyekeza kulongole kwe Dihema Dikukile. 5 Ng'ombe iyo ingima neyokwe ho mlava nt'hambiko. Kila kint'hu chakwe nechokwe, nk'hingo na nyama na sakame no utumbo wakwe. 6 Niyo mlava nt'hambiko aguha kaziti ka mwelezi, na hisopo na nyuzi ink'hundu na kuvigela mwo moto uwo ukoka ing'ombe iyo. 7 Akajika, mlava nt'hambiko naafigise zisuke zakwe na kuhaka mazi mwo mwili, ivo naadahe kwingila mwe nk'hambi, naande hakuzumilwa mwo kumvika Zumbe mpaka kisingi. 8 Mnt'hu naayoke ing'ombe iyo yehe naye naafigise zisuke zakwe na kuhaka mazi mwo mwili, mna yehe naye naande hakuzumilwa mwo kumvika Zumbe mpaka kisingi.

9 Niho mnt'hu azumilwe naaduganye maivu ye njeku na kuyaika hant'hu hakukile kuse ye nk'hambi. Maivu ayo yaikigwe aho vileke Wazilaili wose weze wayahanganye na mazi yakumtenda mnt'hu azumilwe mwo kumvika Zumbe. 10 Uyo mnt'hu akuduganya maivu ayo ye njeku aungwa afigise zisuke zakwe mna yehe naye haazumilwe kudamanya ndima nt'huhu ikukile mpaka kisingi. Uno ni mwiko howiikuhitulwa. Uno nomuutimile nyuwe Wazilaili na watakwiza wakwikala mwenyu

11 Mnt'hu yeyose naakwafe kimba, naande msavu kwa mazuwa mfungate. 12 Nevimuunge akaekukize mwa mazi yo kukukizila mwe dizuwa dya katatu na dya mfungate, aho naande kakuka. Mna uneva hakekukize mwa mazi ayo mwe dizuwa dya katatu na dya mfungate naasigale msavu. 13 Yeyose akukwafa kimba, hanakekukize, naagendeele kunda msavu kwaviya hamyagilwe mazi yo kukekukizila. Uyo naadigele usavu Dihema Dikukile dya Zumbe. Haafanyanywe kunda mnt'hu ywa Zumbe.

14 Ino niyo isigilizi ya kutimilwa uneva mnt'hu anabanika mwe dihema dyakwe. "Kila akwingila mndani mwe dihema idyo hegu emndani mwe dihema idyo, naande msavu kwa mazuwa mfungate, 15 kila chombo hekiigubikwe hekiina ngubiko nekinde kisavu. 16 Mnt'hu yeyose uko kuse naakwafe kimba cha mnt'hu akomigwe kwa mabamba hegu abanike du kuse ye nk'hambi, hegu anakwafa mavuha ya mnt'hu hegu anakwafa kikuta, naande msavu kwa mazuwa mfungate.

17 "Nomwiike maivu ya malavo ya kuusa wavu yokigwe kwajili ya mnt'hu msavu, maivu ayo nomyahanganye mwe nyungu na mazi ya kuseela. 18 Mnt'hu hi msavu naaguhe hisopo, naho naachank'hize kadole mwa mazi ayo, niyo naamyagile Idihema na vint'hu vimndani mwakwe na want'hu we mndani. Naho naammyagile mnt'hu akwafile mavuha ya mnt'hu, hegu kimba cha mnt'hu akomigwe hegu aabanike du hegu akwafile kikuta. 19 Mwe dizuwa dya katatu na dya mfungate, mnt'hu akukile naawamyagile want'hu wasavu mazi ayo. Mwe dizuwa dya mfungate, awo wakukizwe waungwa kufigisa zisuke zawe niyo wahaka mwili wose. Kisingi nawande wakuka usavu wawe.

20 "Mna mnt'hu ananda msavu hanakekukize, mnt'hu uyo naalemelwe ni want'hu wakwe, kwaviya adigela usavu Dihema Dikukile dya Zumbe Mnungu. kwaviya hamyagilwe mazi ya ukuki, mnt'hu uyo naande msavu. 21 Mwaungwa kutimila zisigilizi izi lupisi lwose lukwiza. Mnt'hu naamyage mazi ayo yo kukukizila naafigise zuke zakwe, naho yeyose naakwafe mazi ayo naande msavu mpaka kisingi. 22 Chochose nekikwafe kint'hu kisavu icho nekinde kisavu, naho yeyose naakwafe kint'hu icho naande msasvu mpaka kisingi."