1 Zumbe Mnungu niyo amsigilaga Musa, 2 asigiile Waizilaeli ivo vikuungwa mwo kumlavila Zumbe malavo kwa lupisi lwakwe. Nk'hande za kokwa pele, kunda mhemp'he wedi wa kumwelela.

3 "Wagambile want'hu mwa malavo ya kokwa pele wakuungwa wamlavile Zumbe kila zuwa. Ndolome mbili zo mwaka umwenga heziina lema. 4 Ndolome imwenga neilavigwe mtondo nt'huhu nayo neilavigwe kisingi, 5 kila yumwenga akanda na malavo ya nk'hande ya unga kilo imwenga uhanganywe na lita imwenga ya mavuta yedi ya zeituni. 6 Aya ni malavo ya kokwa pele ya kila zuwa yalavigwe nk'hongo kwo mnima Sinai kunda malavo ya nk'hande enga ivo visigiilwe, kunda mhemp'he wedi wa kumwelela Zumbe, malavo yakulavigwa kwa Zumbe kwa kokwa pele. 7 Kwa malavo yo kunywa hamwenga ne ndolome ya nk'hongo ugide lita imwenga ya divai nk'hali. Nougidile malavo ayo yo kunywa he kilingo cho kutambikila. 8 Mwana ngoto ywa kaidi noumlave kisingi enga ivo vandile mwa malavo ye nk'hande na malavo yo kunywa. Ayo nayo ni malavo yedi, mhemp'he wedi ukumwelela Zumbe.

9 "Zuwa dyo Kuhumula nomlave malavo ya ndolome mbili za mwaka umwenga heziina lema, malavo ya unga ya kilo mbili za unga wedi uhanganywe na mavuta, na malavo yakwe yo kunywa. 10 Malavo aya yo kokwa pele nayalavigwe kila zuwa dyo Kuhumula haheina kuleka, ukaleka malavo ya kila zuwa hamwenga na malavo yakwe yo kunywa.

11 "Nk'hongo ya kila mwezi, nomumlavile Zumbe Malavo yo kokwa. Njeku mbili na ndolome imwenga na wanangoto mfungate ya mwaka umwenga heiina lema. 12 Nomlave malavo ya unga kilo nt'hatu, uhanganywe na mavuta kwa kila njeku imwenga naho nomlave kilo mbili za unga kwa kila ndolome imwenga, 13 na kilo imwenga ya unga kwa kila ndolome. Malavo aya yo kokwa ni malavo ya nk'hande yana mhemp'he wedi wa kumwelela Zumbe. 14 Kihimo cha malavo yo kunywa yakuungwa ni lita mbili za divai kwa kila njeku, lita imwenga na nusu kwa kila ndolome, na lita imwenga kwa kila mwana ngoto. Aya ni malavo yo kokwa ya kila zuwa dya nk'hongo dyo mwezi mwo mwaka mgima. 15 Naho nomumlavile Zumbe malavo ya kuusa wavu, fulata imwenga, haheina kuleka malavo yadya yo kokwa ya kila zuwa na malavo yakwe yo kunywa.

16 "Zuwa dyo mlongo na kane dyo mwezi wa nk'hongo damanyeni Pasaka ya Zumbe Mnungu. 17 Zuwa dyo mlongo na shano dyo mwezi uuwo ni zuwa dya kinyemi. Nomdye mikate heeigeligwe ugwadu kwa mazuwa mfungate. 18 Mwe dizuwa dya nk'hongo dye kinyemi duganeni mnivike. Zuwa idyo homdamanye ndima yeyose. 19 Nomlave malavo ya kokwa kunda malavo ya nk'hande kwa Zumbe. Njeku mbili na ndolome imwenga, na ndolome mfungate za mwaka umwenga, zose zinde heziina malema. 20 Lava lavo dikwelela dya nk'hande, dya unga uhanganywe na mavuta, kilo vnt'hatu kwa kila njeku, na kilo mbili kwa kila ndolome, 21 na kilo imwenga kwa ziya ndolome mfungate. 22 Naho nomlave fulata imwenga kunda malavo ya kuusa wavu vileke muwavuze kwa Zumbe. 23 Nomlave vint'hu ivi haheina kuleka malavo ya kokwa pele yazoelwe yakulavigwa mtondo. 24 Iviya iviya noulave nk'hande kwa malavo ya moto kila zuwa kwa mazuwa mfungate kunda malavo yakumwelela Zumbe. Neilavigwe haheina kuleka malavo yo kokwa ya kila zuwa na malavo yakwe yo kunywa. 25 Mwe dizuwa dyo mfungate nomdugane mnivike, msekudamanya ndima.

26 "Mwe dizuwa dya nk'hongo kinyemi dyo uvuni nomnigaile ulozo mhya, nomdugane mnivike, msekudamanya ndima. 27 Nomlave malavo ya kokwa yana mhemp'he wedi ukumwelela Zumbe Mnungu. Njeku mbili na ndolome imwenga na myate mfungate ya mwaka umwenga, 28 mlave nk'hande ikwelela, malavo ya unga uhanganywe na mavuta ya zeituni, kilo nt'hatu za unga kwa kila njeku na kilo mbili kwa kila ndolome, 29 na kilo imwenga kwa kila mwana ngoto. 30 Nomlave fulata imwenga kunda malavo ya kuusa wavu vileke muwavuze want'hu kwa Zumbe. 31 Nomlave vint'hu ivi haheina kuleka divai kwa malavo ya kila zuwa na malavo ya nk'hande. Malavo ayo yasekunda na malema yoyose."