1 Makabila ya Lubeni na Gadi yandilisaga na mifugwa mingi. Ivo weze waone kugamba isi ya Yazeli na Gileadi yandaga yedi kwa udimi, 2 wawabasaga Musa na mlava nt'hambiko Eliyazali na vilongozi wa want'hu niyo wawagamba, 3 "Mizi ya Ataloti na Diboni na Yazeli na Nimla na Heshiboni na Eleale na Sebamu na Nebo na Beoni, 4 iyo isi Zumbe aitowaga kwaajili ya Waizilaeli. Isi iyo yedi kwa udimi naho suwe wandima wako kinanayo mifugwa mingi. 5 Ivo, uneva noukizumile chakulombeza ukink'he isi ino inde ukipe wetu, usekukigala kikekale ng'ambu yo mto Yolodani."

6 Mna Musa niyo awahitula want'hu wa makabila ya Gadi na Leubeni, "Togoleni mwaunga msigale aha umwo wandugu zenyu wakaita kwe nk'hondo? 7 Nii mwawagela chevu Waizilaeli wasekuita mwe isi wenk'higwe ni Zumbe? 8 Ivo nivo watendile wadya watati zenyu nize niwasigiile kulawa Kadeshi Banea mwo kuipelemba isi. 9 Wapelembi awo nawaita mpaka mwe dikolongo dya Eshekoli, na kuiona isi, mna weze wauye, nawawagela chevu Waizilaeli wasekwingila mwe isi wenk'higwe ni Zumbe. 10 Zumbe afaga maya mwe dizuwa idyo niyo aika kilapi akagamba, 11 ‘Kwaviya hawanizumile kwa moyo wose, ikindedi hahali yeyose mwa want'hu walaile Misili, wata miyaka milongo miidi na kugendeela naaiyone isi niwenk'hile Ibulahimu na Isaka na Yakobo.’ 12 Wose hawengile mwe isi iyo, mna ni Kalebu mwana Yefune mlukolo ywa Mkenizi na Yoshua mwana Nuni du, kwaviya woho wanizumila kwa moyo wose. 13 Zumbe awafiilaga maya Waizilaeli, na kuwatenda wangadike mwe dijangwa kwa miyaka milongo mine, mpaka cheleko kidamanye wavu ha Zumbe kisile pele, 14 haluse naho, nyuwe cheleko kina wavu mwinuka hant'hu ha watati zenyu, mwongezele naho maya ya Zumbe mwa Waizilaeli! 15 Uneva nyuwe mnalemela kumtimila, yehe naawalekeni mwe dijangwa, nyuwe nomuwatende want'hu awa wose wabanike."

16 Ivo want'hu we dikabila dya Lubeni na Gadi niyo wambasa Musa, wakamgamba, "Suwe nekizenge madewa ye mifugwa yetu na kuwazengela gomela mizi ya wana wetu. 17 Mna suwe wenye nekinde kikeika lumwe kuita kwe nk'hondo hamwenga na wandugu zetu Waizilaeli, naho nekiwalongoele kwe nk'hondo mpaka kiwabuze hant'hu hawe. Mwo lupisi ulwo wana wetu nawekale mwe mizi ina gomela, vileke wakeamile na wakaya we isi ino. 18 Hekiuye kaya mpaka aho kila Mwizilaeli akeza kupata ukipe wakwe we isi. 19 Mna hekiguhe ukipe we kint'hu chochose hamwenga na woho mwe ng'ambu ya mto Yolodani na kugendeela, kwaviya suwe kipata ukipe wetu kwe nt'hendelo nt'huhu yo mto Yolodani."

20 Ivo Musa niyo awagamba, "Uneva kindedi nomdamanye enga ivo mlongile, niyo mwakeika lumwe kuita kwe nk'hondo kwajili ya Zumbe, 21 naho uneva watowani wenyu nawomboke mto wa Yolodani na kugendeela kutowana mpaka aho Zumbe akeza kuwahuma wank'hondo wakwe hakwe, 22 niyo is ina humwa kwa Zumbe niho nomuuye, nanywe homnde na masa kwa Zumbe hegu kwa Izilaeli, isi ino neinde yenyu ha Zumbe. 23 Mna hamdahile kukint'hiza mbuli ino nomnde mdamanya wavu ha Zumbe, noho mmanye kugamba ikindedi nomsulumizwe. 24 Wazengeleni wavele wenyu na wana wenyu mizi, na madewa kwajili ye mifugwa yenyu, mna damanyeni enga ivo mlongile!"

25 Niyo want'hu wa Gadi na wa Leubeni wamgamba Musa, "Suwe wandima wako nekidamanye enga ivo ukisigiile. 26 Wavele wetu na wana wetu na mifugwa yetu nawasigale aaha mwe mizi ya Gileadi, 27 mna suwe wandima wako nekiite kwe nk'hondo kikalongozwa ni Zumbe. Nekijink'he mto Yolodani na kutoana nawo, enga ivo ulongile."

28 Ivo, Musa niyo amsigiila mlava nt'hambiko Eliyazali, Yoshua mwana Nuni, na kwa vilongozi wa mbuya ya makabila ya Waizilaeli mwa makabila ayo. 29 Ivo niyo Musa awagamba "Uneva welekwa wa Gadi na wa Leubeni nawomboke mto wa Yolodani hamwenga na nyuwe wakeika lumwe kuita kwe nk'hondo wakalongozwa ni Zumbe, wawahuma na kuguha isi iyo, niho nomuwenk'he isi ya Gileadi inde yawe, 30 mna uneva hawomboke mto Yolodani hamwenga na nyuwe hamwenga ne vitowanilo vawe kuita kwe nk'hondo, ivo nawande wakipe mwe isi ya Kanaani hamwenga na nyuwe iyo ukwo usweelo wa zuwa wo mto Yolodani."

31 Welekwa wa Gadi na wa Lubeni niyo wahitula, "Suwe wandima wako nekidamanye enga ivo Zumbe akisigiile. 32 Kikalongozwa ni Zumbe kikeike lumwe kutowana kwe nk'hondo mpaka mwe isi ya Kanaani, ukipe wetu nounde nt'hendelo ya ulailo wa zuwa wo mto Yolodani."

33 Ivo, Musa niyo awenk'ha welekwa makabila ya Gadi na Leubeni na nusu ya makabila ya Manase mwana Yosefu, isi yose ya seuta Sihoni ywa Waamoli na isi ya seuta Ogu ywa Bashani hamwenga na mizi ikuzunguluka isi iyo. 34 Kabila dya Lubeni niyo waizenga naho mizi ya Diboni na Ataloiti na Aloeli, 35 na Ataloiti Shofani na Yazeli na Yogebeha, 36 Beti Nimla na Beti Halani. Mizi iyo yandaga na magomela na madewa. 37 Kabila dya Lubeni niyo waizenga naho mizi ya Heshiboni na Eleale na Kiliataimu, 38 na Nebo na Baa Meoni na Sibima. Mizi waizengaga uhya waink'haga mazina matuhu. 39 Welekwa wa Makini, mwana Manase, nawaitoa isi ya Geleadi niyo waitaha na kuwagulusa Waamoli awo wandile wakekala umwo. 40 Kwaivo, Musa niyo awenk'ha want'hu wo lukolo lwa Makili mwana Manase, isi ya Geleadi, woho nawo niyo wekala umwo. 41 Lukolo lwa Yaili, mwana ywa kabila dya Manase, wazitoaga zikaya ya Geleadi na kuitaha, na kuiink'ha zina Hawoti Yaili. Kugamba kaya za Yaili. 42 Lukolo lwa Noba nalo lwaitowaga na kuitaha Kenati na mizi yakwe, na kuink'ha zina dya Noba, dizina dyakwe mwenye.