1 Zumbe amgambaga Musa, 2 "Damanya magunda maidi yasanigwe kwa masawa, magunda ayo nayande ni ya kuwaduganyila want'hu na ya kuwagambila want'hu mwo kusamiza ink'ahmbi. 3 Umwo magunda ayo maidi yakatoigwa yose kwa hamwenga want'hu wose nawadugane hako aho he nk'hili ye Dihema Dikukile. 4 Mna uneva dinatoigwa gunda dimwenga du, nawadugane hako ni vilongozi du, awo wakulu we zink'holo za Waizilaeli. 5 Kilagiso cha kutoa gunda dya kwitusa kinalaila, want'hu wose we nk'hambi za ulailo wa zuwa nawakonge utafi. 6 Kilagiso icho che digunda kinatoigwa kaidi kwa izwi dya kwitusa, nk'hambi zose zi nt'hendelo ya Kwa mwenye mzi nawakonge utafi. Digunda idyo neditoigwe umwo wakaungwa kusamiza ink'hambi. 7 Mna mwo lupisi lwo kuwetanga want'hu wadugane, magunda nayatoigwe kwa maizwi yazoelwe. 8 Vyeleko va Haluni awalavant'hambiko nawo nawatowe magunda ayo.

"Izi nezinde sigilizi ya mazuwa yose mwe vyeleko venyu vose. 9 Naho aho mkagenda kutoa nk'hondo mwe isi yenyu, kutoana na wak'hondo wakuwatowani nyuwe, aho nomtoe magunda maidi ya kilagiso cha nk'hondo. Zumbe Mnungu ywetu naaweveni na kuyokolwa na wank'hondo wenyu. 10 Naho mwa mazuwa ye vinyemi venyu enga viya mwandamo wo mwezi na mazuwa matuhu ya kinyemi nomtoe magunda ayo, aho mkalava malavo yenyu yo kokwa pele, na malavo yenyu ya utondowazi. Aho miye Mnungu ywenu neniwakumbukileni. Ni Miye Zumbe Mnungu ywenu."

11 Mwe dizuwa dya milongo miidi dyo mwezi wa kaidi wo mwaka wa kaidi, aho want'hu wa Izilaeli weze walawe Misili, divunde dyandaga halanga he Dihema Dikukile dyenulagwa, 12 Waizilaeli nawo wakongaga int'hambo yawe ya kulawa mwe dijangwa dya Sinai. Divunde idyo dyakimalaga mwe dijangwa dya Palani.

13 Aho niho Waizilaeli wakongaga int'hambo yawe ye nk'hongo kwa sigilizi ya Zumbe enga ivo amsigiilaga Musa. 14 Wadya wandaga we kiwalo cha watowani we dikabila dya Yuda walongolaga fyo kwa fyo. Kilongolozi ywawe andaga Nahashoni mwana Aminadabu. 15 Nesaneli mwana Suali andaga kilongozi ywa watowani we dikabila dya Isakali. 16 Eliyabu mwana wa Heloni naye andaga kilongozi ywa watowani we dikabila dya Zabuloni.

17 Akajika Dihema Dikukile dyaselezwagwa ni want'hu wo lukolo lwa Wagelisoni na Wamelali awo wadinulaga, wakongaga int'hambo.

18 Naho wadya wandaga we kiwalo cha watowani we dikabila dya Lubeni watimilaga fyo kwa fyo. Kilongozi ywawe andaga Eliyasuli mwana Shedeuli. 19 Shelumieli mwana wa Sulishadai adilongozaga kabila dya Simeoni. 20 Niyo Eliyasafu mwana wa Deueli nakadilongoza dikabila dya Gadi.

21 Niyo wawatimila want'hu we zink'holo za Kohasi awo wenulaga vyombo vikukile. Weze wabule wadibwilaga Dihema dikimigwa kale.

22 Niyo watimila want'hu we kiwalo che difyo dikulongozwa ni kabila dya Ifulaimu. Kilongozi wawe nakanda Elishama mwana wa Emihudi. 23 Gamalieli mwana wa Pedasuli nakadilongoza kabila dya Manase, 24 Na Abidani mwana Gidioni yehe nakadilongoza kabila dya Benjamini.

25 Kwo uheelo wadya wandaga mwe difyo dikulongozwa ni dikabila dya Dani, wandaga wamizi wa mafyo yose wakongaga int'hambo fyo kwa fyo. Awa nawakalongozwa ni Ahiezeli mwana Amishadai. 26 Pagieli mwana wa Okilani nakadilongoza dikabila dya Asheli. 27 Na Ahila mwana wa Enani nakadilongoza dikabila dya Nafutali. 28 Ivo nivo vandaga mwo utafi wawe Waizilaeli viligane na mafyo yawe, umwo wandaga wakakonga utafi.

29 Musa amgambaga Hobabu mnamuwe mwana Yesilo Mmidiani mkwewe dya Musa, "Suwe chaita nt'hambo uko Zumbe akigambile, ‘Neniwenk'heni nyuwe hant'hu aho.’ Elo kinde hamwenga, naswe nekidamanye ayedi kwa viya Zumbe nakaika Ndagano na suwe kugamba naakivile."

30 Mna Hobabu niyo ahitula, "Bule, Miye hikuita na nyuwe mna neniuye mwe isi yangu na kwa wandugu zangu."

31 Musa niyo amgamba "Chakulombeza usekukileka," "Weye kumanya hant'hu kikudaha kutoa nk'hambi mwe dijangwa naho wadaha kukilangiliza. 32 Naho unaita hamwenga na suwe nekihokele chose uvikilwa udya Zumbe akuunga akink'he."

33 Ivo want'hu weze wakonge utafi wa kulawa mo mnima Sinai Mnima wa Mnungu, utafi uwo nounda wa mazuwa matatu. Disanduku dye Ndagano dyawalongoelaga vileke wazungule hant'hu ha kuikima ink'hambi. 34 Aho weze wakonge utafi wa kulawa mwe nk'hambi imwenga kuita int'huhu vunde dya Zumbe dyandaga mnanga mwawe msi wose.

35 Aho Disanduku dye Ndagano dikakonga utafi, Musa agambaga, "Zumbe Mnungu inuka wank'hondo wako wachakuke! Na awo wakukuihiya wakunyilike!" 36 Aho Disanduku dye Ndagano dize dikimale, agambaga, "Zumbe wauiye awa mafyo na mafyo ya Waizilaeli."