1 Niyo Musa awagamba vilongozi wa makabila ya Izilaeli, "Aya nayo asigiile Zumbe. 2 Mnt'hu yeyose anaika kilapi cha kumwink'ha Zumbe kint'hu na kuika Ndagano kwa kwelisa asekukiusa kilapi chakwe, vaungwa adamanye viligane na ivo alongile.

3 "Mwanakike anaika kilapi kwa Zumbe na kukeika mwenye mwe kilapi akanda ekala mwe nyumba ya ise, 4 ise naye aneva icho kilapi chakwe ne Ndagano iyo niyo anyamala, aho vilapi vakwe vose nevikimale naho kila kilapi chakwe nekimtoze mwenye. 5 Mna uneva ise aneva kilapi icho ne Ndagano iyo mwe dizuwa mwe kilapi icho niyo amhiga, ivo vilapi vakwe vose ne Zindagano zakwe hevimtoze. Zumbe Mnungu naamlekele kwaviya ise nakahiga ikilapi icho.

6 "Uneva mndele anaika kilapi na Ndagano akanda akei kulombigwa haheina wengele nande kaketozeleza mwenye, 7 niyo mgosiwe eva mna naye hamhigile mwe dizuwa idyo akiviilaga kilapi icho, kilapi chakwe nekimtozeleze. 8 Mna uneva mgosiwe aneva mbuli iyo na kumhiga, ivo uyo mgosi naakiuse kilapi cha mkaziwe na Ndagano yakwe aikile haheina kufanyanya, Zumbe naye naamlekele.

9 "Mna uneva mndele abanikilwe ni mgosi hegu asigwe anaika kilapi na Ndagano hegu anakeika mwenye mwe kilapi na Ndagano haadahe kuleka kukikint'hiza.

10 "Uneva mvele alombigwe anaika kilapi hegu anaika Ndagano mwenye, 11 niyo mgosiwe aiva mbuli iyo naho, niyo hamgambile kint'hu hegu kulemeza, ivo kilapi chakwe hekiuswe. 12 Mna uneva mgosiwe anaziva zimbuli zakwe, niyo azilemela mwe dizuwa azivile, niho kila kiya alongile mwa mazuwa ayo aikile kilapi nayauswe kwaviya mgosiwe kazilemela naho Zumbe namlekele. 13 Mgosiwe adaha kuzumila hegu kuhiga kilapi hegu Ndagano yoyose aikaga mkaziwe. 14 Mna uneva mgosiwe halemele kilapi icho ne Ndagano mwe dizuwa evaga niyo halemele vilapi vakwe vose vikumtozeleza, mvele uyo nevimuunge adamanye vose ivo alongile.

15 "Mna uneva uyo mgosiwe kaviva vilapi ivo niyo avilemela, niho mgosi uyo naaguhe masa ya mkaziwe.

16 "Izi nizo zisigilizi ne Zindagano Zumbe amsigiilaga Musa mwe mbuli ya mgosi na mkaziwe, na mwe mbuli ya mwana kike na ise umwo akanda akei ekala kwa ise."