1 Zumbe amgambaga Musa, 2 "Wagambile Waizilaeli wamlave kuse ye nk'hambi kila mnt'hu mta matana na kila mnt'hu akulawa ufila na yeyose akegeile usavu kwa kutoza kint'hu kifile. 3 walaveni kuse ye nk'hambi want'hu wose wagosi kwa wavele, wanase kugela usavu nk'hambi yangu iyo hwikala." 4 Waizilaeli nivo watendaga, wawalava kuse ye nk'hambi, enga ivo Zumbe amsigiilaga Musa.

5 Ivi nivo Zumbe amsigiilaga Musa, 6 "Wagambile Wazilaeli uneva mnt'hu yeyose mgosi hegu mvele anakola masa kwa miawe naande na masa kwa miye Zumbe Mnungu, 7 vamuunga akweiile wavu wakwe. Mnt'hu uyo naalave maliho yakint'hile. Naho noongezele imwenga ya shano ya maliho ayo niyo amwink'ha uyo amtendele wavu. 8 Mna uneva mnt'hu uyo kabanika naho kaswesa ndugu ywa hagihi akudaha kuhokela maliho ayo, ivo maliho ayo ya masa nayande ya Zumbe wenk'higwe walavant'hambiko, maliho ayo ni hamwenga na dolome ya mwiivano ya kuusila wavu wakwe. 9 Malavo yose yakukile yakulavigwa ni Wazilaili, nayande yakwe mlavant'hambiko. 10 Kila kint'hu alavilwe Zumbe nekinde cha mlavant'hambiko na kila kint'hu akumlavilwa mlava nt'hambiko, icho nekinde cha mlavant'hambiko."

11 Zumbe amgambaga Musa, 12 Longa na Wazilaili uwagambe, "Uneva mkaza mt'hu kaganika niyo aswesa uhuwilwa kwa mgosiwe, 13 kwa kugenda na mgosi mtuhu haheina mgosiwe hegu mnt'hu yeyose kumanya, uyo kakegela usavu, naho hahana muwona ywe mbuli iyo kwaviya hagwiligwe ugoni. 14 Niyo mgosiwe anengilwa ni kiyangayanga na wivu kwa mkaziwe akegeile usavu, hata uneva mkaziwe hakegeile usavu, 15 ivo wose waidi nawaite kwa mlavant'hambiko na kwigala malavo yakuungigwa, malavo ayo ni kopo dimwenga dya unga wa shaili, mna isekugelwa mavuta hegu ubani, kwaviya ni malavo ya nk'hande ya yakulavigwa kwa mgosi akumfanyanya mkaziwe.

16 "Mlavant'hambiko naamsogeze hagihi uyo mvele, no kumkimalisa kwa Zumbe. 17 Akajika naagide mazi yakukile mwo lwiga niyo aguha nt'hifu ya sanga hasi mwe Dihema Dikukile na kuigela mwa ayo amazi vileke yande yesungu. 18 Mlavant'hambiko namwigale yudya mvele kwa Zumbe no kuzichakula zifili na kumwik'ha mvele uyo malavo ya nk'hande ikulavigwa kwajili yo wivu wa mgosiwe. Mlavant'hambiko mwenye naatoze chombo kiya cha mazi yesungu yakwigala ligito. 19 Akajika mlavant'hambiko namwelise yudya mvele akamgamba, ‘Uneva hugendile na mgosi mtuhu na kukegela usavu ukanda na mgosiyo, mazi aya yesungu hayakwigaile ligito. 20 Mna uneva kugenda na mgosi mtuhu ukamanya una mgosiyo nounde kukegela usavu, 21 Mnungu akutende ligito mwa want'hu wako, unde mgumba naho inda yako itutuke. 22 Mazi ayo yakugela ligito yengile mwe nda yako na kukutenda mgumba na nda yako itutuke.’ Mvele uyo neetikile ‘Taile.’

23 "Naho mlavant'hambiko naawandike maligito ayo mwe kitabu niyo ayasunt'hila mwa mazi vileke ayo yesungu, 24 akajika naamnywese mvele uyo amazi ayo yesungu yakugela ligito, mazi ayo nayamwingile na kumtenda alumiswe uneva katenda ivo, 25 mlavant'hambiko naakonge kuguha yadya malavo ye nk'hande yo wivu mwe mikono ya uyo mvele na kuyaika kwa Zumbe niyo ayegala he kilingo cho kutambikila. 26 Naho naaguhe kifumba kimwenga cha malavo ayo ya nk'hande no kuyoka aho hant'hu hakukile kunda lukumbusa, akajika namnywese uyo mvele mazi ayo. 27 Akajika ukunywa, uneva handile mhuwilwa kwa mgosiwe niyo akegela usavu mazi ayo yakugela ligito neyengile mwe nda yakwe nakunda yesungu, nda yakwe nayo neitutuke naivo naande mgumba. Mvele uyo naande kaligitwa mwa want'hu wakwe. 28 Mna uneva mvele uyo hakegeile usavu naho kazumilwa kwa Zumbe, haaligitwe naho naande na cheleko.

29 "Ivo, uno nuwo umwiko wo wivu uneva mvele kaganika niyo akegela usavu kwa mgosi mtuhu umwo akamanya kugamba ana mgosiwe, 30 hegu hata mgosi amfanyanya vihile mkaziwe. Mlavant'hambiko naamkimalise mvele uyo kwa Zumbe niyo mlavant'hambiko amdamanyila imiko iyo yose. 31 Mgosiwe haande na masa yeyose mna mvele naande na masa."