1 Mwe dizuwa dya nk'hongo dyo mwezi wa kaidi mwo mwaka wa kaidi, aho want'hu wa Izilaeli weze walawe Misili, Mnungu alongaga na Musa mwe Dihema Dikukile uko kwe dijangwa dya Sinai akamgamba, 2 "Weye na Haluni mdamanye uwazilo wa want'hu wose wa Izilaeli viligane ne zink'holo zawe na mp'huga zawe. Muwandike mazina ya wagosi wose. 3 Wawazeni wagosi wose viligane na mafyo ya watowani wawe, kukongela miaka milongo miidi na kugendeela wakudaha kunda watowani, 4 naho no mwambizwe ni mgosi yumwenga mwe kila kabila." 5 Aya nayo mazina ya wagosi wakuunga wakwambize.

Kulawa mwe dikabila dya Lubeni naakwambize naande ni Elisuli mwana Shediuli. 6 Mwe dikabila dya Simeoni naande ni Shelumieli mwana Sulishadai. 7 Mwe dikabila dya Yuda ni Nashoni mwana Aminadabu. 8 Mwe dikabila dya Isakali ni Nesaneli mwana Suali. 9 Mwe dikabila dya Zabuloni ni Eliyabu mwana Heloni. 10 Mwe dikabila dya Efulaimu ni Elishama mwana Amihudi.

Mwe dikabila dya Manase nadyo ni Gamalieli mwana Pedasuli. 11 Mwe dikabila dya Benjamini ni Abidani mwana Gidioni. 12 Mwe dikabila dya Dani ni Ahiezeli mwana Amishadai. 13 Mwe dikabila dya Asheli ni Pagieli mwana Okilani. 14 Mwe dikabila dya Gadi ni Eliyasafu mwana Deueli. 15 Mwe dikabila dya Nafutali ni Ahila mwana Enani.

16 Awo wagosi nawo wasagulagwa ni Mnungu mwa want'hu wa Izilaeli, naho wandaga ni vilongozi we zink'holo mwe Izilaeli.

17 Ivo Musa na Haluni awetangaga wagosi awo watambulagwa mazina yawe. 18 Mwe dizuwa dya nk'hongo dyo mwezi wa kaidi wawetengaga want'hu wose vileke wawazigwe, kila yumwenga viligane ne mp'huga yakwe no lukolo lwakwe. Wawandikaga want'hu wandaga na miaka kukongela milongo miidi na kugendeela viligane ne zink'holo zawe ne zimp'huga zawe, 19 Ivo Musa awawazaga want'hu awo uko kwe dijangwa dya Sinai enga ivo Zumbe amlagize.

20 Welekwa walawaga mwe dikabila dya Lubeni uyo nt'hulasasu ywa Izilaeli. Wagosi wose wandaga na miaka milongo miidi na kugendeela awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 21 Uwazilo wa want'hu awo wandaga magana milongo mine na mtandatu na magana mashano. 22 Welekwa walawaga mwe dikabila dya Simioni. Wagosi wose wa miaka milongo miidi na kugendeela awo wadahaga kuita kwe nk'hondo wawazagwa no kuwandikwa mazina yawe viligane ne zink'holo zawe ne zimp'huga zawe. 23 Welekwa wose walawaga mwe kabila dya Simioni wandaga want'hu alufu milongo mishano na kenda na magana matatu. 59,300 24 Welekwa walawaga mwe dikabila dya Gadi. Wagosi wose wandaga na miaka milongo miidi wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 25 Welekwa walawaga mwe dikabila dya Gadi wandaga want'hu alufu milongo mine na shano na magana mtandatu na milongo mishano. 45,650 26 Welekwa walawaga mwe dikabila dya Yuda. Wagosi wose wabuzaga miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 27 Wadya wawazigwe mwe kabila dya Yuda wandaga want'hu alufu milongo mfungate na mine na magana mtandatu. 74,600 28 Welekwa walawaga mwe dikabila dya Isikali. Wagosi wose wabuzaga miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe, 29 wadya wawazigwe mwe kabila dya Isakali wandaga want'hu magana milongo mishano na mine na magana mane. 54,400. 30 Welekwa walawaga mwe dikabila dya Zabuloni. Wagosi wose wabuzaga miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe, 31 wadya wawazigwe mwe dikabila dya Zabuloni wandaga want'hu alufu milongo mishano na mfungate na magana mane. 57,400 32 Welekwa walawaga mwe dikabila dya Ifulaimu. Wagosi wose wandaga na miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe, 33 wadya wawazigwe mwe kabila dya Efulaimu wandaga want'hu alufu milongo mine na magana mashano. 40,500 34 Welekwa walawaga mwe dikabila dya Manase. Wagosi wose wandaga na miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe 35 wadya wawazigwe mwe dikabila dya Manase wandaga want'hu alufu milongo mitatu na miidi na magana maidi. 32,200 36 Welekwa walawaga mwe dikabila dya Benjamini. Wagosi wose wandaga na miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 37 Wadya wawazigwe mwe dikabila dya Benjamini wandaga want'hu alufu milongo mitatu na mishano na magana mane. 35,400 38 Welekwa walawaga mwe dikabila dya Dani. Wagosi wose wandaga na miaka milongo miidi na kugendeela awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe 39 Welekwa walawaga mwe dikabila dya Dani wandaga want'hu alufu milongo mtandatu na miidi na magana mfungate. 62,700 40 Welekwa walawaga mwe dikabila dya Asheli. Wagosi wose wandaga na miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 41 Wadya walawile mwe kabila dya Asheli wandaga want'hu alufu milongo mine na umwenga na magana mashano. 41,500 42 Welekwa walawaga mwe dikabila dya Nafutali. Wagosi wose wandaga na miaka milongo miidi awo wadahaga kuita kwe nk'hondo wawandikagwa mazina yawe viligane ne zink'holo zawe ne zimp'huga zawe. 43 Wadya wawazigwe mwe dikabila dya Nafutali wandaga want'hu alufu milongo mishano na mitatu na magana mane. 53,400

44 Want'hu awa ni wadya wawazigwe ni Musa na Haluni wakambizwa ni wadya vilongozi mlongo na waidi wa Izilaeli, kila kilongozi andaga kakimaila lukolo lwakwe. 45 Waizilaeli wose wandaga na miaka milongo miidi na kugendeela awo wadahaga kuita kwe nk'hondo, awo wawazagwa viligane ne zimp'huga zawe. 46 Uwazilo wa awo wose wandaga ni alufu magana mtandatu na mitatu na magana mashano na milongo mishano. 603,550.

47 Mna zimp'huga ze dikabila dya Lawi hawawazagwa mwa want'hu awo, 48 kwaviya Zumbe amgambaga Musa, 49 "Use kuwawaza want'hu we dikabila dya Lawi hegu kuwahanganya hamwenga na makabila matuhu ya Izilaeli. 50 Vituhu vakwe uwatende walawi awo kunda wakaulizi we Dihema Dikukile ne vint'hu vakwe vose. Nawadinule ne vint'hu vakwe vose, woho nawande wandima wa uumo, naho nawakime nk'hambi zawe wakadizunguluka. 51 Mwo lupisi lwo kudisamiza Dihema Walawi nawo wo kudisamiza, naho lupisi lwo kudikima lunabula aawo Walawi nawo wo kudikima, mnt'hu yeyose hi Mlawi akuunga adisogeele naakomwe. 52 Waizilaeli watuhu nawaziike zink'hambi zawe mafyo kwa mafyo, kila yumwenga akanda ne difyo dyakwe ne kiwalo che difyo dyakwe. 53 Mna Walawi wazenge nk'hambi zawe zikuzunguluka Dihema Dikukile wadyamile vileke mnt'hu yeyose asekudisogeela hagihi sema maya ya Zumbe yana wemukile want'hu wa Izilaeli." 54 Kwa ivo Wazilaeli wadamanyaga enga ivo Zumbe Mnungu amsigiilaga Musa.