1 Zumbe niyo amgamba Musa, 2 Longa na Waizilaeli uwagambe, uneva mnt'hu yeyose anaika kilapi cho kukelava kwa Mnungu, vileke kukint'hiza kilapi, mnt'hu uyo adaha kuusa kilapi chakwe kwa kuliha yombe dikuligana enga ivo ikutimila, 3 uneva naande mgosi ywa miyaka milongo miidi mpaka miaka milongo mtandatu naakombolwe kwa matundu milongo mishano viligane na matundu ya Hant'hu hakukile, 4 uneva ni mvele ywa miaka kukongela misahano mpaka milongo miidi, uyo naakaombolwe kwa matundu milongo miidi, naho anayombe dyakwe kwa matundu milongo mitatu. 5 Uneva ni mta miyaka mishano na milongo miidi, ika yombe dya mgosi kunda matundu ya shekeli milongo miidi na mvele matundu ya shekeli mlongo. 6 Uneva ni mwana mta mwezi umwenga na miaka mishano, naakombolwe kwaka yombe dya mgosi kwa matundu ya shekeli shano na idya ya mvele kwa matundu ya shekeli nt'hatu.

7 Uneva ni mnt'hu mta miaka mlongo mtandatu na kugendeela, ika yombe dya mgosi kwa matundu mlongo na shano na mvele matundu mlongo. 8 Uneva mnt'hu yeyose akuika kilapi ni mkiwa vitendese kuliha yombe diikigwe, naamwigale uyo mnt'hu kwa mlava nt'hambiko vileke akaule vikudahika mnt'hu uyo kuliha.

9 Uneva kiya mnt'hu aikile kilapi ni mfugwa ukuzumilwa enga malavo kwa Zumbe, mfugwa uwo ulavigwe kwa Zumbe nounde ukuka. 10 Mnt'hu hakuungwa kuhitula hegu kulava mfugwa wedi kwa wihile hegu mfugwa wedi kwa wiihile, uneva naalave mfugwa mwa mtuhu, mifugwa yose miidi, idya alavigwe na yudya asakanywe, yanda ikukile. 11 Uneva nicho aikile kilapi ni mfugwa msavu, uwo houzumilwe kunda malavo kwa Zumbe, mfugwa uwo waungwa wigalwe kwa mlava nt'hambiko. 12 Mlava nt'hambiko naalamulwe uwedi wa mfugwa uwo uneva ni wedi hegu wiha. Yombe dyodyose naaike kilapi. 13 Uneva mta mfugwa naaunge kuukombola mfugwa uwo, aungwa aongezele hant'hu ha shano ye diyombe.

14 Uneva mnt'hu naaike nyumba yakwe enga kint'hu kikukile kwa Zumbe Mnungu, mlava nt'hambiko naalamule uwedi we inyumba iyo uneva yedi hegu iha. Yombe dyodyose mlava nt'hambiko akuika, ivo nivo nevinde. 15 Uneva mnt'hu kaika nyumba yakwe mwo undima kwa Zumbe naho aunga aikombole, aungwa aongezele hant'hu ha shano ye diyombe dyakwe, nyumba iyo neinde yakwe.

16 Uneva mnt'hu aika mgunda mwo undima mwa Zumbe, yombe dyakwe nediikwe viligane na mbeyu ikuungwa ihandigwe mwo mgunda uwo, kwa matundu mlongo ya masawa kwa nt'hangulu kenda za shaili. 17 Uneva naaike mgunda wakwe ukuki mwo mwaka wa milongo mishano, diya diyombe diikigwe kale nedinde ni idyo. 18 Uneva naaike mgunda wakwe ukuki mwo mwaka wa Yubile mlava nt'hambiko naawaze upati uneva uwazilo we miyaka isigale hata mwo mwaka wa Yubile, na kuwaza kwako nokuhunguzwe. 19 Uneva mnt'hu akuika ukuki mgunda aunga kudikombola, naho aungwa ongezele imwenga ya shano ye diyombe dyakwe, mgunda nawo nounde wakwe naho. 20 Uneva mgunda haukombolwe, hegu uneva kaditaga kwa mnt'hu mtuhu ivo houdahike kukombolwa naho. 21 Mgunda aho ukeza kulekelwa mwo mwaka wa Yubile, nedinde dikukile enga mgunda ulavigwe kwa Zumbe, nadyo nedinde ugoli wa walava nt'hambiko.

22 Uneva mnt'hu kaika ukuki kwa Zumbe mgunda aguile, iyo yandile hiyo hant'hu ha nduguye, 23 mlava nt'hambiko naalamule yombe dyakwe mpaka mwo mwaka wa milongo mishano, na mnt'hu uyo naaungwe kuliha yombe dyakwe mwe dizuwa idyo enga kint'hu kikukile kwa Zumbe Mnungu. 24 Mwo mwaka wa milongo mishano mgunda uwo naavuzilwe uyudya mwenye diguligwe kwakwe, uyo mgunda uwo wandile ugoli wakwe.

25 Kila yombe dyaungwa kwikwa viligane na matundu ya yombe dikukile, uzamile wagela ni enga uzami wa shekeli imwenga.

26 Hahali yeyose haalekelwe kwigala nt'hula sasu ya ng'ombe hegu ngoto kwa Zumbe kwaviya nt'hula sasu zose kukongela nk'hongo ni za Zumbe. 27 Mna uneva ni nt'hula sasu ya mfugwa msavu yadaha kuguligwa naho kwa yombe dikukile, ukongezela na imwenga kwa shano, uneva haikombole neitagwe kwa yombe diikigwe.

28 Hamwenga na ayo, hevitagwe hegu kukombolwa kint'hu chochose kiikigwe ukuki mazuwa yose, icho mnt'hu aikile mwo undima kwa Zumbe, mwe vint'hu vose ananavo, uneva ni mnt'hu hegu mfugwa hegu uneva ni mgunda wakwe, kila kint'hu kiikigwe ukuki ni kugamba kikuka kwa Zumbe. 29 Kila mnt'hu akigwe ukuki mazuwa yose kwa Zumbe, uyo haakombolwe naangwe kukomwa.

30 Fungu dyose dya imwenga mwo mlongo kulawa kwo mgunda, dikanda ni unga hegu matunda, ni dya Zumbe, naho dikuka kwa Zumbe. 31 Uneva mnt'hu aunga akombole aungwa aongezele hant'hu ha imwenga ya shano ye diyombe dyakwe. 32 Imwenga ya mlongo ya mifugwa yoyose ni ya Zumbe Mnungu. Umwo ikawazigwa imwenga ya mlongo ni ya Zumbe Mnungu. 33 Mnt'hu yeyose hakudaha kuuza kugamba mfugwa uwo wedi hegu hiyo wedi naho havikudahika kuusakanya kwa mtuhu. Unasakanya kwa mtuhu mfugwa iyo yose miidi neinde ikuka. Heikombolwe.

34 Malagizo aya nayo Zumbe amwink'hile Musa mwo mnima wa Sinai kwaajili ya want'hu wa Waizilaeli.