1 Zumbe niyo amgamba Musa, alonge na walava nt'hambiko, wana wa Haluni, uwagambe. "Kwa kihendo cho mviko havikuungwa mlava nt'hambiko akakegela usavu kwaajili ya kukwafa vimba va want'hu wakwe, 2 mafani inde nduguye ywa hagihi, enga viya nine hegu ise hegu mwanawe hegu ywa kike hegu nduguye, 3 hegu lumbudye mwali akumhuwila mwe nyumba iyo, kwaajili ya awo adaha kukwafa na kukegela usavu. 4 Naho asekukegela usavu kwa want'hu walombelane.

5 "Walava nt'hambiko hawakuungwa kumoga kipala hegu kumoga vilevula vyao hegu kukugela sale mwe mili yawe kulagisa kugamba wahongeza. 6 Vaungwa wande wakukile hameso ha Mnungu ywawe naho wasekudihomola zina dya Mnungu ywawe. Kwaviya nawo wakulava malavo ya kokwa kwa Zumbe Mnungu, inde enga nk'hande ya Mnungu ywawe, ivo waungwa kunda wakukile. 7 Ivo wasekulomba wavele wakegeile usavu kwa upamp'he hegu wenk'higwe talaka na wagosi zawe, kwaviya walava nt'hambiko ni wakukile kwa Mnungu ywawe. 8 Kila yumwenga ywenyu naande akukile kwaviya niye akulava nk'hande ya Mnungu nywenyu. Ni miye Zumbe nikukile naho nawakukiza want'hu wangu. 9 Uneva mwana kike ywa mlava nt'hambiko kadamanya upamp'he, kamgele ise soni, ivo nookigwe mpaka abanike.

10 "Mlava nt'hambiko mkulu, eli mkulu mwa wanduguze, akumbigwe mavuta mwo mtwi wakwe na kugelwa ukuki vileke avale divalo dya ulava nt'hambiko, yehe hazileke fili zakwe mwazi, naho haatatule suke zakwe kwa kulagisa kugamba ahongeza. 11 Naho heengile hant'hu hana kimba, seka akakegela usavu, hata uneva ni ise hegu nine 12 hegu asekuhalawa kwe Dihema Dikukile na kunda hamwenga na wakuhongeza kwaviya hant'hu hakukile ha Mnungu ywakwe hegu kuhagela usavu, kwaviya naakegela usavu yehe mwenye ne Dihema dikukile dya Mnungu ywakwe naakumbagwa mavuta ya Mnungu ywakwe. Ni miye Zumbe. 13 Walava nt'hambiko wakulu waungwa walombe wavele wali na mazanga. 14 Hakuungwa kumlomba mvele afiilwe ni mgosiwe hegu asigwe na kwink'hwa talaka, hegu mvele akegeile usavu kwa upamp'he, ivo namlombe du mwali na mazanga mwa want'hu wakwe. 15 ivo hawagele usavu wanawe mwa want'hu wakwe. Ni miye Zumbe Mnungu humtenda mjungo."

16 Zumbe niyo amgamba Musa, 17 Mgambe Haluni, "Kwe vyeleko vako vikwiza hakuna mwelekwa ywako ana lema naasogele alave nt'hambiko ya nk'hande kwa Mnungu ywakwe. 18 Mnt'hu yeyose mta lema hegu nt'hunt'hu hegu aholomp'hale hegu mta kihanga kisengigwesengigwe hegu mta kilungo kitali kujink'ha viya vizoelwe, 19 hakuli mnt'hu mta kiga hegu mkono uholomp'hale, 20 hegu mta kinundumgongo hegu hekukula hegu akulumwa na meso hegu mta uvimbe una ufila hegu maihu hegu afunt'higwe. 21 Hauhali mwelekwa ywa mlava nt'hambiko Haluni mta lema dyodyose neeze amlavile zumbee malavo yo kokwa. Yehe ana lema hakuungwa eze hagihi amlavile Mnungu malavo ya nk'hande. 22 Mnt'hu uyo adaha kudya nk'hande ya Mnungu ywakwe ikukise na viya vikukile vitendese, 23 mna haasogeele dipazia, hegu kunda hagihi na he kilingo cha kutambikila, kwaviya ana lema, vileke kugamba asekuhagela usavu Dihema Dikukile, kwaviya ni miye Zumbe huwakukiza."

24 Ivo Musa awagambilaga Haluni na wanawe na Waizilaeli wose imbuli ino.