1 Zumbe amgambaga Musa, 2 "Longa na Waizilaeli uwagambe ni miye Zumbe Mnungu ywenyu, 3 msekudamanya enga ivo mdamanye uko Misili, uko mwandile mkekala, naho msekugenda kudamanya enga ivo wakudamanya wa mwe isi ya Kaanani uko huwegalani. Msekugenda kutimila vihendo vawe. 4 Nomtimile sigilizi zangu naho nomwitoze miko yangu vileke mwiitimile. Ni miye Zumbe Mnungu ywenyu. 5 Mzitoze sigilizi zangu ne miko yangu kwaviya mnt'hu akuzitimila neekale. Ni miye Zumbe Mnungu."

6 Mnt'hu yeyose asekugenda na nduguye ywa hagihi. Ni miye Zumbe. 7 Msekumgela soni iso kwa kugenda na nyokwe. Uyo ni nyokwe usekunda hagihigihi naye. 8 Usekugenda na wakaza iso kwaviya awo ni wanyokwe. 9 Usekugenda na lumbudyo elekwe ni iso, hegu lumbudyo elekwe ni nyokwe, hegu ande kelekwa mwe nyumba iyo hegu mwe nt'huhu. 10 Usekugenda na mwezukuluwo, mwana mwanawo ywa kigosi hegu mwana kike ywa mwanao kwaviya ayo yakugela soni we mwenye. 11 Usekugenda na lumbudyo mwana mkaza iso, kwaviya uyo naye lumbudyo. 12 Usekugenda na nyokwe sangazi, kwaviya uyo ni ndugu ywa hagihi ywa iso.

13 "Usekugenda na nywokwe mdodo hegu nyokwe mkulu kwaviya awo ni ndugu wa hagihi wa nyokwe. 14 Usekugenda na mkaza iso mkulu hegu iso mdodo, kwaviya awo ni wanyokwe.

15 "Usekugenda na mka mwana, yehe ni mka mwanawo, usekugenda naye uyo. 16 Usekugenda na mkaza mkuluwo hegu mvunao, kwaviya nouwagele soni wanduguzo. 17 Usekugenda na mvele hamwenga na mwanawe. Naho usekugenda na mwezukuluwe. Awo ni ndugu wa hagihi. Uwo ni usavu. 18 Usekugenda na mnamuwo ande mkazio umwo mkazio akanda akei mgima, Mnungu aiihiya mbuli iyo.

19 "Usekugenda na mvele akanda mwa mazuwa yakwe. 20 Usekugenda na mkaza miyawo kwaviya noukegele usavu.

21 "Usekumlava mwanawo kunda nt'hambiko kwa mnungu ywa udant'hi Moleki, kwa kudamanya ivo wamhomola ni miye Zumbe Mnungu ywako. 22 Usekugenda na mgosi miyawo enga ivo mnt'hu akugenda na mvele, Mnungu aiihiya mbuli iyo. 23 Usekugenda na mfugwa na kukegela usavu wakwe. Naho mvele asekugenda na mfugwa, Mnungu aiihiya mbuli iyo.

24 "Msekukegela usavu mwe sila ya kumvika Mnungu mwe zimbuli izi, kwaviya kwajili ye zimbuli want'hu hi Wayahudi waketendaga wenye kunda hewekuzumilwa ha Zumbe Mnungu. Kwaviya want'hu awo hi Wayahudi awo wekalaga mwe isi umwo nyuwe mwandaga mkei kwiza awo wagulusagwa ni Zumbe vileke nyuwe mwingile mwe isi. 25 Naho isi neigeligwe usavu mwe zisila za kumvika Mnungu, naho neniisengele kwo wavu wawe naho neniwalemele wakwikala umwo. 26 Mna waungwa uzamile sigilizi zangu ne miko yangu. Mwiizilaeli hegu mtakwiza wakwikala mwenyu, wasekudamanya mbuli enga izi huziihia, 27 naho zimbuli zia miy Mnungu huziihia zadamayagwa ni want'hu wekalaga Kanaani umwo nyuwe mwandaga hamnati mwize niyo waitenda isi isekuzumilwa ha Zumbe Mnungu. 28 Elo, nyuwe msekudamanya zimbuli izi cheivo isi neiwalemele enga ivo iwalemele want'hu wa isi nt'huhu wandaga aaho umwo nyuwe mwandaga mkei kwiza. 29 Want'hu wose nawadamanye mbuli izi huziihiya, want'hu awo nawalemelwe ni want'hu wawe.

30 "Tozeni malagizo yangu naho msekutimila vihendo va maihizo yoyose yadamanywe ni want'hu umwo mwandaga mkei kwiza mwe isi ino. Ni miye Zumbe Mnungu ywenyu."