1 Uneva mnt'hu analava malavo ya utondowazi, malavo yakwe yakanda jeku hegu moli, ng'ombe iyo isekunda na lema ha Zumbe Mnungu. 2 Naageleke mkono wakwe mnanga mwo mtwi wo malavo yakwe no kuichinjila hagihi ne nk'hili ye Dihema Dikukile. Awo walava nt'hambiko wana wa Haluni nawanyunyizile isakame yakwe nt'hendelo zose ha hant'hu ha kulavila nt'ahmbiko, 3 mavuta yose yakugubika utumbo we nyama ya malavo ya kwikala kwa utondowazi naayoke enga malavo yakulavigwa kwa Zumbe Mnungu kwa kokigwa, 4 naho nakalava zifigo zakwe zimbili na mavuta yakwe yatozane ye hagihi ye kigudi ne diini. 5 Awo wana wa Haluni nawayokele he kilingo cha kutambikila hamwenga na malavo ya kokwa ye mnanga mwe zink'huni, ni malavo yakokwa ina mhemp'he wedi ukumwelela Zumbe Mnungu.

6 Uneva analava ngoto hegu mbuzi kulawa mwe difyo enga malavo ya utondowazi kwa Zumbe Mnungu, naalave ndolome hegu nt'hogota heiina lema. 7 Uneva mnt'hu naalave mwana ngoto kunda nt'hambiko yakwe, naailavile ha Zumbe Mnungu. 8 Naageleke mkono wakwe mwo mtwi wo mfugwa uwo naho naauchinjile kulongole kwe Dihema Dikukile. Awo wana Haluni nawanyunyizile isakame nt'hendelo zose nne za he kilingo cha kutambikila. 9 naho kulawa mwa malavo ayo alavilwe Zumbe Mnungu kwa kokigwa nawamlavile vint'hu ivi. Mavuta yakwe no mkila mgima una mavuta ukant'higwe hagihi no mgongo na mavuta yose yakugubika vint'hu va kundani, 10 Naho naamlavile figo mbili hamwenga na mavuta ne diini. 11 Mlava nt'hambiko naavoke ivo vose mnanga mwa he kilingo cha kulavila nt'hambiko enga nk'hande, malavo yo kokwa alavilwe Zumbe Mnungu.

12 Uneva malavo yakwe ni mbuzi, naamlavile Mnungu, 13 akageleka mkono wakwe mwo mtwi na kuichinja hameso ye Dihema Dikukile. Wana Haluni nawo nawaimyagile isakame mnanga mwa he kilingo cha kutambikila mwe zint'hendelo zakwe zose izine. 14 Naye naamlavile Zumbe Mnungu mavuta yose yakugubika vint'hu va kundani, 15 Naho naamlavile figo mbili hamwenga na mavuta ne diini. 16 Mlava nt'hambiko naavoke mnanga mwa he kilingo cha kutambikila enga malavo ya nk'hande, ni malavo yana mhemp'he ukumwelela Zumbe Mnungu. Mavuta yose ni ya Zumbe. 17 Sigilizi izi nezinde ya mazuwa yose mwe vyeleko venyu vose mndani mwe nyumba zenyu zose kugamba homdye mavuta hegu sakame.