1 Zumbe niyo amgamba Musa, 2 "Longa na wana wa Izilaeli, Mnt'hu yeyose hegu mtakwiza akwikala mwe Izilaeli na yeyose akumlava mwanawe yeyose kunda malavo kwa milungu ya Moleki, mnt'hu uyo aungwa akomigwe. Want'hu wose wa mwe isi iyo nawamtoe maiwe. 3 Miye mwenye nenimsengele mnt'hu uyo, name nenimpagule mwa want'hu wakwe. Kwaviya kwa kumlava yumwenga mwa wanawe kwe milungu ya Moleki, kaigela usavu nyumba yangu na kudihomola zina dyangu dikukile. 4 Uneva want'hu wa mwe isi hawanakaule umwo mnt'hu uyo akalava mwanawe kwa mnungu Moleki, na woho hawanamkomile, 5 miye mwenye nenimsengele mnt'hu uyo na mp'huga yakwe. Nenimsengele kubanika yehe mwenye hamwenga na wose wakuswesa uhuwilwa kwangu kwa kumtimila mnungu Moleki.

6 "Naho mnt'hu akuunga awabase wata mp'hepo na wasai vileke akehabwase nawo, nenimsengele mnt'hu uyo na kumsengela kubanika. 7 Kekukizeni, na nyuwe mnde wakukile, kwaviya ni miye Zumbe Mnungu. 8 Tozeni sigilizi zangu na kuzitimila. Ni miye Zumbe, huwatenda kunda wakukile."

9 Uneva mnt'hu yeyose naamligite ise hegu nine, aungwa akomigwe. Kamligita ise na nine, file neinde yakwe mwenye.

10 Uneva mnt'hu anagenda na mvele wa miyawe, wahabwasi awo waungwa kukomwa.

11 Uneva mnt'hu anagenda na mvele wa ise, hamogohe ise. Mgosi uyo na mvele uyo waungwa wakomigwe, sakame yawe neinde mwo mtwi wawe wenye.

12 Uneva mnt'hu anagenda na mkaza mwanawe aungwa wose waidi wakomigwe. Icho watendile kiihisa, sakame yawe neinde mwo mtwi wawe wenye. 13 Uneva mgosi anagenda na mgosi miyawe enga viya wakudamanya mgosi na mvele, wagosi awo waidi wadamanya ihizo kulu vitendese. Waungwa wakomigwe, sakame yawe neinde mwo mtwi wawe wenye. 14 Uneva mgosi naalombe mndele hamwenga na nine, uwo ni uwihi utendese. Wose watatu waungwa wakomwe kwa kokwa moto vileke kusekunda na uwihi mwa nyuwe. 15 Uneva mgosi anagenda na mfugwa, aungwa akomigwe, naho vaungwa mfugwa uwo ukomigwe. 16 Uneva mvele naagenda na mfugwa, mkomeni mvele uyo hamwenga na mfugwa uwo. Waungwa kukomwa, sakame yawe neinde mwo mtwi wawe wenye.

17 Uneva mnt'hu anamlomba lumbudye, mndele elekwe na ise hegu nine, na woho niyo wadamanya enga ivo, izo ni soni. Vaungwa wabanangwe. Uyo mgosi hamogohe lumbudye ivo nawapagulwe mwa want'hu wawe kwa uwihi wawe uwo. 18 Uneva mgosi anagenda na mvele emwe mazuwa yakwe, wose waidi nawaguluswe kulawa mwa want'hu wawe kwaviya wabananga imiko mwe mbuli yo usavu.

19 Usekugenda na lumbudye dya nyokwe hegu iso. Kwaviya wose waidi nawasengelwe kwa uwihi wawe naho awo ni ndugu wa hagihi. 20 Uneva mgosi naagende na mkaza ise ande mkulu hegu mdodo, uyo naawagele soni ise mkulu na ise mdodo, wose waidi nawasengelwe kwa wavu uwo, naho wose nawabanike haheina kweleka mwana. 21 Uneva mgosi naalombe mvele ywa nduguye, amgela soni nduguye, uwo ni usavu, wose waidi nawabanike haheina wana.

22 "Toza sigilizi ne miko yangu na kuzitimila, vileke kugamba mwe isi huwegalani isekuwatahika. 23 Nanywe msekwikala kwa kutimila vihendo va want'hu watuhu ayo huunga kuyagulusa hameso yenyu. Kwaviya wadamanyaga mbuli izi zose, na miye niyo naaihiwa vitendese nawo. 24 Mna nehiwagambila, nomuiikaile isi yawe, neniwenk'heni nyuwe kunda ukipe, isi ina ulozo utendese. Ni miye Zumbe Mnungu ywenyu awapaguleni mwe si nt'huhu. 25 Kwaivo, nyuwe nompagule mifugwa yedi na misavu na madege yedi na masavu. Msekukegela usavu mwo mfugwa wowose hegu madege hegu kint'hu chochose kikutambala, viya nivipagule kunda visavu kwenyu. 26 Nomnde wakukile kwangu, kwaviya miye Zumbe hikuka, name hiwapagulani nyuwe na want'hu watuhu vileke mnde want'hu wangu mwenye.

27 "Msai mgosi hegu mvele akuhunga mp'hepo mwa nyuwe, ikindedi naakomwe. Nomuwatowe maiwe, msa yokukomwa kwwawe nayande yao wenye."