1 Zumbe amwitangaga Musa niyo alonga naye mwe Dihema Dikukile akamgamba, 2 Wagambe Waizilaeli

uneva mnt'hu aunga amlavile Zumbe Mnungu malavo ya mfugwa, mfugwa uwo nousagulwe mwe difyo dyakwe dye zing'ombe hegu mbuzi hegu ngoto. 3 Uneva malavo akulava mnt'hu ni ya kokwa pele, naasagule jeku hediina lema kulawa mwe difyo dyakwe, naadigale he nk'hili ye Dihema Dikukile vileke azumilwe ni Zumbe Mnungu. 4 Naageleke mkono wakwe mnanga mwo mtwi we nyama iyo ye nt'hambiko yo kokwa, naho neizumilwe kwajili ya kumuusila mnt'hu uyo wavu wakwe. 5 Dijeku idyo nedichinjigwe ha Zumbe Mnungu. Naho awo walava nt'hambiko, wana wa Haluni nawaiguhe isakame na kuimyaga nt'hendelo zose za he kilingo cha kutambikila hagihi no lwivi lwe Dihema Dikukile. 6 Inyama iyo ye nt'hambiko yo kokwa neisangulwe no kuikant'hakant'ha vihendohendo. 7 Wana wa Haluni mlava nt'hambiko nawawale nk'huni aho hant'hu ho kulavila mt'hambiko no kuzigela moto. 8 Niho walava nt'hambiko awo nawaguhe viya vihendo ve inyama, hamwenga no mtwi na mavuta, na kuziika mnanga mwo moto, aho hant'hu ho kulavila nt'hambiko. 9 Mna vint'hu va kundani ne viga va kunyuma, uyo mnt'hu navisunt'he kwa mazi. Mlava nt'hambiko naavoke pele aho he kilingo cha kutambikila, vileke yande malavo yo kokwa yano mhempe wedi wa kumwelela Zumbe Mnungu.

10 Uneva malavo yakwe ya kokwa naalave mwe difyo dya ngoto hegu mbuzi, ivo naasagule dolome hediina lema. 11 Naachinjile nt'hendelo za mkoma mahanya ye dihema, ha Zumbe Mnungu, awo walava nt'hambiko, wana wa Haluni nawainyunyizile sakame nt'hendelo zose mwa he kilingo cha kutambikila. 12 Niyo uyo mnt'hu naavikant'he vihendohendo, akavipanga, umtwi hamwenga na mavuta yakwe, naaviike mnanga mwe zink'huni zo moto zi mnanga mwe he kilingo cha kutambikila. 13 Mna vint'hu va kundani ne viga va kunyuma naavisunt'he kwa mazi. Uyo Mlava nt'hambiko naye naavoke kunda malavo yo kokwa yana mhemp'he wedi ukumwelela Zumbe Mnungu.

14 Uneva akamlavila Zumbe Mnungu malavo yo kokwa ya kadege, ivo neegale malavo yakwe ya kinda dya suwa. 15 Mlava nt'hambiko uyo negale dege idyo mwe dihema, naainyogotole mtwi wakwe na kudyoka he kilingo cha kutambikila. Naho sakame yakwe neifose mnk'handa mwa he kilingo cha kutambikila. 16 Kongomelo chakwe na mazoya yakwe hamwenga no usavu wakwe naavihause na kuviduula ulailo wa zuwa we dihema uko maivu yakukupulwa. 17 Naaditoze mawawa na kudikangazulwa, mna asekudikant'ha vihendo viidi. Niyo adilava nt'hambiko ya koka mnanga mwe zink'huni zi mwo moto mwa he kilingo cha kutambikila. Iyo neinde malavo yo kokwa yana mhemp'he wedi ukumwelela Zumbe Mnungu.