1 Naho Zumbe amgambaga Musa, 2 "Noudikime dihema, idyo Dihema Dikukile ha meso ha Zumbe, udikime mwe dizuwa dya nk'hongo dyo mwezi wa nk'hongo mwo mwaka wa nk'hongo. 3 Noudiike uumwo Disanduku dye Ndagano, niyo watungika dipazia kulongole yakwe. 4 Wiike meza ne vint'hu vakwe vose. Akajika wingize vinala ve lumuli no kuika umwo vimuli vakwe. 5 Wiike kilingo che nt'hambiko kiadamanywe na zahabu ho kokela ubani kulongole kwe Disanduku dye Ndagano niyo watungika pazia kwe nk'hili ye Dihema. 6 Akajika udamanye kilingo che nt'hambiko cha kokela malavo kulongole ye nk'hili ye Dihema Dikukile. 7 Naho hagati hakwe he Dihema Dikukile na hant'hu ho kulavila nt'hambiko, wiike kanga dya kuhakila niyo wadimemeza mazi. 8 Akajika noudamanye lwazo kudizunguluka no kutungika pazia kulongole.

9 "Uguhe mavuta yo kuhaka niyo wadihaka Dihema na kila kint'hu kundani mwakwe naho udikukize hamwenga na vint'hu vakwe vose nadyo nedinde dikukile. 10 Naho niyo wahahaka mavuta aho hant'hu ho kulavila nt'hambiko yo koka malavo ne vint'hu vakwe. Hahake mavuta aho he kilingo chee nt'hambiko, naho nahande hakukise. 11 Dihake mavuta dikanga hamwenga ne kisimiko no kudikukiza.

12 "Mwigale Haluni na wanawe kwe nk'hili ye Dihema Dikukile uwakekukize. 13 Umvale Haluni suke zo ulava nt'hambiko, umhake mavuta niyo wamkukiza vileke wadahe kunda mlavant'hambiko wa kunidamanyila ndima. 14 Uwaguhe wanawe no kuwavala zishati zawe zint'hali. 15 Uwahake mavuta enga ivia umhakile tati yawe, naivo wadahe kunda walavant'hambiko wanidamanyile ndima. Uhakwa mavuta wawe nounde wa ulavant'hambiko ukuunga ugendeele kwe vyeleko vose vikwiza."

16 Musa adamanyaga kila kin'htu viligane na ivo Zumbe Mnungu amsigiilaga.

17 Ivo Dihema dyakimwagwa mwe dizuwa dya nk'hongo dyo mwezi wa nk'hongo na mwo mwaka wa kaidi weze walawe Misili. 18 Musa aikaga visimiko umwo akimaga idihema. Akimalisaga nyivi zakwe na mikiki yakwe ne mikimailo yakwe. 19 Akajika wakuzumbulaga dipazia mnanga mwe Dihema Dikukile ne ngubiko ye dihema mnanaga mwakwe viligane na ivo Zumbe Mnungu asigiile.

20 Aguhaga Indagano no kuiika mwe Disanduku dye Ndagano niyo ainamatizaga imikimailo mwe Disanduku niyo ahaika ingubiko mnanga mwakwe ikwitangwa hant'hu he zimbazi. 21 Naho akajika adigalaga Disanduku kwe Dihema niyo atungika pazia kudifisa diya Disanduku dye Indagano viligane na ivo Zumbe Mnungu amsigiile Musa.

22 Waikaga imeza kwe Dihema Dikukile kwe nt'hendelo ya mkoma mahanya ya kuse ye dipazia, 23 niyo waika mnanga mkate alavilwe Zumbe viligane na na ivo Zumbe Mnungu amsigiile Musa.

24 Naho aikaga kinala che vimuli kwe Dihema Dikukile Kwa mwenye mzi vikakaulana ne meza ye dihema, 25 niyo aika vimuli hameso ha Zumbe viligane na ivo Zumbe Mnungu amsigiilaga Musa.

26 Waikaga kwe Dihema kilingo che nt'hambiko kidamanywe kwa zahabu, kulongole kwe dipazia, 27 no koka ubani wa mhemp'he viligane na ivo Zumbe Mnungu amsigiile Musa. 28 Niyo waholeza pazia kwe nk'hili ye Dihema Dikukile, 29 waikaga hant'hu ha kokela malavo kulongole ye nk'hili ye Dihema Dikukile, aho alavaga malavo yo uhule viligane na ivo Zumbe amsigiilaga Musa. 30 Aikaga kanga dya kuhakila hagati ye dihema na kilingo che nt'hambiko, niyo adimemeza mazi yo kuhaka. 31 Idyo nidyo wahakilaga mazi mikono ne viga awo Musa na Haluni hamwenga na wanawe. 32 Wahakaga mazi aho wengilaga kwe Dihema Dikukile hegu wakahasogeela kilingo che nt'hambiko viligane na ivo Zumbe amsigiile Musa. 33 Niyo Musa adamanya uwa uzunguluke Dihema Dikukile na hant'hu ho kulavila nt'hambiko no kutungika dipazia he nk'hili yo lwazo. Naivo Musa na want'hu wakwe wabindaga indima.

34 Naho vunde dyagubikaga Dihema Dikukile niyo ung'azi wa Zumbe wadimemeza. 35 Kwajili ya ayo Musa hadahaga kwingila kwe Dihema Dikukile. 36 Waizilaeli wasamizaga ink'hambi yawe kwita hatuhu aho divunde dyenuke kulawa he Dihema Dikukile. 37 Mna uneva divunde hadya sogele woho nawo hawakadaha kusogela mpaka idizuwa nedisogele idivunde. 38 Ivo divunde dya Zumbe dyagubikaga Dihema Dikukile umwo kwandaga nomsi, umoto nawo wakweelaga mwe divunde umwo kwandaga nekilo hameso ha Waizilaeli mwo utafi wawe wose.