1 Mkwewe dya Musa, uyo Yetilo mlava nt'hambiko ywa Midiani evaga ivo Mnungu awatendalaga want'hu wakwe Waizilaeli na Musa, na ivo awalavile Waizilaeli mwe isi ya Misili. 2 Yetilo mkwewe dya Musa amhokelaga Zipola uyo mkaziwe dya Musa, uyo amvuzaga kwa ise, 3 hamwenga na wana waidi wa Musa. Yumwenga etangagwa Gelishomu, kwaviya agambaga, "Hinda hiina ukaya mwe isi ya ugeni." 4 Yudya mtuhu nakamwink'ha zina niye Elieza kwaviya nakagamba, "Mnungu ywa tate nakanambiza nise kukomwa ni Falao." 5 Yetilo mkwewe dya Musa hamwenga na mkaza Musa na wadya wana wa Musa, waitaga kwa Musa uko kwe dijangwa aikaga ink'hambi kwo mnima wa Mnungu. 6 Musa eze agambilwe kugamba mkwewe hamwenga na mkaziwe na wanawe awaidi weza, 7 Musa agendaga kuwasingila naho amwinamilaga na kumnonela niyo wauzana ugima wawe kwa kila yumwenga niyo waita kwe nk'hambi. 8 Musa amgambilaga mkwewe ivo Mnungu amtendaga Falao na Wamisili kwa kuwatowanila Waizilaeli. Mna naho amgambilaga udala uwo waduganaga nawo want'hu mwe sila naivo Zumbe Mnungu awayokole. 9 Yetilo elelagwa umwo evaga ayedi yose yadamanywe ni Zumbe kwajili ya Waizilaeli mwo kuwayokola kulawa mwe mikono ya Wamisili, 10 niyo agamba, "Atogolwe Zumbe Mnungu awayokoleni kulawa kwa Falao na Wamisili! Atogolwe Zumbe awayokole want'hu kulawa mwo utumwa! 11 Haluse himanya kugamba Zumbe ni mkulu kujink'ha milungu yose kwaviya kawayokola want'hu kulawa kwa Wamisili awo wawatendelaga wiihi." 12 Yetilo mkwewe dya Musa amlavilaga Mnungu malavo ya koka na malavo matuhu. Haluni naye ezaga hamwenga na wadala wa Waizilaeli no kudya k'hande hamwenga na Yetilo kwa kumtogola Mnungu.

13 Zuwa ditimile, Musa ekalaga akalamula masa ya want'hu umsi mgima. Awo want'hu wandaga wamzunguluka msi mgima. 14 Yetilo eze aone ayo yose Musa naakawadamanyila want'hu, niyo agamba, "Ino niyo imbwai ukuwadamanyila want'hu? Nii wawalamula want'hu awa wikedu, wakanda wakimala kukuzunguluka kukongela mtondo mpaka kisingi?"

15 Musa amhitulaga Yetilo, "Vaniunga kudamanya ivi kwaviya want'hu wanibasa vileke wamanye ayo yakumwelela Mnungu. 16 Want'hu wanalemana nawalamula naho nawahiniza yakuungwa ni Mnungu na malagizo yakwe."

17 Mna Yetilo niyo amgamba, "Hukutenda vedi. 18 Wakesokeza weye mwenye hamwenga na want'hu awa, kwaviya ndima ino ikulisa, hukudaha kuidamanya wikedu. 19 Goja hwink'he ulangilizi wedi, Mnungu naye naakulongoze. Weye nouwakimaile want'hu hameso ha Mnungu no kumwigaila Mnungu masa yawe. 20 Naho uwahinyize sigilizi za Mnungu no kuwalagisa ivo wakuungwa kwikala na kiya wakuungwa kudamanya. 21 Hamwenga na ayo, usagule want'hu wata udahi naho wahuwilwa naho wakumwogoha Mnungu naho wakindedi wakuihiya ugoli wa ugulubanyi, wande vilongozi va want'hu. Uwapange mwe mafyo magana mlongo, naho magana kwa magana mashano naho kwa milongo. 22 Awa wasagulwe wawalamule want'hu mazuwa yose, wakwigaile du masa amadala, mna kwa masa yose madodo waleke walamule woho wenye. Aho nomnde hamwenga mwo kulamula ivo neikwik'he uhufu. 23 Uneva unadamanya ivo akuunga Mnungu, weye noukimale ngungulu, naho want'hu awa wose nawaite kwawe kwa utondowazi."

24 Niyo Musa amtegeleza mkwewe ivo alongile niyo adamanya enga ivo agambilwe. 25 Musa asagulaga wagosi wana udahi mwa Waizilaeli wose niyo awatenda kunda vilongozi mwa want'hu wose, vilongozi wa want'hu milongo magana na wa want'hu milongo mishano na wa milongo. 26 Naho wawalamulaga want'hu mazuwa yose mwa masa mahufu, mna amadala nayo wamwigailga Musa.

27 Eze ibinde ayo Musa amlagaga mkwewe, niyo Yetilo auya kwe isi yakwe.