1 Akajika Musa na Haluni waitaga kwa Falao no kumgamba, "Zumbe Mnungu ywa Izilaeli agamba, ‘walekele want'hu wangu waite, vileke wakadamanye wila kwajili yangu ukwo kwe dijangwa.’ "

2 Falao niyo agamba, "Uyo Zumbe ni ani? Naho nii nimwive hata niwalekele Waizilaeli waite? Himmanyize uyo Zumbe, naho heniwalekele Waizilaeli waite."

3 Musa na Haluni niyo wagamba, "Mnungu ywa Waibulania kakelaviliza kwetu. Kileke kiite utafi wa mazuwa matatu kwe dijangwa kikalave nt'hambiko kwa Zumbe Mnungu ywetu, anase akikome na maine, hegu kwa nk'hondo."

4 Mna Falao niyo awagamba, "Nyuwe Musa na Haluni, nii mwawatenda want'hu wase kudamanya ndima zawe? Wagambeni want'hu waite kwe zindima zawe!" 5 Falao niyo agamba, "Kauleni want'hu awa haluse wanda wengi kujink'ha wenye isi Wamisili, nanywe mwaunga waleke kudamanya ndima!"

6 Mwe dizuwa idia niyo awalagiza wakulu na wakimalizi wao akawagamba, 7 "Mse kuwenk'ha want'hu awo mani ya kudamanyila matofali. Walekeni waite wakakezunguile woho wenye. 8 Mna waungwa wadamanye matofali mwe miwazile iidya nawakadamanya nk'hongo disekuhunguka hata dimwenga, kwaviya hawana ndima ya kudamanya, nivo vikuleka wagutila wakagamba, ‘Kilekele kiite kikamlavile nt'hambiko Mnungu, ywetu.’ 9 Wenk'heni ndima ndala zitendese, naho msekuwaleka wategeleze mbuli za kuwaluvya."

10 Wakulu na wakimalizi wagendaga kuwagamba Waizilaeli, "Falao agamba, ‘Heniwenk'heni naho mani yo kudamanyila matofali. 11 Kagamba iteni mkakezunguile mani kokose kudya nomyaone, mwaungwa kuumba miwazile iidya ya matofali.’ " 12 Ivo want'hu niyo wagenda mwe Misili yose wakakezunguila mani yo kudamanyila matofali. 13 Wakimalizi wawatigizaga want'hu wakawagamba, "Bindeni indima yenyu ikuungwa kwa kila zuwa, enga iviya nomkadamanya umwo mwandile mkenk'higwa mani yo kudamanyila matofali." 14 Wakimalizi wa Wamisili wawatoaga, wakimalizi we Kiizilaeli wasagulwe kukimaila ndima wakawagamba, "Nii hambindile miwazile ya matofali yakuungwa, gulo na dielo, enga ivo nomkadamanya nk'hongo?"

15 Wakimalizii wa Waizilaeli waitaga kwa Falao, niyo wamwiila wakamgamba, "Nii wakitendela ivi suwe watumwa wako? 16 Hakink'higwe mani yo kudamanyila, mna wakigamba du kidamanye matofali! Naho suwe wandima wako chatoigwa. Mna naa want'hu wako wakubananga."

17 Niyo Falao awagamba, "Nyuwe wazokezi, naho hamkuunga kudamanya ndima, na ivo nivo vikuleka mwagamba, ‘Kilekele kiite kika mlavile nt'hambiko Mnungu ywetu.’ 18 Iteni mkadamanye ndima, kwaviya ho mwink'higwe mani yo kudamanyila, hamwenga na ivo mwaungwa kudamanya matofali mwe miwazile iidya." 19 Wakimalizi we Kiizilaeli nawabunk'hula kugamba we mwe makunt'ho aho weze wagambigwe, "Mwaungwa kudamanya matofali mwe miwazile iidya ya mazuwa yose enga ivo nomkadamanya."

20 Weze wahalawe ha Falao, nawadugana na Musa na Haluni awo wandile wakawagoja. 21 Wakimalizi niyo walonga na Musa na Haluni, "Zumbe kawaonani kiya mdamanye naho naawasengeleni kwaviya mumtenda Falao na wambizi wakwe wakiihiye. Nyuwe mnda chotoko cha suwe kukomwa."

22 Niyo Musa auya kaidi kwa Zumbe akamgamba, "Zumbe, nii wawatendela vihile want'hu wako? Nokunitumilai? 23 Kukongela aho nize niite kwa Falao kulonga naye kwe dizina dyako, yehe niyo wawatendela viihile want'hu wako, mna nawe hudamanye chochose kuwakombola!"