1 Ize ibule zuwa dya mlongo na shano mwo mwezi wa kaidi aho weze walawe mwe isi ya Misili, fyo dyose dya Waizilaeli dyatambaga dikalawa Elimu niyo dyabula Sini kwedijangwa hagati ya Elimu na Sinai. 2 Niyo fyo dyose dya Waizilaeli dyawalabila Musa na Haluni uko kwedijangwa, 3 wawagambaga, "Hegu nevinda vedi Zumbe Mnungu akikomile aho chandile mwe isi ya Misili. Ukwo nekikeguta kwa kudya nyama na mikate na k'hande nt'huhu zozose izo nekikaunga. Mna nyuwe mkigala mwe dijangwa idi vileke kikomwe ni sala idifyo dyose."

4 Zumbe niyo amgamba Musa, "Naunga niwatomoseleni nk'hande kulawa kwe mbingu enga fula. Want'hu nawalogote nk'hande ikuwakint'ha mwe dizuwa idyo dimwenga. Kwa kudamanya ivo nenimanye kugamba want'hu watimila sigilizi zangu hegu bule. 5 Mna mwe dizuwa dya mtandatu neniduganye nk'hande iyo nk'hanana mbili kujink'ha idya hutomosaga kwa zuwa dimwenga."

6 Musa na Haluni niyo wawagamba Waizilaeli, "Kisingi cha dielo niho nommanye kugamba Zumbe Mnungu niye awalavile mwe isi ya Misili. 7 Luvi mtondo nomuuone ung'azi wo undiilo wa Zumbe. Kwaviya keva ivo mkulabiila, suwe ni wahi hata mkilabiile suwe. Kwaviya suwe chawegailani du yadya akukisigiiila." 8 Naho Musa niyo agamba, "Luvi kisingi Zumbe naawenk'heni nyama vileke mdye, naho mtondo naawenk'heni mikate mdye mwigute, kwaviya yehe keva ivo mkumlabiila. msekukilabila suwe, mlabiileni Zumbe." 9 Musa niyo amgamba Haluni, "Gambila difyo dyose dya Waizilaeli, sogeleni hagihi na Zumbe Mnungu, kwaviya keva ukulabila kwenyu. " 10 Aho Haluni aze alonge ne difyo dya Waizilaeli want'hu wose wakaulaga kwedijangwa niyo wauona ung'azi wa Zumbe Mnungu mwa mavunde. 11 Zumbe Mnungu niyo alonga na Musa, 12 "Hiva ivo Waizilaeli wakulabila. Wagambile kugamba nawadye nyama kisingi, mtondo nawadye mikate niyo weguta. Niho nommanye kugamba ni miye Zumbe Mnungu ywawe."

13 Na mwalagulo, nk'wale zagubikaga ink'hambi yose, naho nomtondo kwandaga na mnyuzu kuzunguluka nk'ambi yose. 14 Mnyuzu uwo ukahalawa kwalailaga kint'hu king'aile chenele hasi kikwinga mkate msisili na ulegele. 15 Waizilaeli weze wakione weheelagwa wakauzana, "Iki kint'hu chani?" Woho hawakimanyize.

Mna Musa awagambaga, "Ino, ni nk'hande mwink'higwe ni Mnungu vileke mdye. 16 Naho Zumbe Mnungu kasigiila kugamba kila mnt'hu alogote vilgane naivo akudaha kwiguta. Mp'hishi imwenga kwa kila mnt'hu mwe mp'huga yakwe."

17 Nivo Waizilaeli wadamanyaga, wamwenga walogotaga nyingi, wamwenga walogotaga ngeke. 18 Mna wose wahimaga, wadya walogote ivingi hawa sigailagwa na kint'hu, wadya wabukulaga kugamba walogotaga vigeke hawa hungukilagwa na chochose, kila yumwenga alogataga kwa kihimo kiya nakaunga. 19 Musa niyo awagamba, "Mnt'hu yeyose asekusigaza vileke adye luvi." 20 Mna wamwenga hawamtegeleze Musa niyo waisigazaga. Zuwa ditimile nk'hande yaolaga niyo yanda na nt'hende. Musa awaonelaga maya awo want'hu. 21 Kila mtondo kila yumwenga aungwa kulogota viligane na viya akudaha kwiguta. Zuwa dikabwikana idya ink'hande isigale yalungumkaga.

22 Mwe dizuwa dya mtandatu Waizilaeli walogotaga nk'hande ya mazuwa maidi, walogotaga mp'hishi kane kwa kila mnt'hu, niyo vilongozi wa want'hu awo wagendaga kumgambila Musa imbuli iyo. 23 Musa awagambaga, "Zumbe nivo asigiile kugamba luvi ni zuwa dikukile dya kuhumula, idyo ni zuwa ngwa dya Zumbe. Yambikeni kiya mkuunga mwambike iivi dielo na chochose mkuunga mnyemse, nyemseni iivi dielo, na chochose kikusigala kiikeni vedi mpaka luvi." 24 Ivo waiikaga mpaka mtondo enga ivo Musa awagambile, nayo hayoile hegu kwingila nt'hende. 25 Musa awagambaga, "Dyeni dielo kwaviya dielo ni zuwa dya kuhumula dya Zumbe, dyelo homwuone nk'hande ukwo kuse. 26 Nomlogote nk'hande kwa mazuwa mtandatu, mna mwe dizuwa dya mfungate, ni dizuwa dyo kuhumula, aho homuone nk'hande."

27 Mwe dizuwa dya mfungate wamwenga waitaga wakalogote nk'hande mna hawaonaga kint'hu chochose. 28 Zumbe niyo amgamba Musa, "Want'hu awa nawalemele isigilizi na malagizo yangu mpaka ini? 29 Kumbukileni kugamba miye, Zumbe Mnungu, ni miye niwenk'hileni dizuwa dyo kuhumula, nivo vikulekeka mwe dizuwa dya mtandatu nawenk'hani nk'hande ikukint'ha na luvi yakwe. Mwe dizuwa dya mfungate kila mnt'hu aungwa asekuhalawa he kaya yakwe." 30 Naivo want'hu hawakudamanya ndima mwe dizuwa dya mfungate.

31 Waizilaeli waitangaga ink'hande idya mana. Yandaga enga mp'huluzi ndodo ing'aile, naho ina mwile enga mkate udamanywe na uki. 32 Niyo Musa agamba, "Zumbe kasigiila kugamba, nk'hande imwenga kiikile vyeleko vetu vikwiza vileke vione ink'hande iyo chadyaga umwo chandaga mwe dijangwa, aho kize kilawe Misili." 33 Niyo Musa amgamba Haluni, "Guha kizembe ugele mp'hishi imwenga ye imana, ukaiike hameso ya Zumbe, viikilwe veleko vetu." 34 Haluni aiikaga imana hakukile hameso ya Zumbe, viligane na ivo Zumbe Mnungu amsigiile Musa, vileke vidimwe vedi. 35 Waizilaeli wadyaga mana kwa miaka milongo mine mpaka aho weze wabule mwe isi walaganaga, isi imwe mihaka ya Kanani. 36 Mp'hishi nne ni kihimo cha mlongo kizoelwe kikwitangwa efa.