1 Zumbe niyo amgamba Musa, 2 "Nikukizile nt'hulasasu wa kilume wose, kwaviya nt'hulasasu wa kilume wose wa want'hu ne mifugwa wose wangu."

3 Musa awagambaga Waizilaeli, Kumbukileni dizuwa idi, nidyo dizua Zumbe Mnungu awalavagani mwe isi ya Misili uko mwandaga watumwa. Awalavaga kwa udahi mkulu. Msekudya mkate wowose ugeligwe ugwadu. 4 Mwahalawa zuwa dya dielo mwo mwezi uno wa nk'hongo, uno umwezi ukwitangwa Abibu. 5 Zumbe alaganaga kwa wakale wenyu kuwenk'hani isi kuwenk'hani isi Wakaanani na Wahiti na Waamoli na Wahivi na Wayebusi. Idya isi awagambilaga wakale wenyu kugamba naawenk'heni isi ina ulozo, niho nomwitendele wila wa nk'humbukila mwo mwezi uno kila mwaka. 6 Nomdye mikate heigeligwe ugwadu, naho mwe dizuwa dya mfungate nomdamanye wila wa kumvika Zumbe. 7 Kwa mazuwa mfungate nomdye mikate heigeligwe ugwadu. Kusekunda na mikate igeligwe ugwadu hegu ugwadu wowose mwa nyuwe na mwe isi yenyu yose. 8 Mwe dizuwa diya nomuwagambile wana wenyu kugamba chadamanya ivi kwa yadya Zumbe akidamanyilaga umwo chalawaga mwe isi ya Misili. 9 Ino neinde nk'humbukila kwenyu enga kint'hu kinyinyigwe mwo mkono wako hegu mwe kihanga. Vileke mazuwa yose mkumbukile mwiko wa Zumbe, kwaviya Zumbe kawalavani mwe isi ya Misili kwa udahi mkulu. 10 Ivo miaka yose nomtende wila wa nk'humbukila ye dizuwa idi, viligane na ivo viikigwe.

11 "Zumbe naawengizeni mwe isi ya Kaanani, enga ivo awalaganeni nyuwe na wakale wenyu, 12 nommwiikile Zumbe nt'hulasasu ywe kilume. Iviya iviya Nt'hulasasu zose ze mifugwa, zingosi nezinde za Zumbe. 13 Mna kwa nt'hulasasu za kilume za mp'hunda nouikombole kwa kuliha ngoto, hunaungile kuikombola nouungwe kuivuna isingo. Noumkombole nt'hulasasu yeyose ywa kilume mwa wanao. 14 Awana wenyu wakeza kuwauzani nii mwadamanya ivi, nivedi wakamanya kugamba, ‘Zumbe awalavagani Misili uko mwandaga watumwa kwa udahi mkulu. 15 Umwo Falao andaga na moyo mdala akakifingiza kuita, Zumbe awakomaga nt'hulasasu wose wa Misili wa want'hu na mifugwa yose. Ivo elo namlavila Zumbe malavo ya nt'hulasasu wose we mifugwa, mna neniwakombole nt'hulasasu wangu wose we kilume. 16 Ino neinde kiwalo mwo mkono wako, naho enga kiwalo mwe kihanga chako, kugamba Zumbe akilavaga mwe isi ya Misili kwa udahi mkulu.’"

17 Umwo Falao eze awalekele Waizilaeli waite, Mnungu haungile kuwalongoza kwombokela mwe isi ya Wafilisiti hamwenga na kugamba yandaga sila ngihi. Agambaga, "Sema want'hu wanadugane ne nk'hondo niyo wanahitule zifanyanyi zawe niyo wauya Misili." 18 Yehe Zumbe awalongozaga kuzunguluka kwombokela kwe dijangwa, no kuhinga kwe bahali ya Shamu. Waizilaeli wahalawaga mwe isi ya Misili wakekakile kwa nk'hondo.

19 Musa aguhaga mavuha ya Yusufu niyo awagamba Waizilaeli waike kilapi enga ivo mwenye asigiilaga umwo andaga akei kubanika. Agambaga, "Mnungu akeza kuwalavani kulawa mwe isi ya Misili, mwize mhalawe na mavuha yangu."

20 Waizilaeli wahalawaga kulawa Sukoti niyo wakuika nk'hambi uko Esamu mwo uheelo we dijangwa. 21 Vunde dya Zumbe enga mnala dyawalongoelaga nomsi, nekilo divunde nedinda moto uwalongoele ukuwazangazila, uwatendile wadahe kugenda kilo na msi. 22 Udya mnala niyo wawalongoza mwo lupisi lwa nomsi na udya we moto niyo wawalongoza nekilo, havalekile kuwalongoela Waizilaeli.