1 Musa na Haluni umwo wandile wakei mwe isi ya Misili Zumbe awagambaga, 2 "Mwezi uno nounde mwezi wa nk'hongo wo mwaka kwenyu. 3 Wagambile waizilaeli wose kugamba, mwe dizuwa dya mlongo mwo umwezi uno kila mp'huga neiguhe kadolome. 4 Mph'uga yakwe inandilisa ndodo, wande ndala ne mp'huga ya hagihi, waguhe kadolome kamwenga viligane ne miwazile ya want'hu wakwe, naho neipangigwe kwa kila yumwenga viligane naivo akudaha kudya na kubinda. 5 Saguleni kafulata hegu kadolome, mna kaungwa kabuile mwaka umwenga, naho kande hakeina lema dyodyose. 6 Nomkadime kafugwa ako mpaka mwe dizua dya mlongo na kane mwo mwezi uno. Want'hu wose wa Izilaeli nawavichinje mwalagulo mwe dizuwa idyo. 7 Niho nawaguhe isakame ye vifugwa niyo wahakiza mwe mikimailo ne kizingiti che zinyivi ze zinyumba zia nezidiilwe zinyama izo. 8 Kilo iicho waidye inyama iyo, naho inde yokigwa, nawaidye hamwenga na mikate heiina ugwadu na mboga zisungu za mani. 9 Mse kuidya imbisi, hegu yo kunyemsa mwa mazi, mna inde yo kwanika mwo moto, no mtwi wakwe ne viga vakwe ne vilungo va kundani. 10 Naho mse kusigaza nyama yoyose mpaka mtondo. Nyama ikuunga isigale mpaka mtondo yokigwe moto. 11 Nomwiidye mkanda mkekaka misipi mwe vigudi na makwapa yenyu mwe viga na ngoda zenyu mwe mikono naho nomdye kinguvunguvu. Iyo niyo ipasaka ya Zumbe.

12 "Nenomboke ikilo icho mwe isi ya Misili niwakome nt'hulasasu wose wa want'hu na makala, nenombose usengelo mwe milungu ya Misili. Ni miye Zumbe. 13 Idya isakame mwe mikimailo ye zinyivi zenyu neinde ni vilagiso ve zinyumba izo mkwikala. Heza kuiona isakame nenizijik'he zinyumba mwenyu. Umo heza kuitowa isi ya Misili hombwiilwe ni ubanangi wowose. 14 Zuwa idi nedinde dya kukumbukilwa kwenyu. Nedinde zuwa dya kinyemi dya Zumbe, nomtende ivo kwa vyeleko venyu vose vikwiza."

15 Zumbe niyo agamba, "Kwa mazuwa mfungate hamkuungwa kudya mikate heigeligwe ugwadu. Nomuuse ugwadu mwe nyumba zenyu mwe dizuwa dya nk'hongo mwa mazuwa ayo mfungate. Mwa mazuwa ayo mfungate, yeyose akuunga adye kint'hu kina ugwadu haande ni yumwenga mwa want'hu wa Izilaeli. 16 Nomdugane kwa kunivika miye mwe dizuwa dya nk'hongo na zuwa dya mfungate. Mnt'hu yeyose haaungwe adamanye ndima mwa mazuwa ayo. Nomlekelwe kwambika nk'hande, iiyo du. 17 Kumbukileni kwa kinyemi dizuwa idi dye mikate heigeligwe ugwadu kwaviya mwe dizuwa idi nidyo niwalavile nyuwe Waizilaeli kulawa mwe isi ya Misili. Zuwa idi nedikumbukilwe kwa kinyemi mazuwa yose mwe vyeleko venyu vose vikwiza, ino ni sigilizi ya mazuwa yose. 18 Kukongela kisingi che dizuwa dya mlongo na kane yo mwezi wa nk'hongo mpaka kisingi che dizuwa dya milongo miidi na imwenga, mwo mwezi uuwo homdye mikate igeligwe ugwadu. 19 Kuse kunda na ugwadu wowose mwe zinyumba zenyu kwa mazuwa mfungate. 20 Hohose no mwikale msekudya chochose kina ugwadu. Mwaungwa kudya mikate heiina ugwadu."

21 Musa awetangaga wadala wose wa Izilaeli niyo awagamba, "Kila yumwenga akasagule kadolome hegu kavulata viligane no wingi wa want'hu we mp'huga yakwe akakachinje kwajili yo kudya Pasaka. 22 Guheni sambwe no kuitufika mwe sakame, mkahakize mwe mikimailo miidi ye zinyivi ne kizingiti ve zinyumba zenyu. Mnt'hu yeyose ase kufosa kuse mpaka mtondo. 23 Kwaviya Zumbe akeza kwomboka mwe isi ya Misili akawakome want'hu wa Misili, naaione isakame niyo awagamba mkomi wase kwingila mwe zinyumba zenyu awakomeni. 24 Muitoze isigilizi ino nyuwe na wana wenyu inde ni ya mazuwa yose. 25 Naho nomdamanye kihendo iki umwo mkeza kwingila mwe isi idya Zumbe agambile naawenk'heni. 26 Naho wana wenyu wakeza kuwauzani, kihendo iki ni kint'hu chani? 27 Nomuwagambe, ‘Ni nt'hambiko ya kumtunya Zumbe ikwitangwa pasaka kwaviya ombokaga zinyumba zetu haheina kukikoma suwe umwo akaita kwo kuwakoma Wamisili.’ "

Waizilaeli wafunamaga na kumvika. 28 Waizilaeli wagendaga kudamanya vilagane na viya Zumbe awasigiilaga Musa na Haluni.

29 Aho kilo cha gati Zumbe awakomaga nt'hulasasu wose wa Misili, kukongela ywa Falao mkipe ywakwe ywe kiseuta na wo mvugailwa mwa mavugailo na nt'hulasasu wa mifugwa. 30 Falao hamwenga na vilongozi weyawe na want'hu wose wa Misili wenukaga ikilo icho. Kwandaga na ndilo nk'hulu mwe isi yose ya Misili, hakwandaga na nyumba yeyose ya Mmisili yaswesaga mnt'hu abanike.

31 Falao niyo awetanga Musa na Haluni ikilo kiya no kuwagamba, "Inukeni, halaweni ha want'hu wangu, iteni nyuwe na Waizilaeli, iteni mkamvike Zumbe enga ivo nomkaunga. 32 Guheni mafyo yenyu ye zingoto ne zing'ombe zenyu ne zimbuzi mkeitile. Mkanivikile miye name."

33 Wamisili wawatigizaga waizilaeli wakagamba, "Hamnasunguze kuhalawa mwe isi ino, suwe nekibanike pele." 34 Ivo Waizilaeli waguhaga unga wawe we mikate heigeligwe ugwadu, ne zinyiga zawe zo kwambikila wahagate mwa maega yawe zifungigwe mwe zisuke. 35 Waizilaeli wadamanyaga enga ivo Musa awagambaga wadamanye, wawaungaga Wamisili wawenk'he vint'hu va zahabu na va masawa hamwenga na suke. 36 Zumbe awatendaga Wamisili wawaunge Waizilaeli, niyo wawenk'ha chochose kiya walombezaga. Ivi nivo Waizilaeli wawahokile ugoli wawe Wamisili.

37 Waizilaeli magana mtandatu alufu hahewazigwe wavele na wana, wamlawaga mwo mzi wa Lamesesi, wakagenda lwa viga kuita Sukothi. 38 Want'hu wengi waitaga hamwenga nawo na ngoto na mbuzi nyingi hamwenga na ng'ombe. 39 Kwaviya wandaga wahalawa Misili kwa kusunguza hawadahaga kudamanya nk'hande ya mwo utafi. Unga udya nouhanganywa du haheina kugeligwa ugwadu.

40 Waizilaeli wekalaga mwe isi ya Misili kwa miaka magana mane na milongo mitatu. 41 Mwe dizuwa iidyo kubindiliza umwaka uwo we digana dya kane ne milongo mitatu, niho want'hu wose wa Zumbe wamlawaga mwe isi ya Misili. 42 Ni kilo cha kukumbukilwa ni Waizilaeli ne vyeleko vawe vose, kugamba idi ni zuwa dya Zumbe achelezaga akawalava want'hu wakwe kulawa mwe isi ya Misili. Ni kilo cha n'cheleza kwa Waizilaeli kwa kumtunya Zumbe.

43 Zumbe awagambaga Musa na Haluni, "Miko ye Pasaka ni ino. Mgeni yeyose haadye ludyo lwe Pasaka, 44 mna mgeni yeyose aguligwe ande kuvinilwa niho adye uludyo lwe Pasaka. 45 Mtafi na mtumwa ywa kulihwa kwa zuwa asekudya uludyo lwe Pasaka. 46 Kadolome ke pasaka kadiilwe mwe nyumba iiyo ichijilwe, nyama yakwe ise kulavigwa kuse ye nyumba idya ichinjilwe naho mavuha yakwe yase kutulwa. 47 Want'hu wose wa Izilaeli waungwa kuikumbukila no kudya uludyo lwe Pasaka, 48 mnt'hu hevinilwe asekudya uludyo lwe pasaka. Uneva mgeni yeyose aunga kudya pasaka hamwenga na nyuwe kwa kumvika Zumbe, vaungwa ande kuvinilwa hamwenga na wagosi we mp'huga yakwe yose. Aho niho naande enga Muizilaeli mkaya akudaha kudya pasaka ya Zumbe hamwenga na nyuwe. 49 Wakaya na watakwiza wakwikala mwenyu wose nawatimile miko iiyo." 50 Waizilaeli wose watozaga imiko iyo wevaga niyo wadamanyaga viligane na ivo Zumbe awasigiilaga Musa na Haluni. 51 Mwe dizuwa iidyo Zumbe ayalavaga mafyo ya Waizilaeli kulawa Misili.