1 Wamsumilaga Haluni suke zikukile enga ivo Mnungu amsigiilaga Musa kwa nyuzi zibuluu na zambalau na ink'hundu. Wadamanyaga suke zo undima wo ulavant'hambiko wa Hant'hu Hakukile. Wamsumilaga Haluni suke zikukile enga ivo Mnungu amsigiilaga Musa.

2 Adamanyaga kazibao ka nyuzi za zahabu na mazoya ya ngoto ya buluu na zambalau na yenk'hundu no kuzifuma mwe kitambala chedi kinga'ile kibilingwe. 3 Aisanaga izahabu iyo niyo yanda matanaki masisili na kudamanya inde nyuzi vileke wailuke hamwenga ne zilangi ze buluu ne ze zambalau na zink'hundu na ziya zidamanywe vedi ni mmanyi. 4 Akidamanyilaga kizibao icho misipi miidi ya mwa maega ilunganywe hamwenga nacho mwe zimp'hembe zakwe naivo zidahe kukelunga hamwenga. 5 Udya mkowa ulukigwe kwa unt'handa wandaga kint'hu kimwenga ne kizubao naho kidamanywa na zahabu na nyuzi za buluu na zambalau na zink'hundu na kitambala chedi king'aile kibilingwe enga ivo Zumbe Mnungu amsigiilaga Musa. 6 Yadya maiwe yakwitangwa shohamu wayadamanyaga no kuyanamatizwa mwo lupapi lwe zahabu, no kuyatuluma mazina mlongo na maidi ya wana wa Izilaeli enga ivomnt'hu akutuluma kiwalo. 7 Wayanamatizaga maiwe ayo mwe misipi ya mwa maega ye kizubao vileke vinde lukumbusa kwa wana wa Izilaeli enga ivo Zumbe amsigiilaga Musa.

8 Kafuko ka mwe kifuwa wakadamanyaga kwa umanyi enga ivo kidamanywe kizibau kwa nyuzi za zahabu na za buluu na za zambalau na nyuzi zink'hundu na kitambala chedi king'aile kibilingwe. 9 Chandaga kiligana kosekose. Nyanda mlongo umwenga utali no uzangalamu wakwe. 10 Waikaga safa nne za maiwe ya yombe kulu uumwo, mwe safa ya nk'hongo waikaga lubi na topazi na ganeti. 11 Mwo msafa wa kaidi waikaga amalodi na safaya na alimasi ing'aile. 12 Mwo msafa wa katatu mwandaga yasisto na akiki na masisti. 13 Naho mwo msafa wa kane mwandaga ni zamalajadi na shohamu na yasipi, ivo vose nevigeligwa mwo vitozelo ve zahabu. 14 Naho kwandaga na maiwe mlongo na maidi, kila dimwenga dyandaga na zina dya mazina ya wana wa Izilaeli, kila dimwenga ditulumilwa zina dimwenga mwa mazina ya wana wa Izilaeli enga kiwalo. 15 Wadamanyaga mikufu ya zahabu yedi ibilingwe enga sigi kwajili ye kafuko ka mwe kifua. 16 Wadamanyaga mp'hapi mbili za zahabu na mp'hete mbili za zahabu wazinamatiza mwe mikufu miidi mnanga mwe zimp'hembe ze kafuko ka mwe kifuwa. 17 Iyo mikufu miidi ye zahabu wainamatizaga mwe zimp'hete zimbili, 18 zia zimp'hembe zimbili ze mikufu ye zahabu wazinamatizaga kulongole mwe vipande ve kizibau. 19 Wadamanyaga mp'hete mbili za zahabu no kuzinamatiza mwe zimp'hembe za hasi ya kafuko ka mwe kifuwa mwe mp'hembe ya kundani ikutimila kwe kizibau. 20 Naho wongezaga mp'hete mbili za zahabu niyo wazinamatiza hasi ye zimp'hembe kulongole ye kiya kizibau hagihi ne kifungo chakwe naho halanga yo uwo msipi we kizubao kitulumwe vedi. 21 Naho wanyinyaga izimp'hete za kafuko ka mwe kifuwa mwe zimp'hete ze kizibau kwa kazigi ka buluu vileke akafuko ka mwe kifuwa kasekuhoela kuse ye kizibau, enga ivo Zumbe Mnungu amsigiile Musa.

22 Naho ink'hazu iyo yose yandaga ya kitambala cha buluu kitile kufumigwa. 23 Nk'hazu yandaga na pwazi dya kombosela umtwi hagati. Nayo neizungulusilwa mp'hindilo vileke ise kutatuka. 24 Wadamanyaga makomamanga ya buluu na zambalau na ink'hundu na nyuzi zibilingwe vedi kuzunguluka imp'hindilo yose ye nk'hazu. 25 naho wadamanyaga mbugi za zahabu yedi no kuzinamatiza kuzunguluka imp'hindilo hagati ya makomamanga. 26 Zimbugi izo na makomamanga yakedongaga kuzunguluka imp'hindilo yose ye nk'hazu kwa hasi kunda mwo undima enga ivo Zumbe amsigiilaga Musa.

27 Wawadamanyilaga Haluni na wanawe shati nt'hali zifumigwe kwa kitambala chedi king'aile, 28 shati ne kilemba cha kitambala chedi king'aile na nk'hofia za kitambala chedi king'aile na kaputula za kitamabala chedi king'aile kifumigwe, 29 no msipi wa kitambala chedi king'aile zifumigwe kwa mazoya ya ngoto ye buluu na ya zambalau na zink'hundu zitulumwe vedi enga ivo Zumbe Mnungu amsigiile Musa. 30 Wadamanyaga hambo dya zahabu yedi kwajili ye taji ikukile niyo wadituluma mawandiko yakugamba, "Kakuka kwa Zumbe". 31 Wadinyinyaga kulongole mwe icho kilemba kwa luzigi lwa langi ya buluu enga ivo Zumbe Mnungu amsigiilaga Musa.

32 Ivo ndima yose ye Dihema Dikukile yajikaga. Waizilaeli wadamanyaga kila kint'hu enga ivo Zumbe amsigiilaga Musa. 33 Aho niyo wadigala Dihema hamwenga ne vint'hu vakwe vose kwa Musa, zinduwano zakwe ne fulemu zakwe ne zimp'hapi zakwe ne mikimailo yakwe ne visimiko vakwe, 34 ngubiko yakwe ya nk'hingo ihuhile ya kala dya kwebahali ikizigwe langi ink'hundu, na ngubiko ya nk'hingo yedi ya kala dya kwe bahali idamanywe vedi ne dipazia dya hant'hu hakukile, 35 Disanduku dye Ndagano ne mikimaila yakwe hamwenga ne ngubiko aho hakwitangwa hant'hu he zimbazi, 36 imeza ne vint'hu vakwe vose hamwenga ne Mikate Ikukile, 37 ne kinala che vimuli vidamanywe kwa zahabu yedi ne vimuli vakwe hamwenga ne vint'hu vakwe na mavuta ye vimuli, 38 kilingo cha kutambikila na mavuta yo kuhaka no ubani wa mhemp'he ne dipazia dye nk'hili ye dihema, 39 naho kilingo che nt'hambiko kidamanywe kwa shaba hamwenga ne zinyavu zakwe ze shaba ne mikimailo yakwe ne vint'hu vakwe vose, 40 mapazia ye nk'hili yo lwazo ne mikimailo yakwe ne visimiko vakwe ne dipazia dye nk'hili y lwazo ne zisigi zakwe ne vigingi vakwe ne vint'hu vose ve dihema, idyo Dihema Dikukile, 41 naho zisuke zose zidamanywe vedi kwa undima wa Hant'hu Hakukile kwa hamwenga ne zisuke zikukile za Haluni mlavant'hambiko na za wanawe umwo wakanda mwo undima enga walavant'hambiko. 42 Waizilaeli waidamanyaga indima yose enga ivo Zumbe amsigiilaga Musa. 43 Musa awavikilaga aho eze aone kugamba waidamanya indima enga ivo Zumbe asigiile.