1 "Uzenge kint'hu enga sanduku kwa mizengo ya msaji idyo dikwitangwa kilingo cha kutambikila. Utali wakwe no uzangalamu wakwe viligane, vose vinde mp'hima shano shano, mna kuita kulanga kwakwe nedinde mp'hima nt'hatu. 2 Udamanye vihembe vine mwe zint'huzi zakwe izine. Ivo vihembe ivine nevinde kint'hu kimwenga na hant'hu ho kulavila nt'hambiko, naho uhakizige shaba. 3 Nouhadamanyile vint'hu vakwe vose kwa shaba. Nyungu za kuusila maivu na machepe yakwe nana nyiga za kumyagila, na uma za kutozela nyama navitozelo va makala yo moto. 4 Aho kilingo cha kutambikila, uhadamanyile wavu wa shaba una mp'hete nne za shaba mwe zimp'hembe zakwe zinne. 5 Ugele wavu uwo hasi yo mzinganizo ukuzunguluka aho ho kulavila nt'hambiko vileke uwavu uwo ubule mgatigati yakwe. 6 Uguhe ziti dya msaji niyo wadamanya mikimailo no kuikiziga shaba. Iyo neinde ya kwinuila aho hant'hu ho kulavila nt'hambiko. 7 Mikimailo iyo neisomekwe mwe zimp'hete. Naho neinde mwe zint'hendelo zimbili za kilingo cha kutambikila umwo hant'hu aho hakenulwa. 8 Noudamanye aho hant'hu ho kulavila nt'hambiko hande na wazi hagati naho hadamanywe kwa mbao enga viya ulagiswe kudya kwo mnima.

9 "Udamanye chumba che midugano, nt'hendelo ya Kwa mwenye mzi nokunde na pazia dya suke yedi ing'aile didamanywe na nyuzi zedi zibilingwe, utali wakwe nounde mp'hima gana. 10 Mikimailo yakwe neinde milongo miidi ya shaba ne visimiko vakwe milongo miidi navo nevinde va shaba, nduwano zakwe ne nk'hombosha yakwe nevinde va masawa. 11 Nt'hendelo ya kaskazini nayo neinde na utali wa mp'hima gana na mikimailo milongo miidi na visimiko milongo miidi va shaba. Nduwano ne mikiki ne mikimailo yakwe vinde va masawa. 12 Kwe nt'hendelo ya usweelo wa zuwa wo uwa uwo nokunde na pazia dya mp'hima milongo mishano, mapazia yakwe nayenulwe ni mikimailo, naho kila mkimailo nounde na kisimiko kimwenga. 13 Naho uzangalamu wo uwa uwo kwe nt'hendelo ya ulailo wa zuwa kuhinga ulailo wa zuwa unde mp'hima milongo mishano. 14 Uzangalamu we dipazia kwe nt'hendelo imwenga ye nk'hili neinde mp'hima mlongo na shano mikimailo yakwe neinde ni mitatu, visimiko vakwe navo nevinde vitatu. 15 Kwe kila nt'hendelo ye nk'hili kunde na pazia dya mp'hima mlongo na shano na mikimailo mitatu na visimiko vitatu. 16 Ink'hili yenye neinde na pazia dya langi ing'aile na utali wakwe nounde mp'hima milongo miidi, idamanywe na langi ya buluu na zambalau na ink'hundu. Pazia idyo neditozelezwe na mikimailo mine na visimiko vine. 17 Mikimailo yose izunguluke uwa udya nt'hendelo zose nezinde na nduano zidamanywe kwa masawa, na mikiki ne zinduwano zakwe nevinde ya masawa, visimiko vakwe navo nevinde va shaba. 18 Uwa wo lwazo nounde na utali wa mp'hima gana dimwenga, uzangalamu wakwe nawo nounde mp'hima milongo mishano nt'hendelo zose na suke zakwe zidamanywe kwa kitambala king'aile zinde na utali wa kiuta kulanga mp'hima shano nt'hendelo zose, na visimiko vakwe va shaba. 19 Vint'hu vituhu vose ve ndima ya kwe dihema vikanda hamwenga ne viyamp'ha vakwe ne zimambo zakwe zinde za shaba.

20 "Wagambe want'hu wa Izilaeli wegale mavuta yatendese uwedi ya zeituni yo kukwelezela vimuli vileke vigendeele kukweela mazuwa yose. 21 Haluni na wanawe nawaike vimuli vikukweela hameso ha Zumbe kukongela kisingi mpaka mtondo kundani kwe Dihema Dikukile na kuse ye dipazia dihalongole ye Disanduku dye Ndagano. Iki nekinde cha mazuwa yose kwa Waizilaeli ne vyeleko vawe vose.