1 Musa hamwenga na waizilaeli wamkemela Zumbe wila wakagamba,

"Nenimkemele Zumbe wila kwaviya ni mhumi wa kweduvya,

Falasi na wose wakuzigendeza kawaduula mwe bahali.

2 Zumbe nulo ludole lwangu no udahi wangu,

yehe kanda ukombola wangu,

Ni yehe Mnungu ywangu, neni mtogole,

Mnungu dya tate, nenikeme kwajili yo ukulu wakwe.

3 Zumbe niye mhumi kwe nk'hondo,

Zumbe, nidyo dizina dyakwe.

4 Magali ya Falao na watowani kayatubwika mwe bahali,

wambizi wakwe wakulu wadidimila mwe bahali ya Shamu.

5 Wadidimila kundani kwa mazi matali,

wadidimila enga iwe.

6 Weye Zumbe, udahi wako mkulu utogoleswa,

weye Zumbe mkono wako we kulume uwatulatula wank'hondo kwa udahi wako ukulise.

7 Kwa ukulu wako utendese wawakoma wakukuhiga,

wawavila kwa maya yako niyo wawahilisa enga mabuwa.

8 Kuivila ibahali kwa kuivila niyo yakeika hamwenga,

yakimaalaga enga nk'handula,

hadya handaga na mazi yagandile.

9 Mnk'hondo nakagamba, ‘Neniwakulumbuze niyo nawagwila

nenipange ugoli wawe mpaka kw'hina zangu zisile niyo naguha vose huunga

Nekisomole mabamba yetu yakutwa kosekose niyo chawakoma kwa mikono yetu.’

10 Mna weye Zumbe nokwigala nk'hungunt'ho nk'hulu niyo Wamisili wagubikwa ni bahali,

nawadidimila mwa mazi yakutisa enga kint'hu iwe ditogile.

11 Zumbe mwe milungu yose, niani akwinga weye?

Niani enga weye, ukweheela mwo kukuka kwako?

Akudaha kudamanya vihungi no udamanyai wa udahi enga uwako? 12 Mkono wako wa kulume uta udahi kuuchulula,

niyo wank'hondo wetu wameligwa ni sanga.

13 kwa uwedi wako mkulu kuwalongoza want'hu uwakombole,

kwa ludole lwako kuwalongoza kwo ukalo wako ukukile.

14 Want'hu wa si zose naweve niyo wazingiza kwa wagohi,

want'hu wa Wafilisiti nawatisigwe.

15 Vilongozi wa Edomu wagelagwa kinyulu,

want'hu wata udahi wa Moabu wengilwa ni kizingizo,

want'hu wa Kanani wafaga chevu.

16 Kutisa na wogohi neviwatimile.

Kwa ludole lwo mkono wako,

hawaunge wambizi, wanyamala enga iwe,

want'hu wako weye Zumbe Mnungu mpaka womboke,

awant'hu wako uwakombole kulawa kwo utumwa.

17 Weye nouwegale niyo wawahika vileke wekale

mwo mnima wako ukukile

aho uhadamanye weye kwa ukalo wako weye Zumbe Mnungu, hant'hu hakukile uhadamanye weye Zumbe.

18 Weye Zumbe Mnungu, noulongoze

mazuwa yose."

19 Mwe zifalasi za Falao na magali na awo wakuzigendeza weze wabule mwe bahali, Zumbe Mnungu ayavuzaga amazi ye bahali kunyuma niyo yawagubika. Mna Waizilaeli wagendaga mwe bahali mwe sanga inyaile. 20 Mlotezi Mliamu, uyo lumbudye mkulu dya Haluni, aguhaga kagoma niyo akatowa no kuvina, wavele wose wandaga na vigoma vawe wakavina. 21 Miliamu awalongozaga ukemi,

" Mkemeleni Zumbe

kwaviya katogoleswa

kaziduula zifalasi mwe bahali hamwenga na wadya wakuzigendeza."

22 Niyo Musa awalongoza want'hu kulawa kwe Bahali ya Shamu no mpaka hant'hu he dijangwa dya Shuli. Wagendaga mwe dijangwa kwa mazuwa matatu haheina kuona mazi. 23 Weze wabule hant'hu hakwitangwa Mala, wadundugaga kunywa amazi ayo kwaviya mazi yakwe yandaga yesungu. Ivi nivo vikuleka hant'hu aho hakwitangwa Mala. 24 Ivo niyo want'hu wamkalaliza Musa wakamgamba, "Haluse chaunga kinywei?"

25 Musa amwiilaga Zumbe Mnungu, niyo Zumbe amlagisa lukuni. Aluduulaga mwa mazi niyo amazi yanda yemwiile.

Zumbe awenk'haga miko yo wikazi, naho awagezaga amanye utogi wawe. 26 Awagambaga, "Uneva nomtimile kwa wengele kiya hulonga miye Zumbe Mnungu ywenyu na kudamanya yakunelela, uneva mna yeve yadya huwasigiilani, ivo heniwatoeni kwa maine enga yadya niwatowele Wamisili. Kwaviya ni miye Zumbe Mnungu akuwahonyani nyuwe."

27 Waizilaeli wabulaga hant'hu hakwitangwa Elimu, ukwo kwandaga na n'choko milongo na mbili na mitende milongo mfungate. Waikaga nk'hambi yawe aho hagihi na mazi.