1 Mwa mazuwa ayo mnt'hu yumwenga mwo lukolo lwa Lawi, alombaga mvele ywa mwo lukolo uulo, 2 yudya mvele enulaga ubovu no kwingila nyumba mwana kilume. Eze aone kugamba yudya mwana andaga mtana amfisaga kwa miezi mitatu. 3 Mna eze ande hakudaha kugendeela kumfisa, aguhaga katenga kalukigwe kwa ndulutu niyo akakiziga lami vileke kase kombosa mazi. Niyo amwiika umwana mwa katenga no kumfisa hana mani matali mnk'handa yo mto Naili. 4 Lumbudye dya kadya kazana akefisaga hagihi na aho akaule nekikaunga kilaile kwa kadya kazana.

5 Mwana kike ywa Falao agendaga kuhaka mazi kwo mto, wandima wakwe wa kivele nawo nawakagenda mnk'handa yo mto. Aaho akaonanaga katenga mudya mwe ndulutu niyo awagamba wandima wakwe wa kivele wakakaguhe waite nako kaya. 6 Yudya mwanakike ywa Falao eze akagubule katenga akaonaga kazana. Kandaga kakaila, niyo akaonela mbazi, niyo agamba, "Kwa vovose kazana aka ka Kiibulania."

7 Niyo lumbudye dya kadya kazana akelavilizaga niyo amgamba yudya mwana kike ywa Falao, "Haluse niite hakuzunguile mvele ywa Kiibulania eze akonk'hezele umwana uyu?"

8 Yudya mwanakike ywa Falao niyo amhitula, "Heiye ita ukamwitange." Ivo yudya lumbudye niyo agenda kumguha nine dyo mwana. 9 Mwanakike ywa Falao niyo amgamba, "Kaguhe kazana aka niyo wanonk'hezela, name nohulihe." Ivo yudya mvele akaguhaga kazana niyo akonk'heza. 10 Umwo kadya kazana keze kalekezwe ukonk'ha, yudya mvele niyo akegala kwa mwanakike ywa Falao akaguhaga no kukatenda kunda kakwe. Niyo aketanga Musa, akagamba, "Kwaviya nehikalava mwa mazi."

11 Umwo Musa eze ande mnt'hu mgima, afosaga kugenda kuwatalamkila Waibulania weyawe, niyo awaona ivo wakudamanyizwa ndima ndala. Naho nakaona ivo Mmisili amkomaga Muibulania uyo andaga nduguye dya Musa. 12 Niyo Musa akaula uku na kudya, no kuwona kugamba hahana mnt'hu yeyose, niyo amkoma yudya Mmisili no kumfukila mwo msanga. 13 Naho mwe dizuwa dya kaidi Musa eze afose, aonanga Waibulania waidi wakatowana. Niyo amuuza yudya mta masa, "Nii wamtowa Mwibulania miyao?"

14 Yudya mnt'hu niyo ahitula, "Niani akuikile kunda kilongozi na mlamuzi ywetu? Weye waunga unikome enga viya umkomile yudya Mmisili?" Musa niyo ogoha na kufanyanya akagamba, "Want'hu wamanya kiya nidamanye." 15 Falao eze eve icho kilaile, aungaga amkome Musa.

Mna Musa anyilikaga niyo agenda kwikala kwe isi ya Mediani. Zuwa dimwenga umwo Musa andaga ekale he disima, 16 wana kike mfungate wa Yetulo, mlavant'hambiko ywa Midiani wezaga kuteka mazi no kumemeza mahondo vileke zingoto ne zimbuzi za tati yawe zinywe. 17 Wadimi watuhu wezaga kuwagulusa wadya wanakike wa Yetulo, mna Musa agendaga kuwambiza wadya wanakike kuwahiga wadya wadimi watuhu. Niyo amemeza mazi mwa mahondo vileke mifugwa yawe inywe. 18 Weze wauye kaya, Lueli tati yawe uyo naho akwitamgwa Yetulo awauzaga, "Nii dielo msunguzisa kuuya?"

19 Wamhitulaga tati yawe wakagamba, "Mmisili yumwenga kakihonya no wiihi wa wadya wadimi watuhu, naho hamwenga na ayo kateka mazi no kuywesa imifugwa yetu."

20 Yetulo niyo awauza wanawe we kike, "Haluse ekuhi? Nii mkamleka uyo mnt'hu? Iteni mkamguhe eze adye."

21 Musa azumilaga kwikala kwa yudya mnt'hu, naho yudya mnt'hu amlozaga Musa kwa mwanawe Zipola, 22 Zipola niyo amwelekela Musa mwana kilume, niyo amwink'ha zina niye Gelishom. Nuko kugamba, "Miye ni mgeni."

23 Kwa miaka mingi kulongole Falao abanikaga, mna Waizilaeli wandaga wakei kulugumila kwo utumwa udya wandile nawo. Niyo waila kwa kuunga wambizi, ndilo yawe yabulaga kwa Mnungu. 24 Mnungu awevaga wakalugumila niyo akumbukila Indagano yakwe na Ibulahimu na Isaka na Yakobo. 25 Ivo Mnungu awakaulaga Waizilaeli no kuwaonela mbazi.