1 "Weye Musa, unigaile nduguyo Haluni na wanawe awo Nadabu na Abihu na Eleazali na Isamali kulawa mwa Waizilaeli, wanidamanyile ndima yo ulava nt'hambiko. 2 Msumile nduguyo Haluni suke ya ikukile yo ulava nt'hambiko aoneke kunda na nt'hogola no uwedi. 3 Nawe uwetange want'hu wose wamanyi awo niwenk'hile umanyi we kindedi wamdamanyile Haluni suke vilele aikwe mwo undima wo ulava nt'hambiko. 4 Uwagambe wadamanye kafuko ka mwe kifua na kizibau na nk'hazu ihambigwe vedi na kilemba na mkoa, naho wawadamanyile Haluni nduguyo na wanawe suke zikukile vileke wanidamanyile ndima yo ulava nt'hambiko. 5 Awo wamanyi waguhe nyuzi za zahabu na suke ya buluu na zambalau na ink'hundu na kitambala chedi king'aile.

6 "Wamanyi wadamanye kizibao kwa nyuzi za langi ya zahabu na za buluu na zambalau na zink'hundu na kitambala chedi king'aile, kihambigwe kwa umanyi. 7 Kizibao icho nekinde na misipi miidi ya kusodekela mwa mayega ne zimp'hembe zakwe. 8 Umkoa wo kukitozela udamanywe kwa vint'hu iivo nouluganywe ne kizibao vileke unde kint'hu kimwenga no mkoa uwo. 9 Nouguhe maiwe maidi ye kwani niyo watuluma uumwo mazina mlongo na maidi ya wana wa Yakobo, 10 ukatimila ivo welekwe, mazina mtandatu mwe diiwe dimwenga, mazina matuhu mtandatu mwe diiwe dituhu. 11 Enga viya msongoli akutuluma mwe viwalo, nouyatulume ayo maiwe maidi vikuligana na mazina ya wana mlongo na waidi ya wana Izilaeli naho uvinamatize mwe vitozelo visanigwe kwa zahabu. 12 Maiwe ayo maidi nouyaike mnanga mwe misipiye kizibau yande lukumbusa lwa makabila mlongo na maidi ya Izilaeli. Kwa ivi Haluni naayenule mazina mwa maega yakwe vile miye Zumbe nenikumbukile want'hu wangu mazuwa yose. 13 Noudamanye vitozelo viidi visanigwe kwa zahabu 14 na mikufu miidi ya zahabu yedi ibilingwe enga sigi no kuinamatiza mwe vitozelo visanigwe kwa zahabu.

15 "Usume kafuko kakukile ka mlavant'hambiko mkulu ka mwe kifuwa kwa kubunk'hula kia akuunga Mnungu, kadamanywe kwa umanyi enga ivo kidamanywe kiya kizibau. Naho kadamanywe kwa zahabu na kwa sufu ya langi ya buluu na zambalau na ink'hundu na nyuzi zing'aile zibilingwe kwa unt'handa. 16 Kaligane kosekose naho kande kabilingwa, utali no uzangalamu wakwe unde nyanda kenda. 17 Kihambwe kwa misafa mine ya maiwe ya yombe kulu. Msafa wa nk'hongo nounde wa lubi na topazi na ganeti, 18 msafa wa kaidi nounde wa amalodi na safaya na alimasi, 19 mwo msafa wa katatu nounde wa yasisto na akiki ink'hundu na masisiti, 20 na msafa wa kane nounde wa zamalajadi na shogamu na yasipi. Ivi vose nevigeligwe mwe vitozelo va zahabu. 21 Aya nayande maiwe mlongo na maidi viligane na mazina ya wana wa Izilaeli. Kila iwe dimwenga neditulumwe zina dimwenga dya wana mlongo na waidi wa Izilaeli. 22 Udamanye mkufu wa mwe kifuwa wa zahabu yedi ubilingwe enga luzigi. 23 Naho udamanye mp'hete mbili za zahabu vileke uziike mwe zimp'hembe zimbili za kafuko ako. 24 Mikufu iyo miidi ye zahabu uinyinye mwe zimp'hete mwe zimp'hembe ze kafuko ke kifuwa. 25 Ziya zimp'hembe zimbili ze mikufu ye zahabu uzisomeke kwe vint'hu viidi ve zahabu va kadya kabati vileke vitozane ne kipande cha mwa maega ye kizibau kwa kulongole. 26 Udamanye mp'hete mbili za zahabu uzigele hasi kwa kundani mwe zimp'hembe zimbili za kafuko ka mwe kifuwa hagihi ne kizibao. 27 Udamanye mp'hete mbili nt'huhu za zahabu niyo wazigela kulongole mwe mp'hembe ya hasi ye vizibau hadya kizibau kikulungana no mkoa udamanywe kwa umanyi. 28 Kazibao kanyinyigwe ne zimp'hete mwe zimp'hete za kafuko kwa misipi ya ibuluu vileke kekale mwe mnanga mwe msipi wa kafuko utulumwe vedi, vileke kizibao kanase kuhalala mwe kafuko.

29 "Umwo Haluni akengila hant'hu Hakukile naavale kadya kafuko katulumwe mazina ya makabila ya Izilaeli vileke Miye Zumbe niwakumbukile want'hu wangu mazuwa yose. 30 Mwa kafuko ako ka mwe kifua, nougele maiwe yo kubunk'hula kia akuunga Mnungu, yakuvegemela mwe kifuwa cha Haluni kila akeza hameso yangu. Nevinda kila nk'hanana Haluni avale kafuko ako vileke adahe kubunk'hula kiya huunga mwa Waizilaeli.

31 "Ink'hazu yo kuvaila kundani kizibau nowiisume yose inde ya buluu. 32 Neinde no wazi wo kombosela mtwi naho uwazi uwo nouzungulusilwe mp'hindilo enga msipi ufumigwe vileke usekutatuka. 33 Mwe mp'hindilo yakwe ya hasi kuzunguluka nt'hendelo zose neihambigwe kwa makomamanga ye buluu na zambalau na yenk'hundu, naho nokunde na mbugi za zahabu hagatigati ha makomamanga ayo, 34 aha komamamanga, aha mbugi, aha komamanga, mbugi, kuzunguluka nk'hazu yose. 35 Haluni naavale ink'hazu iyo umwo akadamanya indima yakwe yo ulava nt'hambiko hameso ha Zumbe akengila na umwo akafosa, mbugi nezivike vileke ase kukomwa.

36 "Udamanye hambo dyedi dya zahabu niyo wadituluma enga ivo want'hu wakutuluma viwalo. dikuka kwa Zumbe. 37 Hambo idyo dinyinyigwe kulongole mwe kilemba kwa msipi wa langi ya buluu. 38 Haluni naadivale idyo dihambo mwe kihanga chakwe. Kwa hambo idyo naande kaguha masa ya Waizilaeli kugamba yadahika wayadamanyaga umwo wakanilavila malavo yakukile name neni yazumile.

39 "Umsumile Haluni nk'hazu ngihi ihambigwe kwa nyuzi zedi na kumfumila kilemba chedi na msipi uhambigwe vedi.

40 "Uwasumile wana Haluni nk'hazu zedi na msipi na nk'hofia vileke waoneke kunda no ung'azi utendese. 41 Umvale nduguyo Haluni na wanawe zisuke izo akajika uwakume mavuta niyo wawageleka mikono vileke wanidamanyile ndima enga walava nt'hambiko. 42 Naho uwasumile putula kwa kitambala king'aile ziwagubike kukongela mwe vigudi mpaka kwa mavindi vileke wafise umbwigili wawe. 43 Haluni na wanawe wavale zisuke izo wakengila kwe dihema ha meso yangu wakahinga hant'hu Ha kumlavila Mnungu nt'hambiko wakadamanya ndima yo kilava nt'hambiko hant'hu hakukile. Kwaivo hawalagise umwigili wawe vileke wanase kukomwa. Ivo nivo nevinde kwa Haluni na welekwa wakwe.