1 "Uzenge kilingo cha nt'hambiko kwa mizengo ya msaji aho hokokela ubani. 2 Haligane nt'hendelo zose, uzangalamu wakwe unde nusu ye mp'hima utali wakwe unde nusu ye mp'hima, kuita kulanga kwakwe kunde mp'hima imwenga. Miduganyo mwe zimp'hembe zakwe izine idamanye kint'hu kimwenga. 3 Uhakizige zahabu yedi mnaga nt'hendelo zose izine ne miduganyo yakwe aho hant'hu ho kulavila nt'hambiko, naho nouizungulusile lupapi lwa zahabu. 4 Aho hant'hu ho kulavila nt'hambiko uhadamanyile mp'hete mbili za zahabu niyo wazivala hasi yo lupapi lwakwe kwe zint'hendelo zimbili zikukaulana, mp'hete izo nezinde kwa kutozeleza imikimailo umwo aho hant'hu homkulavila nt'hambiko hakenulwa. 5 Imikimailo ino uidamanye ya misaji niyo waikiziga zahabu. 6 Hant'hu aho ho kulavila nt'hambiko nouhaike kuse ye dipazia dikuhoela kulongole ya hant'hu he zimbazi. Aho niho hant'hu nenidugane na weye. 7 Kila mtondo Haluni aungwa eze aviike lumwe ivimuli no kufunk'hiza ubani una mhemp'he hant'hu aho. 8 Naafunk'hize ubani kaidi aho kisingi naakweleze vimuli aho mwalagulo, ivo ubani nowokigwe mazua yose hameso hangu miye zumbe haheina kuleka kwa vyeleko venyu vose. 9 Mse kulava ubani wowose houkukile aho hant'hu ho kulavila nt'hambiko, hegu malavo yoyose ya koka hegu malavo ya unga. Naho malavo yo kunywa yasekulavilwa aho. 10 Haluni naahakukize hant'hu ho kulavila nt'hambiko kwa sakame ya kuusila wavu mwe vihembe vakwe ivine nk'hanana imwenga kwa mwaka. Kwe vyeleko venyu vikwiza naadamanye ayo kila mwaka. Ino ikuka kwa miye Zumbe."

11 Zumbe niyo amgamba Musa, 12 "Umwo mkawawaza want'hu wa Izilaeli kila yumwenga naaungwe kuliha kodi kwajili yakwe mwenye, nnase kuwegaila maine yaihile umwo wakawazwa. 13 Kila yumwenga akuunga ande mwo uwazilo naaungwe kuliha matundu, matundu ayo nayahimwe vikuligana ne vihimo ve Dihema Dikukile ivo viikigwe. Kila yumwenga aungwa kuliha malavo kwangu. 14 Kila yudya akuunga awazigwe kukongela miaka milongo miidi na kugendeela naalihe ikodi iyo. 15 Mkiwa na mgoli, wose waungwa kuliha kihimo kimwenga kiikigwe kwa Zumbe kwa kudamanya mwivano. 16 Uduganye matundu kulawa kwa Waizilaeli matundu ayo yadamanye ndima za mwe Dihema Dikukile ha meso ha Zumbe, Kodi ino neinde ni maliho ya kwa ugima wenyu, name neni wakumbukile kuwamila Waizilaeli."

17 Zumbe Mnungu niyo amgamba Musa, 18 "Udamanye kanga dya shaba no kudigela mazi kundani kwa kukekukizila. Udiike hagati ye Dihema Dikukile na kilingo cha kutambikila. 19 Haluni na wanawe nawakekukize amazi ayo mwe iviga ne mikono yawe, 20 umwo wakanda hawanati kwingila kwe Dihema Dikukile hegu kusogeela kilingo cha kutambikila, vileke wakamlavile Zumbe nt'hambiko ya kokigwa. Wakekukize na mazi wanase kukomigwa. 21 Waungwa kukekukiza mikono ne viga vileke wanase kukukomwa. Ino neinde sigilizi kwa Haluni na wanawe no kugendeela kwe vyeleko vawe vikwiza."

22 Zumbe niyo amgamba Musa, 23 "Uguhe vint'hu vina mhemp'he, kilo mtandatu za mavuta yakwitangwa manemane yana mhemp'he, na kilo nt'hatu za unga wa mdalasini una mhemp'he wedi, na kilo nt'hatu za unga mmea una mhemp'he wedi wikale enga mguwa, 24 na kilo mtandatu za mdalasini wi vituhu. Vihimo ivo vose vihondigwe vikaligana ne vihimo visigiilwe mwe Dihema Dikukile. Akajika uguhe vihimo vine va mavuta ya zeituni, 25 kulawa mwe vint'hu ivo vose, noudamanye mavuta yakukile, uyahanganye enga ivo akudamanya mmanyi mwa mihemp'he. Ayo nayande kwakuika vint'hu na want'hu mwo undima. 26 Kwa ayo mavuta noudihake Dihema Dikukile ne Disanduku dye Ndagano, 27 ne meza ne vint'hu vakwe vose ne kinala cho lumuli ne vint'hu vakwe vose ne Disanduku dyo kufunk'hizila ubani, 28 ne, Disanduku dyo kulavila nt'hambiko yo kokigwa ne vint'hu vakwe vose ne dikanga dyo kukekukizila ne kisimiko chakwe. 29 Viike kwa ndima ivo ivint'hu, naho uvikukize ivo vint'hu vinde vikukise. Yeyose hegu chochose kikuunga kivikwafe nekinde kikukile. 30 Uwahake mavuta Haluni na wanawe na kuwakukiza wande walava nt'hambiko mwo undima wangu. 31 Wagambe Waizilaeli, aya nayande mavuta yangu yakukile yo kuhaka kwe vyeleko venyu vose. 32 Mavuta aya yase kuhakigwa mbwitu enga ivo want'hu wazoele, naho yasekudamanywa mavuta matuhu ya vihanganyilo enga aya, aya ni mavuta yakukile naho nayande yakukile kwenyu. 33 Yeyose akuunga adamanye mavuta yana vihanganyo enga aya niyo amhaka mnt'hu heewagilwe kuhakigwa mavuta ayo, mnt'hu uyo niyo adamanya mavuta ayo, naapagulwe mwa want'hu wangu."

34 Mnungu amgambaga Musa, "Uguhe vihimo viligane na vint'hu vina mwiile enga ivi, usula wa natafi na usula wa sheketi na usula wa kelibena na ubani wedi. 35 Udamanye ubani kwa vilungo ivi enga viya akudamanya mdamanyi wa mavuta yo mhemp'he naho ugele munyu vileke unde wedi naho ukukile. 36 Uutigint'he ipatikane nt'hifu yakwe niyo waguha nt'hifu iyo ludodo no kuikung'unt'hila mwe Dihema Dikukile na he Disanduku dye Nagano. Ubani uno uutende kunda ukukise. 37 Unadamanya ubani uno kwa viahanganyilo enga ivo usekunde wako mwenye mna uumanye kugamba uwo ukuka kwa Zumbe 38 Yeyose anadamanya ubani enga uwo enga mavuta ya mhemp'he kwakwe mwenye haafanyanywe kunda yumwenga mwa want'hu wangu."