1 Zumbe amgambaga Musa, 2 "Wagambe Waizilaeli wanilavile malavo. Unihokeele malavo kwa mnt'hu akulava haheina kutigizwa. 3 Malavo nouhokele ni ya zahabu na masawa na shaba, 4 nyuzi za buluu na za zambalau na suke zedi zing'aile na mazoya ya mbuzi, 5 nk'hingo zihuhile zihakigwe langi ink'hundu na nk'hingo ya kala dya kwe bahali hediina mazoya na mbao za msaji, 6 mavuta yo kukwelezela ivo vimuli na vilungo vina mhemp'he, na mavumba yana mhemp'he, 7 na maiwe ya yombe kulu yakwitangwa sadoniki na maiwe matuhu ya mahambo kwajili ye kizibau na kadya kafuko ka mwe kifuwa.

8 "Want'hu wanizengele Hema Dikukile vileke nikale mwawe. 9 Uzenge Hema idyo ne vint'hu vakwe vose viligane na ivo huunga husigiile.

10 "Udamanye sanduku dya mbao zo msaji. Utali wakwe dinde nyanda milongo mine na mnane, uzangalamu wakwe unde nyanda milongo mitatu na nt'hatu, no utali kuita kulanga unde nyanda milongo mitatu na nt'hatu. 11 Uikizige zahabu kuse na kundani, naho udizungulusile lupapi lwa zahabu kosekose. 12 Udamanye mp'hete nne za zahabu niyo wazisomeka mwa matengu yakwe amane. Zimp'hete zimbili kwe nt'hendelo ino, zimbili nazo kwe nt'hendelo int'huhu. 13 Udamanye mikola yo msaji niyo waihakiza zahabu kose kose, 14 naho someka mikola iyo mwe zimp'hete zimwe zint'hendelo zimbili mwe Disanduku vileke vidahike kwinulwa. 15 Mikola ise kulavigwa mwe zimp'hete izo, yaungwa kwikala uumwo mwe Disanduku. 16 Akajika viiwe ivo vikale enga vibao viwandikwe imiko, ivo huunga hwink'he nouvigele mwe Disanduku idyo.

17 "Disanduku idyo dikwitangwa hant'hu he zimbazi, uhadamanye kwa zahabu yedi. Utali wakwe unde nyanda gana na mlongo, uzangalamu wakwe unde nyanda milongo mtandatu na mtandatu, 18 naho usane viumbwa viidi va zahabu vina mawawa vikwitangwa enga makelubi niyo waviika uku na uku aho hant'hu he zimbazi. 19 Kila kiumbwa kimwenga noukiike kwo uheelo we ngubiko. Wiike viumbwa ivo kwo uheelo we idyo Disanduku mna uvilunganye kunda kint'hu kimwenga na aho hant'hu. 20 Makelubi aya nayasinyane naho nayakunjule mawawa yawe no kugubika hant'hu he zimbazi. Vihanga vawe nevihitukile hant'hu he zimbazi. 21 Ika ingubiko mnanga mwe Disanduku mnanga mwe Disanduku niyo waika kundani vibao ve Ndagano huunga whink'he. 22 Aho nenidugane na weye naho nenilonge na weye handa hant'hu he zimbazi mgati ya yadya makelubi maidi, naho nohwink'he miko yangu kwa Waizilaeli.

23 "Udamanye meza ya ziti dya msaji, utali wakwe nounde nyanda milongo mnane na mnane, uzangalamu wakwe nawo nounde nyanda milongo mine na kane, kuita kulanga nounde nyanda milongo mtandatu na mtandatu. 24 Wiikizige zahabu yedi imeza iyo no kuizungulisila mnk'handa kwa zahabu kosekose. 25 Naho nouigele lupapi lukuzunguluka meza yose lwa kukindila vint'hu visekugwa. Uzangalamu wo lupapi ulo nounde nyanda nne, naho mwo lupapi ulo lwose kuzunguluka imeza yose, ugele ugonde wa zahabu yedi. 26 Uidamanyile mp'hete nne niyo wazisomeka mwe zimp'hembe zakwe zinne umwo yeli matengu yakwe. 27 Zimp'hete zikutoza mikiki ikwinula imeza zinde hagihi no lupapi. 28 Udamanye mikiki ya msaji niyo waikiziga zahabu, yedi mikiki iyo niyo ikwinula imeza. 29 Udamanye vihungu na vikombe kwa zahabu yedi, vo kugidila malavo, hamwenga na makanga yakwe ne zinyiga zakwe va kugidila divai. 30 Iyo imeza nowiike kulongole kwe Disanduku dye Ndagano, naho iyo imikate ikukile mnilavile nowiike umwo mnanga mwe meza. Imikate iyo neinde hameso hangu mazuwa yose.

31 "Usane kinala cho kuikila vimuli cha zahabu yedi. Kisimiko chakwe no mhini wakwe ne fundo na mabwali yakwe yose yaungwa kunda yasanigwe vinde mwe dihande dimwenga dye zahabu. 32 Naho nokunde na matambi mtandatu yakulawa nt'hendelo zakwe zose, matambi mtandatu ye kinala cho lumuli yalawe mwe nt'hendelo imwenga, matatu nayo yalawe mwe nt'hendelo int'huhu ye kinala cho lumuli. 33 Vikombe vitatu vidamanywe enga mabwali ya mlozi, dyodyose mwa ayo dinde ne fundo ne lembwe ne diluwa, viya vikombe vitatu vidamnywe enga mti ukwitangwa mlozi mwe ditambi dya kaidi yande na lembwe na mabwali, nivo nevinde matambi yose mtandatu yakulawa mwe kiya kinala cho lumuli. 34 Mhini we kinala cho lumuli nounde na vikombe vine vikale enga luwa dya mlozi ne fundo yakwe na mabwali. 35 Naho nokunde na fundo kila hant'hu, fundo mbili zikulawanya viligane na matambi yadya mtandatu mwe kiya kinala. 36 Zifundo na matambi yawe nayande kint'hu kimwenga ne kinala cho lumuli visanigwe kwa zahabu yedi. 37 Noudamanye vimuli mfungate, navo nevikolezwe vileke vilave ung'azi halongole hakwe. 38 Udamanye vitotozelo vakwe ne vihungu vakwe, vose vinde vidamanywe kwa zahabu yedi. 39 Ivi vose kwa hamwenga nevidamanywe kwa kilo milongo mitatu na shano ya zahabu yedi. 40 Kaulisa kugamba vadamanywa viligane na ivo ukulagiswa aha ho mnima."