1 "Mbuli ukuungwa umdamanyile Haluni na wanawe kuwakukiza kwa ndima ya ulava nt'himbiko ni izi. Uguhe jeku dimwenga na ndolome mbili heziina malema. 2 Udamanye mikate kwa unga we ngano hewigeligwe ugwadu na keki zimyagilwe mavuta. 3 Vigele mwe nt'hangulu imwenga niyo wanilavila kwa hamwenga ne dijeku ne zindolome zimbili.

4 "Uwegale Haluni na wanawe he nk'hili ye Dihema Dikukile niyo wawahaka mazi viligane ne kihendo che Kiyahudi. 5 Nouguhe ziya zisuke ze kilava nt'hambiko umvale Haluni, nk'hazu ne kizibau na kafuko ka mwe kifuwa niyo wamnyinya udya msipi wa mwe kigudi udya uhambigwe kwa umanyi. 6 Umvale kilemba mwo mtwi, naho mnanga mwe kilemba icho ugeleke idya ink'hofia ikukile itulumwe inde kwa ukulu wa Zumbe. 7 Naho uguhe mavuta yo kuhaka niyo waya gida mwo mtwi wakwe, kwajili yangu.

8 "Akajika uwalete wanawe nawo niyo wawavala shati nt'hali ing'aile. 9 Nouwanyinye misipi mwe vigudi no kuwavala nk'hofia mwe mitwi yawe. Ivo nivo ukuunga uwa ike lumwe halini na wanawe kwa ndima ya ulava nt'hambiko. Awo nawande walava nt'hambiko wangu mazuwa yose.

10 "Wigale jeku kulongole kwe Dihema Dikukile niyo Haluni na wanawe wageleka mikono mwo mtwi we dijeku. 11 Noudichinjile he nk'hili ye Dihema Dikukile hameso hangu. 12 Nouchank'hize kadole kako mwe sakame niyo waisisa isakame kwa kadole kako mwe zimp'hembe ze kilingo che nt'hambiko. Sakame yose isigale uitile aho hant'hu hokulavila nt'hambiko. 13 Nouguhe mavuta yose yakugubika utumbo, mna maini ayedi hamwenga ne zifigo zimbili na mavuta yawe, ivo vose uvokele hant'hu ho kulavila nt'hambiko kunda nt'hambiko kwangu. 14 Mna inyama ye dijeku ne nk'hingo yakwe enga maifu yakwe nouvokele kuse ye nk'hambi. Aya nayande ni malavo ya kuusiala wavu wa walava nt'hambiko.

15 "Akajika nouguhe indolome imwenga niyo Haluni na wanawe wageleke mikono yawe mwo mtwi we ndolome. 16 Nouichinje niyo waguha isakame yakwe no kuimyaga mwe zimp'hembe zose zine za hant'hu ho kulavila nt'hambiko. 17 Akajika nouidange dange ingoto iyo vihendohendo, nousunt'he vint'hu vakwe va kundani ne viga vakwe niyo waviika mnanga wo mtwi ne vihendo vituhu. 18 Naho nowoke ndolome yose aho hokulavila nt'hambiko vileke unilavile nt'hambiko ya kokigwa. Mhemp'he we nt'hambiko ukulavigwa kwa kutakokigwa wanelela miye Zumbe Mnungu.

19 "Guha didolome nt'huhu niyo Haluni na wanawe wageleke mikono mwo mtwi we didolome. 20 Dichinje didolome niyo waguha isakame uihake mwe zimp'hembe za magutwi ya kulume ya Haluni na wanawe na mwa madole makulu mwe mikono yawe ya kulume na mwa madole makulu ya mwe viga vawe va kulume. Sakame isigale uimyage mwe zimp'hembe izine za hant'hu ho kulavila nt'hambiko. 21 Akajika nouguhe sakame imwenga iyo ihant'hu ho kukulavila nt'hambiko na mavuta kidogo niyo wammyagila Haluni ne zisuke zakwe na wanawe ne zisuke zawe, niho yehe ne zisuke zakwe naande akukile hamwenga na wahawe ne zisuke zawe, awo nawande wakuka kwa kajili yangu.

22 "Nouguhe mavuta yo mkila ye didolome na mavuta yakugubika zinyama za kundani ne diini ne zifigo mbili na mavuta yawe ne kiga cha kulume. 23 Kulawa mwe nt'hangulu ye mikate heigwadulwe iyo ihameso ha Zumbe nouguhe mkate umwenga na andazi dimwenga digelegwe mavuta yo mzeituni umwenga nawo hewihakigwe mavuta. 24 Uvink'hize ivi vose mwe mikono ya Haluni na wanawe, nawo nawavinule kulanga kulagisa kugamba mwanilavila miye Zumbe. 25 Uviguhe naho kulawa mwe mikono yawe niyo wavoka aho hant'hu ho kulavila nt'hambiko ukahanganya hamwenga na malavo yo kokwa, unde mhemp'he wa kunelela miye Zumbe.

26 "Uguhe kifuwa che didolome idyo dyo kugeligwa mwo undima Haluni kwajili ya Zumbe na kudamanya kilagiso cha kunilavila miye Mnungu. Naho kifuwa iki nouguhe weye.

27 "Umwo walava nt'hambiko wakakukizwa kifuwa ne kiga viwatendele wande mwe undima nevinde kwajili yangu kunda geleko no kuvazagula kwajili ya walava nt'hambiko. 28 Haheina uheelo Waizilaeli nawaguhe ma malavo yawe yo utondowazi niyo wamwink'ha Haluni na wanawe. Iyo neinde ni malavo yawe kwa miye Zumbe.

29 "Uneva haluni ana banika, suke zo ulava nt'hambiko za Haluni nawenk'higwe wanawe wavale umwo wakageligwa mwo undima. 30 Umwana Haluni akuunga aguhe hant'hu ha ise enga mlava nt'hambiko naazivale kwa mazuwa mfungate umwo akengila mwe Dihema Dikukile kwa undima wakwe aho Hant'hu Hakukile.

31 "Unaguhe didolome didamanyile mwivano, niyo inyama yakwe wainyemsila ho lwazo lwe Dihema Dikukile. 32 Naho Haluni na wanawe nawo nawadye inyama ye didolome no mkate ivo vimwe nt'hangulu wakanda he nk'hili ye Dihema Dikukile. 33 Woho nawadye ink'hande iyo yo kuwaika mwo undima na kuusila wavu. Ni walava nt'hambiko aawo du wakuungwa kudya ink'hande iyo naho hiyo mnt'hu yeyose akudaha kudya kwaviya ikuka. 34 Uneva nyama yoyose ne mikate zisigale mpaka mtondo, uvoke kwa moto. Visekudigwa kwaviya ivo vikuka.

35 "Ivo nivo noumtendele Haluni na wanawe enga ivo husiigile. Nouwakukize kwa mazuwa mfungate. 36 Naho kila zuwa noulave jeku enga nt'hambiko ya kuusila wavu, naho noulave nt'hambiko ya kuhakukiza kilingo cha kutambikila. Akajika nouhetiile mavuta ya zeituni vileke hande hakuka. 37 Kwa mazua mfungate noudamanye mwivano we kilingo che nt'hambiko no kukikukiza. Naivo kilingo icho nekinde kikukise, naho chochose kikuunga kikikwafe, nekinde kikuka.

38 "Kila zuwa mwo lupisi lwose lukwiza noulave ndolome mbili za mwaka umwenga kunda nt'hambiko ye kilingo che nt'hambiko. 39 Dolome dimwenga noudilave mtondo dintuhu nadyo noudilave kisingi, 40 naho hamwenga ne didolome dya nk'hongo noulave na mp'hishi nt'hatu za unga udinyigwe vedi uhanganywe na lita imwenga mavuta yahondigwe, kihimo cha lita imwenga inde malavo ya kunywa. 41 Ulave didolome dituhu aho kisingi na malavo yo unga uudya na malavo yakwe yo kunywa enga ivo vandile nomtondo. Ino ni nk'hande ilavilwe miye Zumbe vileke inilavile mhemp'he. Ni malavo hulavilwa kwa kokwa miye Zumbe. 42 Malavo aya yo kokigwa nayalavigwe haheina uheelo kwa vyeleko vose he nk'hili ye Dihema Dikukile hameso ha Zumbe. Aho niho huunga nidugane na want'hu wangu na kulonga na weye. 43 Hadya nenidugane na Waizilaeli, naho hant'hu aho nahakukizwe nu uwedi wangu utendese. 44 Nenidikukize Dihema Dikukile na hant'hu ho kulavila nt'hambiko, neniwakukize Haluni na wanawe vileke wande wandima wangu mwo ulava nt'hambiko. 45 Naho nenikale mwa Waizilaeli, name neninde Mnungu ywawe. 46 Niho nawamanye kugamba ni miye Zumbe Mnungu ywawe awalavile mwe isi ya Misili hudaha kwikala mwawe, ni miye Zumbe, Mnungu ywawe.