1 Zumbe amgambaga Musa, 2 "Himsagula Bezaleli mwana Uli, mwana mwezukuluwe dya Huli we dikabila dya Yuda, 3 naho himgela Muye ywangu na kukombaganya ne mizungu no umanyi na ubala wa kila mdima. 4 kwa kwiika mzungu na kufanyaya kudamanya kwa zahabu na masawa na shaba, 5 mwo kukant'ha maiwe ya kuhambila no kusongola maziti no kudamanya ndima zihengi za umanyi. 6 Naho himsagula Oholiabu mwana Hisamaki ywe dikabila dya Dani, adamanye ndima na yehe. Naho himgela mzungu mkulu kwa wandima wose vileke wadahe kudamanya kila kint'hu viligane na viya nisigiile. 7 Dihema Dikukile ne Disanduku dye Ndagano na hant'hu he zimbazi mnanga mwakwe ne vint'hu vose ve Dihema dikukile, 8 meza ne vint'hu vakwe ne kikimailo cho lumuli kidamanywe kwa zahabu yedi ne vint'hu vakwe vose na hant'hu ho kokela ubani, 9 hant'hu aho ne vint'hu vakwe dikanga dyakwe ho kulavila nt'hambiko yo kokwa, hamwenga ne dikanga dyakwe ne kisimiko chakwe, 10 izisuke zisumigwe kwa unt'handa zo ulavant'hambiko za Haluni na wanawe wakadamanya ndima yo ulava nt'hambiko, 11 mavuta yo kuhaka yo mhemp'he wo ubani kwa Hant'hu Hakukile. Unadamnya ivi nounde kudamanya kindedi viligane na viya husigiile."

12 Zumbe amsigiilaga Musa, 13 wagambe Waizilaeli, "Mtozese dizuwa dyo kuhumula, kwaviya dikuka kwangu ni kiwalo che Ndagano mwa miye na nyuwe kwe vyeleko venyu vose mmanye kugamba ni miye Zumbe huwakukizani nyuwe. 14 Mditoze dizuwa idyo dyo kuhumula kwa viya dikuka kwenyu. Mnt'hu yeyose hanaditozile naapagulwe mwa wanthu wakwe, naho yeyose naadamanye ndima mwe dizuwa idyo naakomwe. 15 Unanayo mazuwa mtandatu ya udamanya zindima zako, mna zuwa dya mfungate, ikindedi ni zuwa dya kuhumula, dikuka kwa miye Zumbe. Yeyose naadamanye ndima mwe dizuwa idyo naakomwe. 16 Kwaivo Waizilaeli nawaditoze dizuwa idi dyo kuhumula no kudikaulisa mwe vyeleko vawe vose. Ino ni kiwalo che Ndagano ya mazuwa yose. 17 Neinde kiwalo cha mazuwa yose mwa miye na Wazilaeli, kwaviya kwa mazuwa mtandatu Zumbe adamanyaga mbingu na si niyo ahumula mwe dizuwa dya mfungage."

18 Umwo Zumbe eze ibinde kulonga na Musa ukwo kwo mnima wa Sinai amwink'haga vihant'hi viidi va maiwe, ivihant'hi ivo Mnungu mwenye awandikaga izisigilizi.