1 Mna Musa niyo amhitula Zumbe, "Neni tende vivihi uneva want'hu hawananitegeleze no kuhuwila yadya hulonga? Naho wanigamba hukelavilize kwangu?"

2 Ivo niyo Zumbe amuuza Musa, "Kutozai mwo mkono?" Niyo ahitula, "Hitoza nk'home."

3 Niyo Zumbe amgamba, "Iduule hasi." Musa eze aiduule hasi niyo yahituka nyoka, niyo ainyilika. 4 Zumbe niyo amgamba Musa, "Chulula mkono wako uitoze kwo mkila wakwe." Ivo Musa niyo achulula mkono no kuitoza inyoka, niyo yahituka naho kunda nk'home mwo mkono wakwe. 5 Zumbe niyo agamba, "Kadamanye ivo vileke Waizilaeli wahuile kugamba Zumbe, Mnungu ywa wakale wenyu kakulaila, Mnungu ywa Ibulahimu na Mnungu ywa Isaka naho Mnungu ywa Yakobo."

6 Zumbe niyo alonga naye naho, "Gela mkono wako mwe nk'hazu he kifua." Musa niyo agela mkono wakwe mwe nk'hazu he kifua, mna eze aulave, mkono wakwe nounda na matana, ung'aile chwee. 7 Naho niyo Zumbe amgamba Musa, "Gela mkono wako kaidi mwe nk'hazu he kifua." Niyo augela mkono wakwe mwe nk'hazu he kifua, eze aulave, nounda uuiya kunda enga nu mwili wakwe wose. 8 Zumbe niyo amgamba, uneva hawana kuhuwile mwe kihungi iki cha nk'hongo, wadaha kuhuwila mwe kihungi iki cha kaidi. 9 Naho uneva hawana huwile hata ivo vihungi viidi, hegu kwiva kiya ukulonga, guha mazi ya kwo mto Naili uyetile mwe isi, nayo amazi ayo nayahituke sakame mwe isi.

10 Mna Musa niyo amgamba, "Zumbe ywangu usekunisigiila, miye hyandile mlongi ywedi kukongela hadya wakongile kulonga na miye hata ivi ukulonga no mtumwa ywako. Lulimi lwangu luzama."

11 Zumbe niyo amuuza Musa, "Niani aumbile mnomo wo mnt'hu? Naho niani amtendile mnt'hu kunda kiziwi, hegu kimumu? Naho niani amtendile mnt'hu aone hegu kunda nt'hunt'hu? Hiyo miye Zumbe? 12 Haluse weye uite! Nehulongoze ukulonga, naho nehuhinize cho kulonga."

13 Mna Musa niyo agamba, "Bule Zumbe, sigiila mnt'hu mtuhu."

14 Aho, Zumbe niyo amuonela maya Musa, niyo agamba, "Togola! nduguyo Haluni mwelekwa ywa Lawi? Himanya yehe adaha kulonga vedi. Naho eza, naande na kinyemi mwo moyo wakwe umwo anakuona. 15 Noulonge naye, umgambile cho kulonga, name neni walongoze nyuwe nyose ukulonga, naho wose waidi neniwagambileni cho kudamanya. 16 Yehe naande mlongi ywako kwa want'hu, nawe nounde enga Mnungu kwakwe akamgambila cho kulonga. 17 Guha ink'home ino, ikande yakudamanyila vihungi."

18 Musa niyo auya kwa mkwewe uyo Yetulo, niyo amgamba, "Nilekele niuye kwa wandugu zangu hawakaule uneva wakei wagima uko Misili." Yetulo niyo azumila no kumgamba Musa, "Genda mp'heho yedi."

19 Zumbe agambaga Musa uko Midiani, "Uya Misili kwaviya wadya nawakazungula kukukoma wabanika." 20 Ivo niyo Musa aguha mkaziwe na wanawe, no kuwakweza mwe mp'hunda, niyo akonga kuuya Misili. Nakatoza ink'home iyo agambigwe ni Mnungu aiguhe.

21 Mna Zumbe niyo amgamba Musa, "Umwo ukauya Misili, ukadamanye vihungi vose viya niviikile mwo udahi wako, hameso ya Falao. Mna nenimtende Falao kunda mnk'hani, naho haawalekele want'hu waite. 22 Naho ukamgambe Falao, ‘Zumbe agamba ivi, Izilaeli ni mwanangu ywa nk'hongo ywe kilume, 23 hikugamba umlekele mwanangu aite, vileke akanivikele, mna kulemela. Haluse nenimkome mwanao ywa nk'hongo ywe kilume.’ "

24 Umwo wandile wakei mwe sila wakauya Misili, Musa andaga hant'hu wagonaga, Zumbe atisaga kumkoma Musa. 25 Mna Zipola mkaziwe niyo aguha iwe disongoke niyo amvina mwanawe ywe kigosi, no kumkwafa Musa mgosiwe mwe viga ne nk'hingo yo ugosi wa mwanawe, niyo agamba, "Ikindedi weye kunda mnumangu kwa sila yo uvini uno." 26 Niyo Zumbe amleka Musa. Aho niho Zipola amgambile, "Weye wyi mlombi ywe sakame kwajili yo kuvinilwa."

27 Zumbe niyo amgamba Haluni, "Ita kwe dijangwa ukadugane na Musa." Haluni aitaga niyo adugana na Musa kwo mnima wa Mnungu, niyo amnonela. 28 Niyo Musa amgambila Haluni mbuli zose Zumbe alongile umwo amgambile auye Misili, hamwenga ne vilagiso vose Zumbe amlagize akadamanye. 29 Akajika Musa na Haluni waitaga Misili no kuwaduganya wadala vilongozi wose wa Izilaeli. 30 Aho, Haluni niyo awagambila kila kint'hu kiya Zumbe alongile na Musa, niyo Musa adamanya vihungi hameso ya want'hu. 31 Niyo want'hu wahuwila, naho weze weve kugamba Zumbe kaweziila no kuona ivo want'hu nawakatendelwa kikwank'walu, niyo wafunama wakavika.